Akiringo Tene na Ahundango Tene ti I

◼ Na ngoi wa a lingbi ti leke mbeni bungbi ti Mandango Buku ti Kongrégation na ndo ni?

Fade a yeke ba tene ti lekengo mbeni fini bungbi tongana a hunda tongaso ti bata mbeni wungo ti azo so aga ndulu na azo 15 wala na gbe ni na ando oko oko ti mandango buku, so andu nga Da ti Royaume. Ngbanga ti nyen a hunda tongaso?

Tongana a bata si wungo ti azo so aga na Mandango Buku ti Kongrégation aduti kete, zo so amu li ni alingbi ti bi bê nzoni ahon na ndo zo oko oko so aga. Nga, azo kue ayeke na alege mingi ti kiri tene na yâ mbeni dutingo so amu lege na ala ti fa mabe ti ala na gbele azo kue. (aHéb. 10:23; 13:15) Ti duti na akete bungbi na ando mingi na yâ territoire ti kongrégation ni kue asala si gango na Mandango Buku ti Kongrégation nga na abungbi ti fango tene aduti nzoni mingi. Akongrégation so akono awe wungo ti ando ni aba so wungo ti azo so aga na mandango buku ni ague na li ni nga.

Peut-être ambeni ye so ayeke nde ayeke dä so asala si a yeke nzoni ti leke mbeni bungbi na ndo ni, atä so a yeke duti ande kamême kete. Ye so alingbi ti duti tâ tene na ando so ayo wala ando so na ndembe ni azo asi singo dä wala so a lingbi ti wara pepe nzoni ndo ti duti. Tongana a hunda ni, a lingbi ti leke mbeni bungbi si a manda buku ni na kota lâ teti nzoni ti ambakoro, ti azo so asala kusala na bï wala ti aita-wali so koli ti ala ayeke Témoin pepe.

A lingbi bungbi oko oko ti mandango buku aduti na awafango tene mingi so akpengba na lege ti yingo na so ayeke na wâ. A duti nga na mbeni ita so amu li ni nzoni nga na mbeni ita so adiko ye nzoni. A lingbi aita-koli agi ti wara alengo so a hunda ti kaï abezoin so na yâ kongrégation.

A-ancien alingbi ti kono guengo na li ni ti kongrégation na batango si wungo ti azo so aga na abungbi ti mandango buku ti kongrégation aduti na lege ni, a bata ni nzoni na lege ti yingo, nga aduti na ando so alingbi. Na ngoi kue so a lingbi ti mu maboko, a yeke nzoni ti leke ambeni fini bungbi si azo kue alingbi ti wara ye ti nzoni kue na lege ti lekengo ye ti yingo so ayeke nde. Mo lingbi ti mu da ti mo si a manda buku dä? Azo mingi so asala ni awara adeba nzoni ti yingo.