E yeke ti Jéhovah

1. Ngbanga ti nyen la e lingbi ti tene so ye kue ayeke ti Jéhovah? (Bâ foto so ayeke na tongo nda ti article so.)

YE KUE ayeke ti Jéhovah. ‘Yayu, même yayu so ayo kâ, sese nga na aye kue so ayeke na ndö ni’ ayeke ti lo (Deut. 10:14; Apoc. 4:11). Ndali ti so Jéhovah la acréé azo, e kue e yeke ti lo (Ps. 100:3). Me na yâ ti mbaï ti azo, Nzapa afa so ambeni zo ayeke ti lo na mbeni lege so ayeke nde.

2. Ti gue oko na Bible, azo wa la ayeke ti Jéhovah na mbeni lege so ayeke nde?

² Na tapande, Psaume 135 asara tënë ti awakua ti Jéhovah so ayeke be-ta-zo na Israël ti giriri tongana “ye ti lo so lo zia ni nde.” (Ps. 135:4). Nga, mbeti ti Osée atene kozo so ambeni zo so ayeke azo ti Israël ape ayeke ga azo ti Jéhovah (Os. 2:23). Prophétie ti Osée aga tâ tënë na ngoi so Jéhovah akomanse ti soro azo so ayeke aJuif ape ti komande legeoko na Christ (Kus. 10:45; aRom. 9:23-26). Azo so a soro ala na lege ti yingo vulu ti gue na yayu ayeke mbeni “mara so ayeke nzoni-kue”. Ala yeke ‘azo so ayeke ye ti Nzapa wani’. (1 Pi. 2:9, 10). Me ti mingi ti aChrétien so ayeke be-ta-zo laso, so ayeke na beku ti wara fini na ndö ti sese, ayeke tongana nyen? Jéhovah airi nga ala “azo” ti lo nga “azo so [lo] soro ala”.​—És. 65:22.

3. (a) Laso, azo wa la ayeke na mbeni songo na Jéhovah so ayeke nde? (b) Nyen la e yeke bâ ni na yâ ti article so?

³ Laso, mbeni “kete kundu ti ataba” so ayeke na beku ti gue na yayu nga na “ambeni taba” so ayeke na beku ti wara fini na ndö ti sese ayeke voro Jéhovah legeoko tongana “kundu oko ti ataba”. (Luc 12:32; Jean 10:16). E ye biani ti kiri singila na Jéhovah mingi ndali ti so lo mû lege na e ti duti na mbeni songo na lo so ayeke nde. Na yâ ti article so, e yeke bâ alege nde nde so e lingbi ti fa na Jéhovah so e kiri singila na lo ndali ti kota pasa so.

E MÛ FINI TI E NA JÉHOVAH

4. Tongana nyen la e lingbi ti kiri singila na Jéhovah ndali ti so lo mû lege na e ti duti na songo na lo? Tongana nyen la Jésus asara mara ti ye so?

⁴ E fa so e kiri singila na Jéhovah na lege so e mû fini ti e na lo na e wara batême. Tongaso, azo kue alingbi ti bâ so e yeke ti Jéhovah nga e ye ti mä yanga ti lo (aHéb. 12:9). Jésus asara mara ti ye so na ngoi so lo wara batême. Atâa so lo yeke na yâ ti mara so azo ni amû terê ti ala na Jéhovah awe, lo fa terê ti lo na Jéhovah ti sara ye so bê ti lo aye. A yeke lani mo bâ mo tene lo tene na Jéhovah: “Nzapa ti mbi, mbi ye mingi ti sara ye so bê ti mo aye.”​—Ps. 40:7, 8, kete tënë na gbe ni.

5, 6. (a) Jéhovah atene nyen na ngoi so Jésus awara batême? (b) Mû mbeni tapande ti fa ngbanga ti nyen la Jéhovah abâ na nene ni so e mû terê ti e na lo, atâa so ye kue ayeke ti lo.

⁵ Na ngoi so Jésus awara batême, a sara Jéhovah tongana nyen? Bible atene: “Tongana a batize Jésus awe, hio lo sigi na gbe ti ngu ni. Bâ, yayu azi, na lo bâ yingo ti Nzapa so ayeke descend na ndö ti lo tongana mbeni kolokoto. Nga, mbeni go asara tënë na yayu, atene: ‘So ayeke Molenge ti mbi, lo so mbi ndoye lo mingi, lo so bê ti mbi anzere na lo mingi.’” (Mat. 3:16, 17). Jésus ayeke lani ti Nzapa awe. Me a nzere na Jéhovah so Jésus aye ti mû fini ti lo ti sara gï na lo oko. A nzere nga na Jéhovah tongana e mû terê ti e na lo, na lo yeke ne e na lege so lo sara tufa na ndö ti e.​—Ps. 149:4.

