Tâ ndani so e yeke na fini ayeke dä?
AZO mingi ayeke hunda tere ti ala atene: “Ndani so zo ayeke na fini ayeke nyen?” Ye ti mawa ni ayeke so, atâa ye wa la ala ku ti wara na yâ ti fini ti ala, mingi ti ala alingbi pëpe ti kpe ye so wanganga Viktor E. Frankl airi ni bibe so ague na zo ti bâ so gigi ayeke gi ye senge senge.
Ngbanga ti nyen azo mingi abâ ye ni tongaso? Mbeni raison ni ayeke so azo kutu mingi na yâ ti dunia ayeke bâ gi pasi nga dutingo ti ala ayeke ye ti mawa mingi. Lâ oko oko, ala yeke na yâ ti yere, ala yeke tï kobela nga a yeke sara ye ti ngangu na ala senge senge. Biani fini ti ala ‘asi singo na vundu’ tongana ti Job so asara lani tënë ti pasi ti azo (Job 14:1). Kota ye so ala yeke gi ayeke ti ngbâ na fini lâ oko oko.
Azo kutu mingi ayeke na gbâ ti nginza nga na aye ti batango ala. Na bango ala, ala yeke na aye kue so ala yeke na bezoin ni ti duti na ngia na yâ ti fini ti ala. Me ambeni zo mingi ayeke na ngia pëpe. Ngbanga ti nyen? Ngbanga ti so fani mingi “ye ti pono na vundu” asara si ala bâ so gigi ti ala ti kekereke ayeke ga nzoni pëpe. A yeke aye tongana kpale ti nginza so zo aku tere ti lo na ni pëpe wala kuâ ti mbeni molenge.—Psaume 90:10.
Mbeni ye so ague nga na zo ti bâ so gigi ayeke gi ye senge senge ayeke nyen? A yeke so fini ti zo ayeke ninga pëpe. Ti azo mingi, a yeke na lege ni pëpe ti bâ azo so alingbi ti sara gbâ ti akota ye angbâ na fini aninga pëpe. Ala gi li ti ala nga gbä na mbeni ye so ayeke si na azo kue: So atâa tongana mbeni ye ti ngangu asi na e pëpe, lawa lawa e yeke kui.—Zo-ti-fa-tene 3:19, 20.
Fini ayeke kpa ande gi ye senge senge tongaso juska ti gue na ni?
Salomon so ayeke gbia ti Israël ti giriri afa na nduru tënë dutingo ti azo. Lo bâ tongana nyen na ngoi ti lo azo ayeke mû akode ti ala ti sara kua ngangu ti lu lê ti kobe, ti fâ yaka, ti leke da nga ti bâ lege ti asewa ti ala, tongana ti so e yeke sara laso. Ni la, lo hunda lo tene: ‘Aye so kue ayeke ti sara gi na nyen?’ Lo tene na nda ni so aye kue so azo asara ayeke “senge senge na ayeke tombango pupu senge.”—Zo-ti-fa-tene 2:17.
Me Gbia Salomon apensé so ye kue so azo asara ayeke duti lakue “senge senge na ayeke tombango pupu senge”? Ên-ën. Lo yeke sara gi tënë ti aye so asi na yâ ti fini ti azo. Ye oko, Mbeti ti Nzapa alingbi ti sara si mo mä na bê so aye ayeke duti ande lakue tongaso pëpe!
Nyen la mo lingbi ti sara ti mä na bê tongaso? Bâ a-article use so ayeke ga na peko. A lingbi ti mû maboko na mo ti hinga ndani so ambeni zo abâ so fini ayeke ye oko pëpe. A yeke mû nga maboko na mo ti bâ tongana nyen la ye so ayeke ga ande nzoni, nga ye so mo lingbi ti sara si fini ti mo aduti ye senge senge pëpe laso.