Mandango Buku ti Kongregation: Nda ni so e yeke na bezoin ni
1. Lekengo Mandango Buku ti Kongregation ato nda ni tongana nyen?
1 Na ngu 1895, a ga ti hinga abungbi ti mandango ye ti aWamandango Bible (iri ti aTémoin ti Jéhovah na ngoi ni kâ) tongana Bungbi ti Yanga ti Ndapelele teti Mandango Bible. A yeke manda lani avolume nde nde ti buku L’Aurore du Millénium. Na pekoni, a hiri abungbi so Bungbi ti Azo ti Bérée teti Mandango Bible (Kus. 17:11). Mingi ni, mbeni kete bungbi ti azo ayeke tingbi lani na yâ da ti mbeni zo na mbeni lakui so alingbi na azo ti bungbi ni. A yeke na lege ti abungbi so si Mandango Buku ti Kongregation abâ gigi.
2. Tongana nyen e lingbi ti sala si e “kpengba” mba na bungbi ti mandango buku?
2 Mungo ngangu nga na maboko: Teti so a leke tongaso ti sala si agroupe ti mandango buku angbâ kete, lege ayeke dä mingi teti azo so aga ti fa mabe ti ala na gigi. Ye so aga na pekoni ayeke so “e kue e lingbi kpengba na lege ti mabe ti [mba]”.—aRom. 1:12.
3, 4. Tongana nyen aye so a leke teti bungbi ti mandango buku amû maboko na e ti sala kusala ti e?
3 Tongana e bâ nzoni lege so surveillant ti mandango buku ayeke fa na ye, ye so alingbi ti mû maboko na e ti “[fa] nda ti tene-biani na lege ni.” (2 Tim. 2:15). Bâ tongana nyen lo yeke gboto lê na ndo aversê so ayeke na gunda ti ye ti manda ni. Tongana a lingbi na mbeti so ala yeke manda, lo lingbi ti gboto lê na ndo akota tënë ni na lege ti mbeni dango bê na salango kusala gi na Bible na hunzingo ti mandango buku ni. Nzoni tapande ti lo alingbi ti mû maboko na e ti fa ye nzoni ahon ti kozo na fango tënë.—1 aCor. 11:1.
4 Na ndo ti mungo li ni na mandango ye ti yenga oko oko, surveillant ti mandango buku ayeke mû li ni na fango tënë. Na salango kusala maboko na maboko na surveillant ti kusala, lo yeke leke aye so alingbi na azo ni teti fango tënë. Lo yeke gi ti mû maboko na azo kue na yâ groupe ni ti yô kungba ti ala ti Chrétien ti fango nzo tënë nga na ti salango adisciple.—Mat. 28:19, 20; 1 aCor. 9:16.
5. Mungo maboko wa a yeke mû na zo oko oko na lege ti mandango buku?
5 Surveillant ti mandango buku ayeke bi bê ti lo na ndo nzoni duti na lege ti yingo ti zo oko oko ti groupe ni. Lo yeke fa ni na gigi na ngoi ti abungbi ti kongregation nga na ngoi so lo yeke sala kusala legeoko na ambeni zo na fango tënë. Tongana lo yeke gue ti bâ aita ti lo na da ti ala, lo yeke gbu angoi so ti kangbi legeoko na ala aye ti yingo. A lingbi azo kue agi bê ti ala pëpe ti ga ndulu na surveillant ti mandango buku ti tene lo mû maboko na ala na lege ti yingo na ngoi kue so ala yeke na bezoin ni.—Es. 32:1, 2.
6. (a) Tongana nyen aita ti e na yâ ti ambeni kodoro awara ngangu na bungbingo na yâ ti akete groupe? (b) Tongana nyen mo mveni mo wara ye ti nzoni na lege ti ye so a leke teti mandango buku?
6 E yeke kpengba mba: Na yâ ti akodoro so a kanga lege na kusala ti azo ti Nzapa, mingi ni, aita ayeke tingbi tele na yâ ti akete bungbi. Mbeni ita adabe ti lo: “Atâa so a kanga lege na akusala ti e, na ngoi kue so lege ayeke dä, a yeke azo 10 wala 15 tongaso si ayeke bungbi tele yenga oko oko. E wara ngangu ti yingo na lege ti abungbi ni, na lege ti mandango Bible ti e nga na pekoni na lege ti songo ti e. E yeke haka aye so asi na e, na ye so amû maboko na e ti bâ so e oko oko kue e yeke tiri oko bira.” (1 Pi. 5:9). Zia e nga kue e kpengba mba na mungo maboko kue na ye so a leke teti Mandango Buku ti Kongregation.—aEph. 4:16.