⁶ Zia e mû mbeni tapande. Imaginé so mbeni koli alu gbâ ti nzo na yaka ti lo. Mbeni lâ, molenge ti lo ti wali ague afâ mbeni nzo ni lo mû ni na lo tongana cadeau. Nzo ni ayeke ti babâ ni ape? Tongana nyen la molenge ni alingbi ti mû na lo mbeni ye so ayeke ti lo awe? Mbeni babâ ti ndoye ayeke pensé même na mara ti ahundango ndo so ape. Me a yeke nzere na lo ti mû cadeau ni so afa so molenge ti lo aye lo. Biani, lo yeke bâ ni na nene ni mingi ahon tanga ti anzo kue ti yaka ti lo. A nzere nga na Jéhovah mingi tongana e mû terê ti e na lo na bê ti e wani ti sara gï na lo oko.​—Ex. 34:14.

7. Tongana nyen la Malachie amû maboko na e ti hinga bibe ti Jéhovah na ndö ti azo so ayeke sara na lo na bê ti ala wani?

⁷ Diko Malachie 3:16. Tongana ade mo mû terê ti mo na Jéhovah ape nga ade mo wara batême ape, gbu li ti mo na ndö ti ndani so a yeke kota ye ti sara ni. A yeke tâ tënë so, ngbene ye so a mû ngo ti mo, mo yeke ti Jéhovah. Me tara ti bâ tongana nyen la mo yeke zia ngia na bê ti Jéhovah tongana mo mû terê ti mo na lo na mo sara ye so lo ye ndali ti so mo hinga so lo yeke Kota Gbia ti dunia kue (aProv. 23:15). Jéhovah ahinga azo so asara na lo na bê ti ala wani, na lo sû iri ti ala na yâ ti “buku ti dango bê” ti lo.

8, 9. Nyen la Jéhovah ahunda na azo so a sû iri ti ala na yâ ti “buku ti dango bê” ti lo?

⁸ Tongana e ye ti tene iri ti e angbâ na yâ ti “buku ti dango bê” ti Jéhovah, a lingbi e sara ambeni ye. Malachie atene so mbilimbili ye so e doit ti sara ayeke ti ‘kpe mbeto ti Jéhovah na ti gbu li na ndö ti iri ti lo.’ Tongana e voro mbeni zo wala mbeni ye nde, a yeke zi iri ti e na yâ ti buku ti Jéhovah.​—Ex. 32:33; Ps. 69:28.

⁹ Tongaso, gï ti mû zendo ti sara ye so Jéhovah aye na ti wara batême alingbi ape. E sara aye so gï fani oko, me e yeke ngbâ ti voro Jéhovah na yâ ti fini ti e kue. Lâ na lâ, na yâ ti fini ti e kue, a lingbi asarango ye ti e afa so e mä yanga ti Jéhovah.​—1 Pi. 4:1, 2.

E KE ANZARA TI DUNIA SO

10. Azo so ayeke biani ti Jéhovah adoit ti sara ye tongana nyen?

¹⁰ Article so ahon asara tënë na ndö ti mbaï ti Caïn, ti Salomon nga na ti azo ti Israël so ayeke na yâ ti Bible. Ala kue atene lani so ala yeke voro Jéhovah, me ala voro gï lo oko ape. Atapande so afa na e polele so azo so ayeke biani ti Jéhovah adoit ti ye aye so ayeke nzoni na ala doit ti ke aye so ayeke sioni (aRom. 12:9). A yeke na lege ni so, na peko ti so Malachie asara tënë ti “buku ti dango bê”, Jéhovah asara tënë ti “kangbi so ayeke na popo ti zo ti mbilimbili na zo ti sioni, na kangbi so ayeke na popo ti zo so ayeke sara kua na Nzapa na zo so ayeke sara kua na lo pëpe.”​—Mal. 3:18.

