Zo alingbi ti sara lisoro na azo ti yingo?

NZAPA ti Ngangu Ahon Kue amû ambeni kusala na azo ti yingo ti sara ni na place ti lo. Na tapande, lo mû Jésus Christ ti komande sese na lo zia a-ange so ayeke be-ta-zo ti mû li ni na yâ ti kusala ti fango nzoni tënë (Apocalypse 14:6). Ye oko, ti sambela ayeke ti lo nde. Lo mû kusala ti mango sambela na mbeni zo ti sara na place ti lo pëpe. A lingbi e tene asambela ti e gi na Nzapa wani.

Jéhovah ayeke lo so ayeke “mä sambela”. (Psaume 65:3). Lo mä asambela ti e na lo kiri tënë na ni. Bazengele Jean asara tënë na amba ti lo awakua ti Jéhovah na ndo ti sambela lo tene: “Atâa ye wa e hunda, tongana a gue oko na ye so bê ti lo aye, [Nzapa a]yeke mä e. Na tongana e hinga so lo yeke mä e na ndo ti aye kue so e yeke hunda, e hinga nga so e yeke wara biani aye so e hunda ni ngbanga ti so e hunda ni na lo.”​—1 Jean 5:14, 15.

A-ange so ayeke be-ta-zo aye pëpe ti tene e gi ti sara lisoro na ala wala ti sambela ala. Ala hinga ye so Jéhovah aleke so andu tënë ti sambela na ala yeda na ni. Na ambeni ngoi ye so ahunda ti tene ala sara mbeni ye na yâ ni. Na lege wa? Na ngoi so prophète Daniel asambela Jéhovah teti Jérusalem so aga yangbato, Jéhovah akiri tënë na sambela ti Daniel na tokuango ange Gabriel ti ga na lo mbeni tokua so amû ngangu na zo.​—Daniel 9:3, 20-22.

Atokua so alondo na akuâ?

A yeke nzoni e gi ti sara lisoro na azo so akui awe? Ambaï mingi asara tënë na ndo ti alisoro so azo atene ala sara na ayingo ti akuâ. Na tapande, mbeni koli na Irlande so iri ti lo ayeke Fred akui asara ayenga kete awe. Me mbeni wali so ayeke zo ti gingo bendo aga atene na wali ti Fred so koli ti lo asara lisoro na ni biri na bï. Wali ni, so ayeke mbeni zo ti gingo bendo, afa peko ti tënë so “Fred” atene na lo. Aye so lo fa na wali ti Fred si lo yeda na ni ayeke aye so gi wali ti Fred la ahinga ni. A yeke ngangu pëpe ti tene wali ti Fred atene so Fred ayeke lani na fini na ndo ti ayingo nga lo yeke gi ti sara tënë na lo wali ni na lege ti wali so. Ye oko, tënë so ague tâ nde mingi na ye so Bible atene polele na ndo ti azo so akui awe.​—Bâ encadré.

Aye so asi so, a lingbi ti fa ndani tongana nyen? Mbeni ye so asioni yingo ayeke sara ti handa na azo ayeke so ala yeke sara ambeni ye mo bâ mo tene zo ni so akui so la ayeke sara ye ni so. Mbeni tapande ni la ayeke ti Fred so. Ala sara tongaso ngbanga ti nyen? Ti sara si azo ague nde na ye so Bible afa nga ti sara si mabe ti ala awoko na ti tene ala zia bê ti ala na Jéhovah mbeni pëpe. Biani, Satan na asioni yingo ahanda azo “na lege ti akusala kue ti ngangu, afä nga na aye ti dongo bê ti mvene, na lege ti sarango kusala na akode kue so ayeke mbilimbili pëpe ti handa na azo so ayeke gue ti wara futingo”.​—2 aThessalonicien 2:9, 10.

Biani, azo ti gingo bendo nga na azo so amû peko ti ala amä na bê so ala yeke sara lisoro na azo so akui awe. Me ti tâ tënë ni, tongana ala sara lisoro na ala, andâ ala sara lisoro na azo ti yingo so ake yanga ti Jéhovah. Legeoko nga a yeke wara azo so apensé so ala yeke voro Nzapa, me ala handa tere ti ala. Yingo vulu apusu bazengele Paul ti mû kpengba wango so: “Aye so azo ti amara ayeke mû na sandaga, ala yeke mû ni na asioni yingo, me ala yeke mû ni na Nzapa pëpe.”​—1 aCorinthien 10:20, 21.

