“Awali so Asala Kusala Ngangu na yâ Seigneur”
1 Na lege ti atene so, Paul asala tene ti Tryphène na Tryphose, aita-wali use ti kongrégation ti Rome so asala la ni kusala ngangu. Na ndo mbeni ita-wali nde, Persis, lo tene: “Lo sala angangu kusala mingi na yâ Seigneur.” Paul asala nga nzo tene ti Phoebé: lo hiri lo ‘zo so asala na ambeni zo mingi.’ (aRom 16:2, 12, NW) Na yâ ti Mbeti ti Nzapa, a mu Dorcas tongana tapande teti lo ‘si na nzo kusala, na lo mu matabisi na azo.’ (Kus. 9:36) Awali so ayeke azo ti yingo ayeke mbeni deba nzoni teti kongrégation.
2 I yeke yekia aita-wali ti kongrégation ti i so asala kusala ngangu? Ala yeke sala kota mbage ti kusala ti fango tene, ala yeke manda Bible na azo mingi ahon na ala yeke mu maboko na afini zo mingi. Ala yeke mu nga ngoi mingi ti mu maboko na amolenge ti maï na lege ti yingo. Awali so ayeke aChrétien ayeke sala si ndoye, ngia, siriri na wâ awu na yâ ti kongrégation. A yeke na lege ti maboko so ala mu na yâ aye mingi si akoli ti ala na ambeni zo ti sewa ti ala alingbi ti mu mbage ti ala mingi na yâ kusala ti Jéhovah.
3 Aita-wali na yâ kusala ti ngoi kue: Na popo ti aita-wali so ayeke sala kusala ngangu na yâ Seigneur ayeke wara amissionnaire; mingi ti ala asala kota kusala na yâ tongo nda ti kusala na yâ ti akodoro mingi. Na yâ ti akongrégation so akoli ti ala ayeke sala kusala dä, awali ti asurveillant so ague na ndo nde nde amu mbage ti ala na yâ ti kusala ti fango tene na ala kpengba aita-wali mingi. I glisa pepe aita-wali ti Béthel, so asala mbeni kusala ti nzoni-kue na wâ ti mu maboko na bungbi ti Jéhovah. Nga aita-wali so ayeke apionnier permanent so amu maboko na azo saki mingi ti hinga tâ tene na lege ti angangu so ala sala na be-biani ti mu gonda na Nzapa.
4 Aita-wali be-ta-zo so awara kota ngia na yâ fini ti ala so ala gbanzi ye mingi na tele ti ala dä. (1 Tim. 6:6, 8) Ala lingbi na gonda, wâ nga na mungo maboko ti e.
5 Awali so ayeke aChrétien ayeke mbeni ye ti nzoni so ayeke na ngele ngangu teti bungbi ti Jéhovah; ala sala mbeni kusala ti be-biani so aga na aye ti nzoni na azo kue. E ngbâ lakue ti yekia awali so na e sambela Jéhovah ti hiri deba nzoni na ndo ti ala, teti “ala sala kusala ngangu na yâ Seigneur.”