A lingbi ti sala bungbi na da ti mo?
1 Na kozo siècle, aChrétien mingi azia ada ti ala ti tene a sala abungbi ti kongregation na yâ ni (1 aCor. 16:19; aCol. 4:15; Phm. 1, 2). Na yâ ti ambeni kongregation laso, a yeke wara mingi pëpe ando teti agroupe ti Mandango Buku na ti abungbi ti fango tënë. Ye so asala si wungo ti azo na yâ ti ambeni groupe ti mandango buku ahon 30, yongoro mingi na wungo ti azo 15 so a hunda ni.
2 Mbeni pendere matabisi: Mo pensé ti zia da ti mo ti tene a sala bungbi ti Mandango Buku na yâ ni? Mbeni ndo so yâ ni akono, so ayeke na saleté pëpe, so lumière ni aza nzoni na so pupu ayä na yâ ni nzoni, alingbi biani ti duti ndo ti salango bungbi dä. Teti so mandango buku ayeke mbeni bungbi ti kongregation na mbeni mbage ti ye so Jéhovah aleke ti fa ye na awakua ti lo, ti sala bungbi ti mandango buku na da ti mo ayeke mbeni pendere matabisi. Aita mingi atene so ala wara aye ti nzoni na lege ti yingo na ziango da ti ala ti tene a sala bungbi na yâ ni.
3 Tongana mo bâ so mo yeke na mbeni ndo so alingbi ti tene a sala bungbi na yâ ni, sala tënë ni na a-ancien. Ala yeke gi peut-être ambeni ndo nde ti salango bungbi dä. Tongana lege ayeke dä pëpe ti tene a sala bungbi ti mandango buku na da ti mo, a lingbi ti sala abungbi ti fango tënë dä? Même tongana bezoin ni ayeke dä fade fadeso pëpe, a yeke nzere ande na a-ancien ti hinga so da ti mo ayeke senge. Mo lingbi ti wara matabisi so mbeni lâ.
4 Fa anzoni salango ye: Tongana bungbi ayeke na da ti mbeni ita, a lingbi zo kue akpe ti ndu kirikiri aye ti yâ ti da ni. A yeke nzoni ababâ na mama abâ ndo nzoni si amolenge ti ala angbâ gi na ndo so a leke teti bungbi ni, ti gue kirikiri pëpe na yâ ti ambeni ndo. A yeke nzoni a bi bê nga na avoizin na kpengo ti sala wuluwulu ahon ndo ni.—2 aCor. 6:3, 4; 1 Pi. 2:12.
5 A-Hébreu 13:16 awa e ti girisa pëpe “ti sala nzoni na ti mû ye na azo, teti sacrifice tongaso ayeke nzoni na lê ti Nzapa.” Ti zia si a sala bungbi ti kongregation na da ti mo ayeke mbeni pendere lege ti kangbi anzoni ye na ambeni zo na ti ‘yekia Jéhovah na aye ti mo ti ngele ngangu’.—aProv. 3:9.