Mo dabe ti mo na ni?

Mo diko anumero ti Tour ti Ba Ndo so asigigi ade ti ninga pëpe so nzoni? Bâ wala mo lingbi ti kiri tënë na ahundango tënë so ge:

“Ngende ti ngbanga” so a gue lani na bazengele Paul na gbele ni ayeke nyen?

Na Corinthe ti ândö, na kota gara so a iri ni agora, a yeke wara mbeni estrade kâ, wala mbeni ndo so zo ayeke luti dä ti sara tënë na azo, na a yo pëpe na mbeni synagogue. Âmanke ndo ni so la si ayeke ngende ti ngbanga so a gue lani na Paul dä na gbele Gallion, zo ti Rome nga komandâ ti kodoro ti Achaïe.​—1/7, lembeti 13.

Ndali ti nyen Jéhovah ahunda lani na Abraham ti mû molenge ti lo so lo ye lo mingi na sandaga?

A yeke nzoni e girisa pëpe so Nzapa amû lege pëpe na Abraham ti fâ Isaac ti mû na sandaga. Ye so ayeke mbeni tapande so afa tongana nyen Nzapa ayeke nduru ti mû molenge ti lo, Jésus, na sandaga atâa so sarango ni ahunda na lo ti hinga ti kanga bê.​—1/7, lembeti 23.

Tongana nyen la e lingbi ti kpe ti tene tënë kirikiri?

A yeke nzoni e gi ti bâ ye so ayeke na yâ ti bê ti e. Ahon ti kasa ita ti e, ngbanga ti nyen e gi pëpe ti bâ ndani so e yeke kasa lo? Peut-être e yeke kasa lo ti fa so e la e yeke nzoni mingi? Nga tongana e kasa lo, e yeke huru wâ na gbe ti tënë ni.​—15/8, lembeti 21.

Nyen la ayeke si angoi kete kozo na futingo ti dunia so?

Azo ayeke tene ande atene: “Siriri na nzoni duti ayeke dä!” Azo ti amara ayeke futi ande Babylone, Ngangu gbata. A yeke sara ande bira na azo ti Nzapa. Bira ti Harmaguédon ayeke londo, na pekoni a yeke bi Satan na asioni yingo ti lo na yâ ti kota dû so alï mingi.​—15/9, lembeti 4.

Na lege wa so e hinga pëpe lawa la nda ni ayeke ga aga na ye ti nzoni na e?

So e hinga pëpe lawa la nda ni ayeke si ande amû lege na e ti fa ye so ayeke biani na yâ ti bê ti e. A mû lege na e ti zia ngia na bê ti Nzapa. A pusu e ti bi bê ti e mingi na ndo ti e wani pëpe me ti mû fini ti e ti sara na Nzapa nga ti mû maboko na azo ti zia bê ti ala mingi na ndo ti Nzapa nga na Bible. A mû nga lege na e ti zia si atara asara si e ga nzoni ahon ti kozo.​—15/9, lembeti 24-25.

Na lege wa Nzapa apardone asiokpari ti azo so achangé bê ti ala na lo girisa na ndo ni?

Jéhovah atene na azo so lo sara nzoni bê na ala lo tene: ‘Fade Mbi dabe Mbi na siokpari ti ala mbeni pëpe.’ (Jér. 31:34). Lo yeke pardone asiokpari ti ala na lege ti sandaga ti Jésus. Tongana Nzapa apardone asiokpari ti azo, lo yeke girisa na ndo ni na lege so lo yeke dabe ti lo na asiokpari ti ala ni so mbeni pëpe ti tene lo kiri lo punir ala.​—1/10, lembeti 32.

Na Apocalypse 1:16, 20 a sara tënë ti “atongoro mbasambala” so ayeke na yâ ti maboko ti Jésus ti koli. A yeke fä ti azo wa?

A yeke fä ti a-ancien so ayeke aChrétien so a soro ala ti gue na yayu, me tënë so abâ nga tanga ti a-ancien kue na yâ ti acongrégation.​—15/10, lembeti 14.

Na lege wa Jésus asara tere ti lo kete alingbi na tënë so ayeke na Ésaïe 50:4, 5?

Aversê ni afa so zo so ayeke na “yanga so ahinga ti sara tënë” ayeke ‘kiri na peko pëpe.’ Jésus asara lani tere ti lo kete, lo dengi mê nzoni ti mä aye so Babâ ti lo afa na lo. Jésus ayeke lani nduru ti manda ye na mbage ti Jéhovah nga lo bâ tongana nyen Nzapa asara tere ti lo kete nga lo sara nzoni bê na azo so siokpari ayeke na tere ti ala.​—15/11, lembeti 11.

Atënë ti Jésus so ayeke na Matthieu 19:10-12 aye ti fa so azo so asoro ti ngbâ kumbamba awara matabisi ti dutingo kumbamba na lege ti ye ti ndima?

Bible afa pëpe so mbeni Chrétien ayeke wara matabisi ti dutingo kumbamba na lege ti ye ti ndima. Me, lo yeke gi ti wara ni na ngbango kumbamba tongaso si lo sara kua ti Royaume sân ti zia si mbeni ye agboto lê ti lo.​—15/11, lembeti 20.