Mbaï ti fini
Kusala ti e so ayeke nzoni-kue afa na e “kode ti duti nzoni”
Tënë ti Olivier Randriamora
“Mbi hinga lege ti duti na yâ ti yere, mbi hinga lege ti duti na ye mingi. Na yâ ti aye kue nga na angoi kue mbi manda kode ti duti nzoni, atâa yâ ti mbi asi wala mbi duti na nzara . . . Mbi wara ngangu ti sara aye kue ndali ti lo so lo mû ngangu ni na mbi.”—aPhil. 4:12, 13.
ATËNË ti bazengele Paul so amû ngangu na mbi na wali ti mbi, Oly, teti angu mingi. Tongana Paul, e manda “kode ti duti nzoni” na ziango bê kue na ndo ti Jéhovah na ngoi so e yeke sara na lo na Madagascar.
Na ngoi so aTémoin ti Jéhovah akomanse ti manda Bible na mama ti Oly na ngu 1982, mbi na Oly e yeke afiancé. Mbi kue mbi yeda ti manda Bible, na pekoni Oly nga kue asara tongaso. E sara mariage na ngu 1983 na e wara batême na ngu 1985. Hio na pekoni e mû kua ti pionnier auxiliaire. Na juillet ti ngu 1986, e ga apionnier permanent.
Na septembre ti ngu 1987, e komanse kua ti pionnier spécial. Kozo ndo so a tokua e dä ayeke mbeni kete gbata na banga-do ti Madagascar. Congrégation ayeke kâ ape. Na Madagascar, a yeke wara akota mara 18 nga na gbâ ti akete mara. Angobo nga na sarango ye ti azo ni ayeke tâ nde nde mingi. Kota yanga ti kodoro ni ayeke Malgache, me a yeke wara nga gbâ ti akete yanga ti kodoro. Tongaso, e to nda ti manda kete yanga ti kodoro so a yeke tene na yâ ti fini ndo so a tokua e dä. Ye so asara si azo ti ndo ni aye e hio.
Na tongo nda ni, gi e use la e sara abungbi. Lakue na adimanche mbi mû diskur, na hunzingo ni Oly apika maboko. E yeke sara lani ambage nde nde kue ti Ekole ti Kusala ti aChrétien. Tongana Oly ayeke sara devoir, lo sara ye mo bâ mo tene lo na mbeni zo la ayeke sara tënë. Na ngoi ti vizite ti surveillant ti circonscription, lo wa e na nzoni bê ti tene e gbian yâ ti abungbi ni. A nzere lani na e mingi!
E yeke wara nginza so a mû na e nze na nze lakue pëpe ndali ti so poste ayeke sara kua lakue lakue ape. Tongaso, e manda lege ti duti na yâ ti yere. Na mbeni ngoi, e yeke na nginza ti futa bus ti gue na assemblée ti circonscription pëpe, lege ni ayo akilomètre 130. E dabe ti e na nzoni wango so mbeni ita amû lani na e, lo tene: “Ala sara tënë ti akpale ti ala na Jéhovah, ndali ti so a yeke kua ti lo la ala yeke sara so.” E sambela na e mû desizion ti gue na gere. Me, kozoni ti tene e hon, mbeni ita-koli so e ku tere ti e na gango ti lo ape aga amû na e nginza, tâ gi wungo ti nginza so e yeke na bezoin ni ti futa na bus!
KUA TI CIRCONSCRIPTION
Na février ti ngu 1991, a soro mbi ti ga surveillant ti circonscription. Na ngoi ni so, kete groupe ti e akono juska awafango tënë asi 9, ota na popo ni awara batême awe, na mingi ni wungo ti e asi 50 na ngoi ti abungbi. Na pekoni so a fa na mbi kua ti circonscription, a tokua e ti sara kua ti circonscription na Antananarivo, kota gbata ni. Na ngu 1993, a kiri a tokua e na circonscription so ayeke na tö ti kodoro ni. Sarango kodoro kâ ayeke tâ nde mingi na sarango kodoro na kota gbata ni.
Ti si na acongrégation nga na akete groupe, na ambeni ngoi e yeke tambela na gere akilomètre 145 na yâ ti akota gbako so ayeke na ndo ti ahoto. E yeke mû akungba mingi pëpe. Me tongana a hunda ti zia limon so a yeke bâ na lege ti diapo na yâ ti kota diskur ti surveillant, tongana ti so a yeke sara ngoi na ngoi ândö, kungba ti e ni ayeke ne mingi. Oly ayeke yô masini ti diapo ni na mbi yô ti mbi mbeni batterie ti oto.
