Mbi soro ti sara na Jéhovah na gigi ti mbi kue

Na tongo nda ti ngu 1942, kete na peko ti so États-Unis alï na yâ ti Use Bira so Amû Sese Kue, mbi yeke na yâ ti ngu oku ti mbi na Université, na a ngbâ gi na mbi ambeni nze tongaso ti tene mbi wara diplôme ti mbi ti gango ingénieur ti da. Mbi na ambeni mba ti mbi ti université ni use la e lango ndo oko. Mbeni lâ, mbeni oko atene na mbi ti gue ti sara lisoro na ambeni zo so ayeke ga ka ti bâ ambeni molenge-koli so alango ti ala na mbage ti gbe ni. Na ngoi so mbi gue, mbi tingbi na John Brehmer (so a iri nga lo Johnny), mbeni Témoin ti Jéhovah. Bê ti mbi adö ti bâ so lo kiri tënë na ahundango ndo kue gi na lege ti Bible. Ye so asara si mbi yeda ti tene Johnny aga amanda Bible na mbi lakue. Na nda ni, mbi nga kue mbi fa tënë na tere ti lo tongana mbeni ye akanga lege na mbi ape.

Babâ ti Johnny, so iri ti lo ayeke Otto, aga lani Témoin ti Jéhovah na ngoi so lo yeke président (PDG) ti mbeni banque na Walnut, mbeni gbata ti Iowa. Pakara Otto ake kamba ti kua ti lo ni ti mû ngoi mingi na kua ti fango tënë. Nzoni tapande ti lo nga na ti sewa ti lo apusu mbi ti mû nga mbeni kota desizion na yâ ti gigi ti mbi.

NGOI TI MUNGO DESIZION

Mbeni lâ, doyen ti université ni atene na mbi so anote ti mbi ayeke kiri kiringo na gbe ni, na so tongana mbi ye ti wara diplôme ti mbi, a lingbi mbi sara effort. Mbi dabe ti mbi so lani mbi sambela Jéhovah Nzapa mingi ndali ni ti tene lo mû na mbi maboko. Gi kete na pekoni, a tene na mbi so mbeni professeur ti mbi aye ti bâ mbi. Lo tene na mbi so lo wara mbeni mbeti so na yâ ni a hunda ti wara mbeni ingénieur. Ni la, sân ti hunda mbi, lo tene na azo ni so mbi yeke yeda na kua ni. Mbi kiri singila na professeur ni, me mbi fa na lo ndani so mbi soro ti mbi ti sara gi kua ti Jéhovah na gigi ti mbi kue. A si na 17 juin 1942, mbi wara batême nga tâ gi na pekoni mbi mû kua ti pionnier, so ti tene mbi yeke fa tënë angbonga mingi.

Na hunzingo ti ngu 1942, mbi wara mbeni mbeti so a hunda na mbi ti sara kua ti turugu. Mbi gue na bureau ti mungo azo na kua ti turugu ni, mbi fa na ala so yingo-ti-hinga ti mbi amû lege na mbi ape ti sara bira. Mbi mû na ala ambeni mbeti so aprofesseur ti mbi asara na ndo ti mbi so na yâ ni ala fa anzoni sarango ye ti mbi nga so na yâ ni ala fa so mbi yeke sara kua ti mbi ti ingénieur tâ na lege ni. Atâa anzoni tënë so kue, a mû na mbi amende so ahon 5 000 000FCFA, nga a tene mbi yeke sara kanga ti ngu oku na da ti kanga ti Leavenworth, na Kansas, na États-Unis.

GIGI TI MBI NA DA TI KANGA

Amaseka Témoin ahon 230 la si a bi ala na da ti kanga ti Leavenworth. Na kanga ni so, kua ti azo ti kanga ni ayeke ti dë yaka. Na fango yaka ni, a yeke zia gbâ ti aturugu ti bâ ndo na ndo ti e. Ambeni turugu ni ahinga so e aTémoin ti Jéhovah e yeke mû mbage ti e na bira ape, nga ala yeda na bango ndo ti e ni.

Mbeni kete wungo ti aturugu ni amû lani maboko na e ti tene e sara lakue abungbi ti e. Ala sara nga si e wara ambeni mbeti ti e. Kota wayinda ti da ti kanga ni asara même na e abonnement ti Réveillez-vous! (so ândö a iri ni Consolation).

