Bâ mbeni nzoni kode ti fango ye

Mo yeda so Jésus la ayeke kota Wafango ye so ahon tanga ti azo kue? Peut-être mo manda ambeni kode ti fango ye ti lo, na tapande lo yeke sara kua na ahundango ndo nga na atoli. Me, mo hinga so fani mingi na yâ ti fango ye ti lo, lo yeke sara kua na mbeni kode ti fango ye?

Azo mingi ayeke sara kua na kode ni so na ngoi so ala yeke sara tënë. Peut-être fani mingi mo nga kue mo yeke sara kua na ni na yâ ti sarango tënë ti mo sân ti pensé dä. Mo lingbi ti tene: “Ala tene so alê ti keke ni kue abe awe; me, ala so angbâ ti kpengba ngangu.” Wala: “Na kete ti lo, lo yeke kpô nga lo yeke zo ti kamene, me fadeso lo yeke sara lisoro nzoni mingi.”

Na yâ ti atapande tongana ati so, kozoni mo fa mbeni ye wala mbeni bibe, na pekoni mo fa mbeni tënë so ague nde na kozoni so na sarango kusala na atënë tongana me, ye oko wala nde na so. Na ngoi so mo sara tënë tongaso, atënë ni ayeke mä tere nga alingbi ti mû maboko na azo ti hinga ye so mo ye ti tene.

Même tongana azo ayeke sara kua na kode so mingi pëpe na yâ ti ambeni yanga ti kodoro wala na ambeni ndo, a yeke nzoni e hinga so kode so ayeke nzoni mingi. Ngbanga ti nyen? Ngbanga ti so a yeke mingi na yâ ti Bible. Fani mingi Jésus sara kua na kode so. Bâ ambeni tapande ni: “Azo azia wâ na lampe ti zia ni na gbe ti sakpa pëpe, me ti zia ni na ndo ti mbeni ye ti yongo lampe.” “Mbi ga ti futi [Ndia] pëpe, me ti sara si [Ndia] aga tâ tënë.” “Ala mä awe so a tene: ‘Mo gi wali wala koli nde pëpe.’ Me mbi tene na ala: Zo kue so angbâ ti bâ mbeni wali . . . ” “Ala mä so a tene: ‘Lê na place ti lê na pembe na place ti pembe.’ Me mbi tene na ala: Mo ke pëpe zo so ayeke sioni. Me zo so apika ngbangba ti mo ti mbage ti koli, mo dengi na lo ti mbage ti wali ni nga.”​—Mat. 5:15, 17, 27, 28, 38, 39.

A yeke wara nga mara ti akode ni so na yâ ti ambeni mbeti ti Bible. A lingbi ti mû maboko na mo ti hinga mbeni ye wala ti fa na mo mbeni fason ti sarango ye so ayeke nzoni mingi. Tongana mo yeke babâ wala mama, gbu li na ndo ti tapande ni so: “Ti ala ababâ, ala son bê ti amolenge ti ala pëpe, me ala ngbâ ti bata ala na lege ti sengo ndo nga na awango ti gbotongo mê so alondo na Jéhovah.” (aÉph. 6:4). Tongana bazengele Paul atene gi a lingbi babâ (wala mama) agi ti bata molenge na lege ti sengo ndo so alondo na Nzapa, a yeke duti na lege ni nga a yeke tâ tënë. Me tënë ni asigigi polele mingi na ngoi so lo tene ‘ala son bê ti ala pëpe, me ala ngbâ ti bata ala na lege ti awango ti gbotongo mê so alondo na Jéhovah.’

Na yâ ti oko chapitre so, Paul atene: “E yeke tiri na mitele na mênë pëpe, me e yeke tiri . . . na asioni yingo so ayeke na yayu.” (aÉph. 6:12). Kode so Paul asara na tënë so amû maboko na mo ti hinga so tiri so ayeke kete tiri ape. Mo yeke tiri na azo pëpe; me na asioni yingo.

BÂ NZONI NA LEGE TI NZONI KODE TI FANGO YE SO

Na yâ ti oko mbeti ti Paul na aÉphésien so, mo yeke wara gbâ ti aversê so na yâ ni lo sara kusala na kode so. Tongana e gbu li na ndo ni, a yeke mû maboko na e ti hinga tënë so Paul aye ti tene nzoni mingi nga ti hinga ye so a yeke nzoni e sara.

Mo yeke bâ so a yeke nzoni mingi ti sara kusala na encadré so afa aversê so na yâ ni Paul asara kusala na kode so na chapitre 4 na 5 ti aÉphésien. Na ngoi so mo yeke bâ kode so oko na oko, gbu li na ndo ti fini ti mo wani. Hunda tere ti mo: ‘Ti tâ tënë ni, bango ndo ti mbi ayeke so wa? Tongana mbi yeke na yâ ti ye so wala mara ni, mbi yeke sara ye tongana nyen? Azo ayeke tene so mbi sara ye alingbi na kozo bibe ni wala use ni?’ Tongana mo bâ so mbeni kode ni afa na mo so mbeni ye ayeke dä so a lingbi mo changé, gi ti changé ni. Zia si kode ni so amû maboko na mo.

Mo lingbi nga ti sara kua na encadré so na ngoi ti vorongo Nzapa na yâ ti sewa. Kozoni, amembre ti sewa ni kue alingbi ti diko aversê ni. Na pekoni, mbeni zo oko adiko kozo mbage ti versê ni, lo mû lege na tanga ti azo ti sewa ni ti gi ti dabe ti ala na kota tënë so asigigi na yâ ti use mbage ni. Ye so ayeke mû lege na azo ti sewa ni ti sara pendere lisoro na ndo ti lege so mo lingbi ti sara kua nzoni na use mbage ti versê ni. Biani, ti gbu li na ndo ti aversê tongana ati so alingbi ti mû maboko na molenge nga na kota zo ti gi ti sara ye tongana tâ Chrétien na yâ ti sewa nga na ndo kue.

Tongana mo bâ akode ti fango ye so na nene ni mingi, mo yeke hinga ni nzoni mingi na yâ ti Bible nga a yeke mû maboko na mo mingi na fango tënë. Na tapande, mo lingbi ti tene na mbeni zo so mo yeke fa tënë na lo: “Azo mingi atene so azo kue ayeke na mbeni âme so ayeke kui ape, me bâ tënë so Mbeti ti Nzapa atene ge.” Wala na ngoi so mo yeke sara étude na mbeni zo, mo lingbi ti hunda lo, mo tene: “Mingi ti azo na ndo so atene so Nzapa na Jésus ayeke gi zo oko; me Bible atene ti lo nyen? Mo tene ti mo nyen?”

Biani, na yâ ti Bible e yeke wara gbâ ti kode ti fango ye so, so alingbi ti mû maboko na e ti tambela na ndo ti lege so Nzapa afa. E lingbi nga ti sara kua na ni ti mû maboko na azo ti hinga atâ tënë so ayeke na yâ ti Bible.