Lege so mandango buku ti kongregation ayeke mû maboko na e
1. Na lege wa abungbi oku so e yeke sara yenga oko oko amû maboko na e?
1 Lege so e yeke sara na abungbi ti e oku ayeke nde nde nga nda ni ayeke nde nde. Ye oko, ala kue ayeke kota mingi ti mû maboko na e ti “bi bê ti e na ambeni zo na popo ti e ti wa ala si ala ndoye azo, na ala sara kusala nzoni”. (aHéb. 10:24, 25). Ye wa asara si Bungbi ti Mandango Buku ayeke nde? Ambeni nzoni ye wa e yeke wara na lege ni?
2. Ti sara bungbi na azo mingi pëpe na mandango buku aga na aye ti nzoni wa?
2 A mû maboko na e ti maï na lege ti yingo: Wungo ti azo so ayeke ga na bungbi ti mandango buku ayeke ka mingi pëpe ahon ti tanga ti abungbi ti kongregation. Ye so asara si a yeke ngangu oko pëpe ti maï tâ songo so ayeke mû maboko na e ti gue na li na lege ti yingo (aProv. 18:24). Mo yeke gi ti hinga azo kue so ayeke na yâ groupe ti mandango buku ti mo, peut-être ti hunda ala ti fa tënë na mo? Bungbi ti mandango buku ayeke mû nga maboko na surveillant ni ti hinga dutingo ti zo oko oko na yâ ti groupe ni na ti mû wango tâ gi na lo.—aProv. 27:23.
3. Tongana nyen bungbi ti mandango buku ayapu ye na awamandango Bible ti ga na ti kiri tënë?
3 Mo tisa awe awamandango Bible ti mo ti ga na bungbi so na mo? Afini zo so angbâ ti gi bê ti ala ti ga na akota bungbi alingbi ti sara mbeto mingi pëpe ti ga na bungbi so azo ayeke dä mingi pëpe, mbilimbili na da ti mbeni zo. Nzoni songo so ayeke kâ alingbi ti yapu ye na amaseka nga na afini zo si ala lingbi ti kiri tënë. Na teti so azo ayeke mingi pëpe, e yeke na pasa mingi ti sara tënë na ti sepela Jéhovah.—Ps. 111:1.
4. Na alege wa bungbi ti mandango buku alingbi ti duti nzoni teti azo kue?
4 Mingi ni, a yeke sara abungbi ti mandango buku na ando so alingbi na awafango tënë. Même tongana lege ayeke pëpe ti tene azo kue abungbi na ndo so ayeke nduru na ala, ti gue na bungbi ti mandango buku so a tisa e dä a lingbi ti hunda na e ti tambela mingi pëpe a hon guengo na tanga ti abungbi ti kongregation. Ndo so a yeke sara bungbi ti mandango buku dä alingbi nga ti duti nzoni ndo ti sara bungbi ti fango tënë dä.
5. Tongana nyen surveillant ti mandango buku ti e alingbi ti mû maboko na e na lege ti fango tënë?
5 A mû maboko na e ti fa tënë: Surveillant ti mandango buku ayeke bi bê ti lo ti mû maboko na zo oko oko ti sigigi lakue na fango tënë, ti tene fango tënë ni alë nzoni na zo awara ngia dä. Ti sara ni, lo yeke gi ti fa tënë na zo oko oko so ayeke na yâ ti groupe ni na mungo maboko na lo na yâ mbage nde nde ti kusala ti fango tënë. Tongana mo bâ so mbeni mbage ti fango tënë akpengba na mo, na tapande sarango afini visite, sara tënë ni na lo. Peut-être lo lingbi ti ma tere na mbeni wafango tënë so akpengba ti sara kua na mo. Fade kode ti mo ti fango Mbeti ti Nzapa na azo ayeke ga nzoni tongana mo bi bê nzoni na kode ti fango ye ti surveillant ti mandango buku ti mo na ngoi ti bungbi ni.—1 aCor. 4:17.
6. Ngbanga ti nyen ti gi ti wara nzoni na lege ti bungbi ti mandango buku?
6 Bungbi ti mandango buku ti kongregation ayeke nzoni ye biani! Ye so Jéhovah aleke na ndoye ayeke mû maboko na e ti bata si e luti nzoni na lege ti yingo na yâ ngoi ti ngangu so e yeke dä laso.—Ps. 26:12.