A ZI MBI NA DA TI KANGA NA MBI GA MISSIONNAIRE

Na peko ti ngu ota so mbi sara na da ti kanga, a zi mbi. A yeke lani na 16 février 1946, anze kete na peko ti so Use Bira so Amû Sese Kue ahunzi. Gi kete na pekoni, mbi kiri mbi mû kua ti pionnier ni. A tokua mbi gi na Leavenworth, na Kansas ni. Tënë ni asara mbi mbeto ngbanga ti so kâ na Leavenworth ni, azo ni aye tënë ti aTémoin ti Jéhovah oko ape. Même ti wara kua ti nginza ti bata na tere ti mbi wani nga na da ti lango kue ayeke lani ngangu.

Mbi dabe ti mbi na mbeni ngoi so mbi yeke fa tënë da na da, mbi tingbi na mbeni zo ti batango da ti kanga so lani mbi yeke dä so. Lo dekongo, lo tene: “Sigigi na yâ ti gbagba ti mbi!” So mbi bâ mbeni ngbongboro keke ti pikango na ballon ti maboko ayeke na tïtî lo, mbeto agbu mbi, mbi hon hio. Na mbeni da ni nde, mbeni wali atene na mbi ti ku kete na lo kanga yanga-da ni. Mbi ku ngbii, mo ye ti bâ! a zi fenêtre na nduzu kâ a tuku mbeni saleté ngu na tere ti mbi. Atâa aye so kue, Jéhovah airi tënë nzoni na ndo ti kua ti fango tënë ti mbi. Ambeni ngu na pekoni, mbi mä a tene ambeni zo so mbi mû na ala ambeti lani aga aTémoin ti Jéhovah.

Na ngu 1943, a zia na sese mbeni ekole ndali ti amissionnaire na New York. A tisa mbi na ekole ni, na mbi wara diplôme ti mbi na klase bale-oko ni na 8 février 1948. A iri ni Ekole ti Galaad. Na peko ti so mbi wara diplôme ti mbi, a tokua mbi na Côte d’Or, so laso a iri ni Ghana.

Tongana mbi si na Côte d’Or ni, kua ti mbi ayeke ti fa tënë na akota zo ti yâ ti gouvernement ni nga na amunzu-poto. Na samedi nga na dimanche, mbi yeke sara bungbi na mbeni congrégation ti aTémoin ti Jéhovah nga mbi na aita ti congrégation ni e yeke fa tënë da na da. Mbi yeke gue nga lani ti bâ aita so alango ayô na gbata so mbi yeke dä ti mû maboko na ala na kua ti fango tënë. Na mbeni mbage, mbi sara lani kua ti surveillant so ayeke gue na ando nde nde ti bâ acongrégation so ayeke nduru na Côte d’Ivoire.

So mbi sara kua na ando ni so, mbi manda ti sara ye tongana ti azo ti Afrika ni, so ti tene mbi yeke lango na yâ ti ada ti popoto, mbi yeke te kobe gi na maboko nga mbi yeke sara kabinë tongana ti so azo ti Israël asara ândö (Deutéronome 23:12-14). So mbi na ambeni mba ti mbi amissionnaire ni e sara tongaso, a sara si azo ni atene nzoni tënë ti e. Ambeni wali ti akota zo ti kodoro ni ayeda ti tene e manda Bible na ala. A sara si na ngoi so a gi ti kanga lege na e nga a mû yanga ti tene a mingo ngangu ti visa ti e ni, awali ni adö sese na akoli ti ala ni ngangu juska tënë ni alï ngu.

Tongana ti so a si na mingi ti amissionnaire ti Afrika, palu asara nga mbi. Tere ti mbi adö na dê ngangu, na mbi sara tënë kirikiri. A si nga so mbi yeke gbu gbe ti yanga ti mbi ti tene a dö ape. Me atâa so kue, kua ti mbi ni angbâ gi ti nzere na mbi.