So e hinga e tene e lingbi ti sambela Lo ti Nduzu ahon kue so andoye e na ayeke bi bê ti lo na e, e lingbi ti sambela mbeni zo nde pëpe. Na ndo ni, Bible adë bê ti e atene: “Lê ti L’Éternel akpe na ndo nde nde na lê ti sese kue ti fa ngangu ti Lo teti ala so bê ti ala ayeke mbilimbili na Lo.”​—2 Chronique 16:9.

[Foto na lembeti 9]

So e hinga e tene e lingbi ti sambela Lo ti Nduzu ahon kue so andoye e na ayeke bi bê ti lo na e, e lingbi ti sambela mbeni zo nde pëpe.

[Encadré/Foto na lembeti 8]

Tâ tënë nga na tënë ti wataka

TÂ TËNË: SATAN AYEKE DÄ BIANI

“Satan wani ayeke gbian tere ti lo lakue ti ga mbeni ange ti lumière.”​—2 aCorinthien 11:14.

“Ala zia li ti ala kpô, zia lê ti ala akpengba. Wato ti ala Zabolo ayeke tambela tongana mbeni bamara so ayeke toto, na lo yeke gi mbeni zo ti te lo.”​—1 Pierre 5:8.

“Zo so angbâ ti sara siokpari alondo na Zabolo, ngbanga ti so a yeke ngbene ye na tongo nda ni si Zabolo ayeke sara siokpari.”​—1 Jean 3:8.

“Ala duti na gbe ti Nzapa; me ala ke Zabolo, na fade lo yeke kpe yongoro na tere ti ala.”​—Jacques 4:7.

“Zabolo,  . . na ngoi so lo to nda ni, lo yeke wafango zo na lo ngbâ na yâ ti tâ tënë pëpe, ngbanga ti so tâ tënë ayeke na yâ ti lo pëpe. Tongana lo tene mvene, lo tene ni alingbi na tënë ti bê ti lo wani, ngbanga ti so lo yeke zo ti mvene na babâ ti mvene.”​—Jean 8:44.

TËNË TI WATAKA: AZO KUE SO AKUI AYEKE GUE NA NDO TI AYINGO

“Fade mo te kobe na lege ti sô ti lê ti mo juska mo kiri na sese, teti A kamata mo na sese; na fade mo kiri na pupu-sese, teti mo yeke pupu-sese.”​—Genèse 3:19.

“Ala so ayeke na fini, ala hinga fade ala kui; me akinda ahinga ye oko pëpe.”​—Zo-ti-fa-tene 9:5.

“Ye kue so maboko ti mo awara ti sara, mo sara na ngangu ti mo kue; teti kusala, ye ti bibe, hingango ye, na ndara, ayeke na ndo-ti-awakinda pëpe, ndo so mo yeke gue dä.”​—Zo-ti-fa-tene 9:10.

“Tongana mbö ti lo ahon, lo kiri na sese. Na lâ ni mveni, ye so lo bi bê ti lo dä aga ye senge.”​—Psaume 146:4.

TÂ TËNË: A-ANGE SO AYEKE BE-TA-ZO AYEKE BI BÊ TI ALA NA E

“Ange ti L’Éternel ase kando ti ngoro ala so akpe mbeto ti Lo, na Lo sö ala.”​—Psaume 34:8; 91:11.

“[A-ange] kue ayeke ayingo so ayeke sara kua ndali ti nzoni ti azo pëpe? Ayingo so a tokua ala ti sara kua na azo so ayeke wara ande salut.”​—aHébreu 1:14.

“Mbi bâ mbeni ange nde so ayeke huru kâ na lê ti nduzu, lo yeke na mbeni nzoni tënë ti lakue lakue ti fa ni tongana nzoni sango na azo so asara kodoro na sese, na amara kue, akete mara kue, azo ti ayanga ti kodoro kue nga na azo ti kodoro kue, lo tene na kota go: ‘Ala kpe mbeto ti Nzapa na ala mû gloire na lo.’”​—Apocalypse 14:6, 7.

TËNË TI WATAKA: JÉSUS NA NZAPA ALINGBI TERE

“Mbi ye si ala hinga so mokonzi ti akoli kue ayeke Christ, mokonzi ti wali ayeke koli na mokonzi ti Christ ayeke Nzapa.”​—1 aCorinthien 11:3.

“Tongana aye kue aga ande na gbe ti lo awe, fade Molenge ni nga ayeke duti na gbe ti Lo so azia aye kue na gbe ti lo Molenge ni, si Nzapa aga aye kue teti zo oko oko kue.”​—1 aCorinthien 15:28.

“Biani, ti tâ tënë ni, mbi tënë na ala: Molenge ni alingbi pëpe ti sara mbeni ye oko tongaso na bê ti lo wani, me lo yeke sara gi ye so lo bâ Babâ ni na sarango ni.”​—Jean 5:19.