Mingi ni na yâ ti lango oko e yeke tambela akilomètre 40 ti si na mbeni congrégation. Na guengo ni, e yeke montê ahoto e zu, e fâ angu nga e tambela na yâ ti apopoto. Na ambeni ngoi e lango na tere ti lege, me mingi ni e yeke tara ti gi mbeni kete kodoro ti wara ndo ti lango dä na bï. Na ambeni ngoi e yeke hunda na azo so e hinga nga ala pëpe ti mû na e ndo ti lango dä na bï. Na pekoni so e wara ndo ti lango awe, e yeke gi ti tö kobe. Oly ayeke hunda tawa ti gue na ngu wala lac so ayeke nduru ti tö ngu. Na oko ngoi ni, mbi yeke hunda dö ti dë na keke ti wâ. Akua ni kue amû ngoi mingi. Ngoi na ngoi, e yeke vo kondo si e fâ go ti lo na e zi kuä ti tere ti lo.
Tongana e te ye awe, e gue e tö gbâ ti ngu ti sukula. Na ambeni ngoi e yeke lango na yâ ti cuisine. Tongana ngu apika si li ti da ni ayuru, e yeke lango nduru na tere ti mur ti tene ngu ayuru na tere ti e pëpe.
E yeke gi ka lakue ti fa tënë na azo so e lango na ndo ti ala so. Tongana e si na congrégation ni, nzoni bê ti aita ni nga na bibe ti yambango agene so ala yeke na ni andu bê ti e mingi. Teti so vizite ti e ni anzere na ala mingi, a sara si e girisa na ndo ti apasi so e bâ na lege.
Na ngoi so e lango na yâ ti da ti aita, a nzere na e ti mû maboko na ala na yâ ti akua ti da. Ye so asara si ala wara ngoi ti tene e na ala e fa tënë. E ku pëpe ti tene azo so e lango na ndo ti ala amû na e aye ti nginza wala apendere kobe, aye so ahon ngangu ti ala.
VIZITE NA YÂ TI AKETE GROUPE
E ye mingi ti sara vizite na yâ ti akete groupe. Aita ni ayeke leke mbeni kapa so asi singo na aye ti sarango ni. A yeke ka ngangu ti tene e wara ngoi ti ‘wu tere ti e kete.’ (Marc 6:31). Na mbeni ndo, mbeni ita na wali ti lo atisa na yanga-da ti ala azo 40 so ala yeke manda Bible na ala tongaso si e lingbi ti mû mbage ti e na a-étude ni. Oly na ita-wali ni asara ti ala a-étude ni 20, na mbi na ita-koli ni e sara nga tanga ti a-étude 20 ni. Tongana mbeni étude ni ahunzi, hio e komanse mbeni. Na pekoni, e kaï a-étude ti sara bungbi, na peko ti bungbi ni e kiri ti sara a-étude ni. Mingi ni e yeke na gbâ ti aye so e yeke sara na yâ ti lango ni juska na peko ti ngbonga miombe ti bï.
Na ngoi so e gue ti sara vizite na mbeni groupe nde, e kue e londo na ngbonga miombe ti ndapre ti gue na kete kodoro so ayeke nduru na e. E kue e yü angbene bongo. E yeke tambela a ninga na yâ ti gbako juska e si na kete kodoro ni na midi. Tongana e si kâ awe, e yü anzoni bongo na hio e komanse ti fa tënë da na da. Ada ni ayeke mingi pëpe, me awafango tënë ayeke mingi. Ye so asara si e hunzi territoire ni na yâ ti penze-ngbonga 30. Na pekoni e gue na mbeni kete kodoro ni. Na pekoni so e hunzi fango tënë ni, a lingbi e tambela a yo ti kiri na kodoro. Bê ti e anze kete ndali ti so e mû ngoi mingi ti si na territoire ni, me e sara da na da gi teti ngbonga oko senge. Me, aTémoin ti ndo ni adema tere ti ala pëpe, ala ngbâ lakue na ngia.
Mbeni kete groupe na Taviranambo ayeke nduru na li ti hoto. Kâ, e wara mbeni sewa so ayeke Témoin so alango na yâ ti mbeni da ti chambre oko. Na tere ti da ni mbeni kete da ayeke dä so ala yeke sara bungbi dä. Hio, ita ni so e ga na ndo ti lo so adekongo airi ndo atene: “Aita!” Mbeni zo akiri tënë na ndo ti mbeni hoto ni atene: “O-oo!” Ita ni akiri adekongo atene: “Surveillant ti circonscription aga awe!” Ala kiri tënë atene: “Nzoni oo!” Aita ni asara tënë ni na amba ti ala ti ndo ni so ti gue na ni. Kete na pekoni azo akomanse ti si na place ti bungbi ni. Na ngoi so bungbi ni ato nda ni, azo aga ahon 100.