11. Ngbanga ti nyen la a lingbi azo abâ polele so e yeke sara gï na Jéhovah oko?

¹¹ Ge nga, mbeni lege ayeke dä so e lingbi ti fa so e kiri singila na Jéhovah ndali ti so lo soro e ti duti azo ti lo. A lingbi “azo kue abâ polele” maïngo ti e na lege ti yingo (1 Tim. 4:15; Mat. 5:16). Hunda terê ti mo: ‘Azo abâ polele so mbi yeke lakue be-ta-zo na Jéhovah? Mbi yeke gi alege ti fa na azo so mbi yeke Témoin ti Jéhovah?’ Na peko ti so Jéhovah asoro e ti ga azo ti lo, tongana kamene asara e ti fa na azo so e yeke ti lo, vundu ayeke sara lo mingi.​—Ps. 119:46; diko Marc 8:38.

12, 13. Tongana nyen la ambeni zo asara si a yeke ngangu ti tene a hinga ala tongana aTémoin ti Jéhovah?

¹² Ye ti mawa ni ayeke so ambeni zo asara si a yeke ngangu ti bâ “kangbi so ayeke na popo ti zo so ayeke sara kua na Nzapa na zo so ayeke sara kua na lo pëpe” na lege so ala yeke sara ye ague oko na “yingo ti dunia so”. (1 aCor. 2:12). Yingo so apusu azo ti sara ye alingbi na ‘anzara ti mitele ti ala’. (aÉph. 2:3). Na tapande, atâa awango kue so a mû na ndö ti yungo bongo nga na lekengo terê pendere, ambeni zo angbâ ti ye yungo bongo nga na lekengo terê pendere so ayeke na lege ni ape. Ala yeke yü abongo so agbu zo nga so a yeke bâ zo na yâ ni, même na ngoi so ala ga na abungbi. Ala yeke leke lakue kuä ti li ti ala na mbeni fason so ayeke na lege ni ape (1 Tim. 2:9, 10). Ye so asara si, tongana ala yeke na popo ti gbâ ti azo, a lingbi ti duti ngangu ti hinga zo wa la ayeke ti Jéhovah nga zo wa la ayeke “kamarade ti dunia so”.​—Jacq. 4:4.

¹³ Na yâ ti ambeni ye, ade ambeni Témoin ake kue ape asarango ye ti dunia so. Fason ti dodo ti ala nga na sarango ye ti ala na ngoi ti angia ayeke nde na ti aChrétien. Na ndö ti Internet, ala zia afoto ti ala wani nga na acommentaire so afa so ala yeke na apensé ti azo ti mitele. Peut-être ala sara pëpe mbeni kota siokpari so a lingbi bungbi asuku na ala wala a bi ala na gigi ndali ni, me ala lingbi ti sara sioni na aita so agi ti bata anzoni sarango ye na popo ti azo ti Jéhovah.​—Diko 1 Pierre 2:11, 12.

14. Nyen la ayeke kota ye ti tene e sara tongana e ye ti bata songo ti e na Jéhovah so ayeke nde?

¹⁴ Aye kue so ayeke na yâ ti dunia so ayeke ti pusu zo ti zia li ti lo gï na ndö ti “nzara ti mitele, nzara ti lê na sarango baba ti akungba so zo ayeke na ni”. (1 Jean 2:16). Me ndali ti so e yeke ti Jéhovah, a wa e ti “ke asarango ye so ayeke nde na ye so Nzapa aye, ti ke anzara ti dunia so; a fa na e ti tene na lege ti dutingo ti e, e bata bibe ti e nzoni, e sara ye ti mbilimbili nga e voro Nzapa na bê ti e kue na yâ ti aye ti ngoi ti laso”. (Tite 2:12). Sarango tënë ti e, tengo ye nga na nyongo ye ti e, yungo bongo nga na lekengo terê ti e pendere, fason ti sarango kua ti e nga na aye kue so e yeke sara adoit ti fa na azo so e yeke sara gï na Jéhovah oko awe.​—Diko 1 aCorinthien 10:31, 32.

E ‘NDOYE TERÊ NGANGU NA POPO TI E’

15. Ngbanga ti nyen la a lingbi e sara ye na amba ti e aChrétien na ndoye?

¹⁵ E yeke fa so e bâ na nene ni songo ti e na Jéhovah so ayeke nde na lege ti sarango ye ti e na mbage ti amba ti e aChrétien. Ala nga kue ayeke ti Jéhovah. Tongana e girisa ni lâ oko ape, e yeke sara ye lakue na aita ti e na nzoni bê nga na ndoye (1 aThes. 5:15). Jésus atene na adisciple ti lo, atene: “A yeke na lege ti ye so si azo kue ayeke hinga ande so ala yeke adisciple ti mbi: tongana ala yeke na ndoye na popo ti ala.”​—Jean 13:35.

