Kasete vidéo Des exemples qui nous servent d’avertissement awa e na ndoye
E kue e lingbi ti kpengba na ndo ti desizion so e mû ti ngbâ be-ta-zo tongana e yeda ti manda ye na lege ti drame ti Bible so a fa ni na yâ kasete vidéo Des exemples qui nous servent d’avertissement. Kozo ti bâ ni, diko buku ti Nombre chapitre 25 nga ambeni tënë na ndo ni na yâ ti Étude perspicace des Écritures, mbage 2, lembeti 302, paragraphe 4 ti si na 6. Na pekoni, kiri tënë na ahundango tënë so: Azo ti Moab ayeke lani azo wa? Ngbanga ti nyen Jéhovah atene na Moïse ti sara bira na ala pëpe? (Deut. 2:9). Tongana nyen si Balaam aleke na mayele ti sara kusala na azo ti Moab ti futi amolenge ti Israël? Ngbanga ti nyen a lingbi e girisa pëpe so azo ti Israël mingi atï lani na gbele kota tara tâ gi na ngoi so ala yeke nduru ti lï na Sese ti Zendo?—1 aCor. 10:11, 12.
Na ngoi so e yeke bâ kasete vidéo Exemples, zia e gbu li na ndo ambage osio ti fini ti e so a lingbi e bâ ni nzoni tongana e ye ti ngbâ be-ta-zo, na Nzapa ayeda na e. (1) Bango ndo: Tongana nyen si ambeni zo ti Israël afa kozo so ala yeke na sioni bango ndo na ndo Jéhovah na aye so lo leke? Nde na ala, bango ndo wa a yeke nzoni e sara ngangu ti duti na ni? (2) Akamarade: Ngbanga ti nyen Jéhovah aye lani pëpe ti tene azo ti Israël asara kamarade na azo ti Moab? (Ex. 34:12; aProv. 13:20). Ngbanga ti nyen a lingbi e soro akamarade ti e nzoni? (3) Asarango ye: Asioni kamarade ague lani na azo ti Israël nduru na 23 000 ti tï na yâ ti kota siokpari wa? (1 aCor. 10:8). Laso, ye wa ayeke gue na azo ti Nzapa ti tï na yâ ye ti pitan? Me, ye nyen e lingbi ti sara ti bata tere ti e? (4) Vorongo: Tongana nyen si a tara azo ti Israël lani ti bâ wala vorongo ti ala ayeke na sioni oko pëpe? Mbeni ye so ayeke handa ambeni zo ti voro ayanda laso ayeke so wa? Me tongana nyen e lingbi ti kpe ni?—aCol. 3:5.
Na yâ ti drame ni, tongana nyen si a iri deba nzoni na ndo ti Yamîn ndali ti sarango ye ti lo so ayeke mbilimbili? Na lege ti kasete vidéo so, Wabatango Bungbi awa atâ Chrétien kue na ndoye ti sara nyen? Tongana mo la mo mû li ni na yâ ti sewa, ngbanga ti nyen mo bâ so a yeke na lege ti ndara ti kiri ti bâ kasete so fani mingi na azo ti dä ti mo?