‘Fa Tene Ni na Ngbâ Dä’
1 Tongana a hunda na mo ti ngbâ na ndo ti mbeni ye, aye ti tene nyen teti mo? Tene so aye ti tene ‘ti ngbâ lakue ti sala mbeni ye.’ Bazengele Paul atene na lege ni na aChrétien ti ‘fa tene ni na ti ngbâ dä.’ (2 Tim. 4:2, NW) E yeke mä wango ti lo na ngbango lakue na yâ kusala so?
2 Peut-être a tene na Paul so ambeni ita ayeke na bibe ti sala kusala ti ala ti Chrétien ‘na bê so anze.’ (aRom. 12:11) Tongaso, angangu so ala yeke sala alë mingi pepe, na ala yeke wara pepe ngia mingi so ala lingbi fade ti wara na peko ti mungo maboko na ambeni zo.
3 Bibe ti Jésus na ndo kusala ti fango tene: Bê ti Jésus ayeke la ni na kota ngia mingi ti sala kusala ti lo ti fango tene. Lo tene: “Kobe ti Mbi ayeke ti sala ye so Lo so ato Mbi aye, na ti sala kusala ti Lo kue.” Tapande ti lo ayeke kpengba la ni adisciple ti lo, so lo wa ala na tenengo so ‘le-kobe ti yaka abe alingbi na fango ni.’ (Jean 4:34, 35) Na tongo nda ti kusala ti lo ti fango tene juska ti si na nda ni, Jésus azia lakue na li ti lo so a lingbi lo ngbâ lakue ti sala kusala. A yeke ye so asigigi na yâ atene so lo tene na adisciple ti lo: “I sambela Mveni ti le-kobe ni si Lo to azo ti kusala ti fa le-kobe ti Lo.” (Mat. 9:38) Jésus ahinga la ni so kusala ti lo ayeke ti fa tene, na lo leke na bê ti lo ti zia si ye oko pepe agboto lo yongoro na ye so.
4 Ti e a yeke tongana nyen? Laso, a yeke kota ye mingi ahon ti fa tene na ti ngbâ dä. Na ando mingi ti sese, ale-kobe ti ayaka ni abe alingbi na fango ni. Même na yâ akodoro so, na bango ni, a fa tene dä alingbi awe, azo saki mingi ayeke wara batême ngu na ngu. Teti so nda ti bungbi ti aye ti sese so ayeke ga hio, aye ‘mingi’ ayeke dä ti sala na yâ ‘kusala ti Seigneur.’ (1 aCor. 15:58) Ahon tanga ti angoi kue, a yeke kota ye ti tene e sala angangu mingi ti kangbi tokua ti Royaume.
5 Zia e kangbi na wâ nzo tene, atä da na da, wala na ndo kue ti territoire so a yeke wara azo dä. Na mungo mbage ti e kue na fango tene, tongana ti so e lingbi ti sala, e yeke fa so e yeke zia Royaume na kozo ndo na yâ fini ti e. (Mat. 6:33) Tongana e yeke fa tene na dutingo be-ta-zo nga na ngbango dä, fade e yeke wara ngia dä mingi.