AKPALE TI VOYAGE
Na ngu 1996, a tokua e na yâ ti mbeni circonscription so ayeke nduru na Antananarivo so ayeke na yâ ti ahoto. Ge e wara ambeni kpale nde. Mo yeke wara pëpe ambeni oto so ayeke voyagé ti gue na ando so ayo na agbata. Mbeni lâ e leke ti gue ti sara vizite na mbeni kete groupe so ayeke na Beankàna (Besakay) so ayo akilomètre 240 na Antananarivo. Na pekoni so e pika patara na mbeni chauffeur, lo yô e na yâ ti mbeni kete oto so ayeke mû lege ni so. Azo 30 ayeke na yâ ti oto ni, ambeni ayeke na li ni nga ambeni ayeke na ngbonda ni.
Tongana ti so a yeke si ka lakue, e hon nga a yo ape oto ni atï panne, na e gue tanga ni na gere. Na pekoni so e tambela a yo teti angbonga mingi, mbeni kota oto asi. Yâ ni asi na akungba nga na azo awe, me chauffeur ni aluti kamême. E montê na e luti gi na nduzu. E gue ngbii e si na mbeni ngu, e lingbi ti fâ ngu ni ape ndali ti so a ngbâ ti leke pont ni. E kiri e gue na gere. Na nda ni, e si na mbeni kete kodoro so ambeni pionnier spécial ayeke dä. Atâa so e leke pëpe ti sara vizite na ndo ni so, e mû ngoi ti fa tënë legeoko na ala na ngoi so e yeke ku ti tene a leke pont ni nga ti wara mbeni oto ti gue.
Yenga oko na pekoni la e ga ti wara mbeni oto ti gue. Gbâ ti akota dû ayeke na ndo ti lege ni. Fani mingi a lingbi e pusu oto ni ti hon na yâ ti angu so agbu e na genou. Mingi ni e yeke tï na pusungo oto ni. Na kota ndapre e si na yâ ti mbeni kete kodoro ni e zu na yâ ti oto ni. E zia kota lege ni, e hon na gere na yâ ti yaka ti loso, ndo so popoto ayeke dä na so ngu asi juska na gbe ti yâ ti e.
A yeke kozo ti tene e sara vizite na ndo ni so la. Tongaso e mû desizion ti fa tënë na ambeni zo so asara kua na yâ ti ayaka ti loso ni nga ti hunda ti tene ala fa na e da ti aTémoin ti ndo ni. Tere ti e anzere mingi tongana e ga ti hinga so azo ni so ayeke aita!
E WA AMBENI ZO TI SARA KUA TI NGOI KUE
A nzere ka na e mingi ti bâ so azo so awara wango ti sara kua ti ngoi kue asara ni. Na tapande, na yâ ti mbeni congrégation so e sara vizite dä, apionnier permanent ayeke gumbaya. E wa pionnier oko oko ti zia na gbele lo ti mû maboko na mbeni wafango tënë ti mû kua ti pionnier permanent. Nze omene na pekoni na ngoi so e ga ti sara vizite, wungo ti apionnier permanent ague juska 22. Aita-wali pionnier use awa ababâ ti ala so ayeke a-ancien ti sara kua ti pionnier. A-ancien ni so awa nga mbeni ancien ni ti sara kua ti pionnier. Kete na pekoni, a soro ota ancien ni ti sara kua ti pionnier spécial. Na pekoni, lo na wali ti lo ato nda ti sara kua ti circonscription. Ka a-ancien use ni so? Mbeni oko aga surveillant ti circonscription nga mbeni ayeke sara kua ti lekengo aDa ti Royaume.
Lâ oko oko e kiri singila na Jéhovah ndali ti mungo maboko so lo mû na e teti so e hinga so e lingbi pëpe ti sara mbeni ye na lege ti ngangu ti e wani. Tâ tënë, na ambeni ngoi e nze nga e tï kobela, me e yeke na ngia tongana e gbu li na ndo ti aye so aga na peko ti kusala ti e. Jéhovah ayeke sara si kusala ti lo ague na li ni. E yeke na ngia ti sara mbeni kete ye na yâ ti kua ti lo laso tongana apionnier spécial. Biani, e manda “kode ti duti nzoni” na ziango bê ti e kue na ndo ti Jéhovah, “lo so lo mû ngangu” na e.
[Tënë na lembeti 6]
E manda “kode ti duti nzoni” na ziango bê ti e kue na ndo ti Jéhovah
[Carte/afoto na lembeti 4]
Madagascar, Kota Bengba Zoa, ayeke osio zoa so akono mingi na ndo ti sese. Sese ni abe nga gbâ ti anyama na akeke so ayeke kâ, mara ni ayeke na mbeni ndo pëpe
[Foto na lembeti 5]
Sarango voyage ayeke lani oko ti akota kpale so e wara
[Foto na lembeti 5]
E ye mingi ti manda Bible na azo