16. Tapande wa na yâ ti Ndia ti Moïse afa bibe ti Jéhovah na ndö ti azo ti lo?

¹⁶ Ti fa tongana nyen la a lingbi e sara ye na amba ti e na yâ ti congrégation na ndoye, zia e gbu li ti e na ndö ti ye so. A zia lani akungba so ayeke na yâ ti temple ti Jéhovah nde ti sara gï na kua ti vorongo na Nzapa. Ndia ti Moïse afa anzene nzene ye na ndö ti fason so a yeke sara na ye na akungba so, nga azo so asara ye ague nde na ni, a yeke fâ ala (Nom. 1:50, 51). Tongana Jéhovah aye si a bata akungba so a yeke sara na kua ti voro na lo so nzoni, so ayeke na fini ape so, lo yeke bata nzoni mingi awakua be-ta-zo ti lo so amû terê ti ala na lo so lo soro ala ti duti azo ti lo. Mbeni lâ na ngoi so Jéhovah ayeke sara tënë na azo ti lo, lo tene: “Zo so andu ala andu vuko lê ti mbi.”​—Zach. 2:8.

17. Nyen la Jéhovah ayeke “dengi mê ti lo, lo yeke mä” ni?

¹⁷ Malachie afa so Jéhovah ayeke “dengi mê ti lo, lo yeke mä” azo ti lo na ngoi so ala na amba ti ala ayeke sara lisoro (Mal. 3:16). Biani, “Jéhovah ahinga ala so ayeke ti lo”. (2 Tim. 2:19). Lo hinga nzoni mingi aye kue so e sara na atënë kue so e tene (aHéb. 4:13). Tongana e sara ye na nzoni bê na amba ti e aChrétien ape, Jéhovah ayeke bâ ni. Tongana e yamba amba ti e aChrétien, e mû ye na ala, e pardonné ala nga e sara ye na nzoni bê na ala, e lingbi ti duti na kite ape so Jéhovah abâ nga ni.​—aHéb. 13:16; 1 Pi. 4:8, 9.

“JÉHOVAH AYEKE KE AZO TI LO PËPE”

18. Tongana nyen la e lingbi ti kiri singila ndali ti pasa so e yeke na ni ti duti azo ti Jéhovah?

¹⁸ Kite ayeke dä ape so e ye mingi ti kiri singila na Jéhovah ndali ti pasa so e yeke na ni ti duti azo ti lo. E bâ so a yeke lani na lege ti ndara ti yeda so e yeke ti lo na lege so e mû terê ti e na lo na bê ti e wani. Atâa so e yeke “na popo ti azo ti ngoi so, so sarango ye ti ala aba bango na ayeke kirikiri mingi”, e ye ti tene azo abâ so e yeke ‘na sioni oko pëpe nga tënë oko ayeke na li ti e pëpe, e yeke su ti e tongana aye ti zango lumière na yâ ti dunia”. (aPhil. 2:15). E ke na bê oko aye ti sioni (Jacq. 4:7). E ye amba ti e aChrétien nga e ne ala, e hinga so ala nga kue ayeke ti Jéhovah.​—aRom. 12:10.

19. Tongana nyen la Jéhovah ayeke futa azo so ayeke ti lo?

¹⁹ Bible atene: “Jéhovah ayeke ke azo ti lo pëpe.” (Ps. 94:14). E lingbi ti zia bê ti e na tënë so. Atâa nyen la asi, Jéhovah ayeke ngbâ na e. Même tongana e kui, lo yeke girisa e ape (aRom. 8:38, 39). “Atâa e kui, e kui teti Jéhovah. Tongaso, atâa e yeke na fini wala atâa e kui, e yeke ti Jéhovah.” (aRom. 14:8). E yeke ku kungo ngoi so Jéhovah ayeke kiri na akamarade ti lo so ayeke be-ta-zo so akui na fini (Mat. 22:32). Même laso e wara anzoni ye mingi. Tongana ti so Bible atene, “ngia ayeke na mara so Jéhovah ayeke Nzapa ti lo, azo so lo soro ala ti ga ye ti lo wani.”​—Ps. 33:12.