Tongana nyen ti wara mbeni sewa so akpengba na lege ti yingo?

¹ A wa asewa ti aChrétien ti ‘manda ti fa lege ti bata tënë ti Nzapa na yâ sewa ti ala mveni kozoni’. (1 Tim. 5:4). Ye oko, aye ti sioni mingi so angoro e ayeke sala ngangu na ndo e, na a lingbi ti woko mabe ti e. Tongaso, a yeke kota ye mingi ti tene asewa asala ngangu kue ti kpengba na lege ti yingo. A lingbi ti sala ni tongana nyen?

² Mû li ni tongana Christ: A lingbi abeli ti sewa amû tapande ti Jésus Christ tongana ala yeke yô kungba so ala yeke na ni ti kpengba sewa ti ala. Jésus afa na gigi so lo ndoye e na lege ti kuâ ti lo ti sandaga. Me ahon so, Lo gbâ lakue ti ‘mû kobe na ti bata’ kongregation (aEph. 5:25-29). Ababâ na mama ti ndoye ayeke mû tapande ti nzobe so tongana ala bi bê na ndo aye so atia sewa ti ala na lege ti yingo lâ oko oko. Ye so andu mandango Bible na sewa yenga oko oko, salango alisoro so akpengba zo na lege ti yingo na ngoi kue so lege azi, na salango tënë ti akpale tongana a bâ gigi.​—Deut. 6:6, 7.

³ Na yâ fango tënë: A lingbi azo ti sewa ni kue ahinga so ti fa tënë na azo na ndo Jéhovah nga na ndo aye so lo leke ti sala ayeke mbeni kota mbage ti vorongo ti ala (Es. 43:10-12). Ababâ na mama, tongana i ye si amolenge ti i aga aTémoin ti Jéhovah be-ta-zo, a lingbi i komanse ti leke bê ti ala hio teti kusala. Fa ngbanga ti nyen a yeke kota ye ti gbanzi ye na tele ndali ti kusala ti fango tënë, na ti mû mbage dä yenga oko oko (Mat. 22:37-39). Na pekoni, leke aye si ala lingbi ti mû mbage ti ala legeoko na mo na yâ kusala ti fango tënë.

⁴ Yôro na bê ti ala nzala ti fango tënë. Mo lingbi ti sala ni na ziango ambeni penze-ngbonga nde na ngoi ti mandango ye na sewa, ti fa na ti sala démonstration na ndo fango tënë nzoni. Fa lege na amolenge ti mo ti fa tënë nzoni a lingbi na ngangu ti ala oko oko. Mû maboko na ala ti gue na li ni alingbi na ngu nga na akode ti ala. Tongana mo na ala asigigi, na ala hunzi fango tënë awe, hunda na ala ti fa kozoni kue tongana nyen ala bâ nzobe ti Jéhovah. Tene na ala peko ti ambeni ye so asi, so alingbi ti kpengba mabe ti ala. Tongana asewa ‘atara mingi ahon, na ala bâ so Seigneur ayeke nzobe’, fade songo ti ala na Jéhovah amaï mingi ahon, nga a yeke mû maboko na ala ti “zia siobe kue”.​—1 Pi. 2:1-3.

⁵ Na ngoi ti abungbi: So tâ pendere ye tongana azo ti sewa amû maboko na mba ti gue na abungbi kue ti kongregation, mbilimbili tongana mbeni oko na popo ti ala afatige, bê ti lo anze, wala ye ahon ngangu ti lo! Mbeni maseka ita-wali atene: “Tongana babâ alondo na kua lo ga, lo fatige mingi. Me mbi yeke fa na lo mbeni pendere tënë so a yeke sala lisoro na ndo ni na bungbi ande na lakui, na mbi wa lo ti gue. Nga, tongana mbi la mbi fatige, lo yeke wa nga mbi ti gue.”​—aHéb. 10:24, 25.

⁶ Na salango akusala legeoko: A lingbi asewa asala aye legeoko, na tapande salango akua ti da. A lingbi a bata nga mbeni ngoi nde teti salango anzoni ngia. Ti fono ti bâ ndo na gere wala na vélo, salango ambeni ngia, guengo ti bâ afami wala akamarade alingbi ti nzere na azo ti sewa ni kue, na ala yeke glisa ande pëpe anzoni ngoi tongaso.​—Zo-ti. 3:4.

⁷ Lâ oko oko, asewa ti aChrétien so akpengba ayeke hon ndo ti akpale so a lingbi ti buba dutingo ti ala na lege ti yingo. Na gango ndulu na Jéhovah mingi ahon, ala yeke bâ ngangu so Lo yeke mû na zo.​—aEph. 6:10.