Na yâ ti akozo ngu osio so mbi sara na Afrika, mbi yeke tokua ka lani mbeti na Eva Hallquist. Mbi hinga lo kozo na États-Unis. Mbi mä so lo wara diplôme ti lo ti Ekole ti Galaad na klase 21 ni na 19 juillet 1953, na ngoi ti mbeni kota bungbi ti aTémoin ti Jéhovah na stade ti Yankee na New York. Mbi mä tere na mbeni capitaine ti bateau ti sara kua na yâ ti bateau ni tongaso si lo yô mbi senge ti gue na mbi na États-Unis.

Na mbeni ngoi pupu asara ngangu, na bateau ni ayengi mingi. Me na peko ti lango 22 mbi si na New York ni. Mbi gue mbi wara Eva na kota ndokua ti aTémoin ti Jéhovah na Brooklyn. E gue na li ti mbeni da so kâ zo alingbi ti bâ kota ngu ti New York so abateau ayeke na ndo ni nga na akota da ni. A yeke na ndo so la si mbi hunda lo na mariage. Na peko ti mariage ti e, mbi na Eva e kiri na Côte d’Or ti sara kua ti e ti missionnaire kâ.

BANGO LEGE TI AFAMI

Na peko ti so mbi na Eva e sara angu mingi na Afrika, mama ti mbi atokua na mbi mbeni lettre so na yâ ni lo tene so tere ti babâ ti mbi ason sioni; lo yeke na cancer. Na ngoi so a yeda ti tene e kaï kua ti e ni teti mbeni ngoi, mbi na Eva e kiri na États-Unis. Tere ti babâ ti mbi ni alingbi ape, a ninga ape lo kui.

Na pekoni, e kiri na Ghana. Ngu osio na pekoni, e kiri e mä a tene seni ti mama ti mbi ayeke nzoni ape. Ni la ambeni kamarade ti e awa e ti kiri na kodoro ti bâ lege ti mama. A yeke lani mbeni ngangu desizion mingi na e ti mungo ni. Mbi sara ngu 15 na yâ ti kua ti missionnaire, ngu 11 ni ayeke ti so mbi na Eva la e sara, na fadeso e yeke kiri na États-Unis.

Teti angu mingi, e yeke bâ lege ti mama, nga e mû maboko na lo ti gue na bungbi tongana lo yeke na ngangu kete. Me na 17 janvier 1976, lo kui tongana lo yeke na ngu 86. Me angu gumbaya na pekoni, mbeni kota kpale ni asi. Kpale ni ayeke so a tene Eva ayeke na kobela ti cancer. E pika li ti e mbage na mbage ti kaï na kobela ti lo ni me gbä, na nda ni lo kui na 4 juin 1985, na ngoi so lo yeke na ngu 70.

MBI WARA NGIA NA YÂ TI KUA TI MBI

Na ngu 1988, a tisa mbi na matanga ti mungo fini da ti Béthel ti Ghana na Nzapa. Mbi yeke girisa ngoi ni so lâ oko ape! A sara lani ngu 40 awe so mbi si kpâ na Ghana na peko ti so mbi hunzi ekole ti Galaad, na wungo ti aTémoin ayeke lani gi ngbangbo na ndo ni tongaso. Me na 1988 ni, ala si 34 000. Ti fadeso, wungo ti ala asi nduru na 114 000.

Angu use na pekoni, mbi na Betty Miller, mbeni kota kamarade ti Eva, e sara mariage na 6 août 1990. E use kue e soro ti ngbâ ti sara gi kua ti Jéhovah na yâ ti gigi ti e. E yeke ku kungo ngoi so e yeke kiri ti bâ tere na a-âta ti e, ababâ na mama ti e nga na Eva na yâ ti Paradis na ngoi so a yeke zingo akuâ.​—Kusala 24:15.

Tongana mbi pensé na gbâ ti pasa so mbi wara na yâ ti angu 70 so mbi sara na yâ ti kua ti Jéhovah, ngu ti lê ti mbi aga. Mbi yeke kiri ka singila mingi na Nzapa so lo mû na mbi ndara lani ti soro ti sara na lo na gigi ti mbi kue. Atâa so mbi hon ngu 90 awe, Jéhovah, Kota ingénieur ti dunia kue, angbâ lakue ti mû na mbi ngangu ti ngbâ ti sara kua ti lo.