Biani, sarango aye ti sioni ayeke hunzi!

NZAPA amû na e Bible so na yâ ni lo fa na e ndani so azo ayeke sara aye ti sioni. Lo sara nga e na ngangu ti soro ye e wani nga e lingbi ti kanga nzara ti bê ti e si e sara aye ti sioni pëpe (Deutéronome 30:15, 16, 19). Teti so e yeke na aye so kue, e lingbi ti hinga asioni sarango ye so peut-être e yeke na ni nga e sara kue ti zia lege ni. Na nda ni, e na azo so ayeke nduru na e e yeke duti na ngia ndali ti so e zia lege ti sarango aye ti sioni.​—Psaume 1:1.

Me atâa e sara ngangu tongana nyen ti ke ti sara aye ti sioni, azo ayeke ngbâ ti sara aye ti sioni mingi na yâ ti dunia so. Bible atene: “A yeke nzoni mo hinga tënë so: Na alango ti nda ni, angoi ti akpale so ayeke ngangu na zo ti kanga bê na yâ ni ayeke duti dä.” Ti fa ye so asara si a yeke “ngangu na zo ti kanga bê” na yâ ti alango ni so Bible atene: “Azo ayeke duti ande azo so andoye gi tere ti ala wani, azo so andoye nginza, azo so abâ tere ti ala kota na ndo ti amba ti ala, azo ti baba, azo ti zongango ndo, azo so ake yanga ti ababâ na amama ti ala, azo so ahinga ti kiri singila pëpe, azo so ayeke abe-ta-zo pëpe, azo so aye amba ti ala zo pëpe, azo so aye oko pëpe ti mä tere na amba ti ala, azo ti pango amba ti ala, azo so akanga nzara ti bê ti ala pëpe, azo so ayeke asioni zo, azo so andoye nzoni ye pëpe, azo ti kango amba ti ala, azo so li ti ala akpengba, azo so wuma ti ala ahon ndo ni, azo so andoye angia ahon ti ndoye Nzapa, ala yeke sara ye mo bâ mo tene ala gbu tënë ti Nzapa ngangu, andâ ala ke ngangu ti tënë ni awe; mo turnê peko ti mo na azo so.”​—2 Timothée 3:1-5.

Peut-être mo bâ tënë “alango ti nda ni” na yâ ti atënë ti prophétie so ayeke na nduzu ge. Ti mo, tënë so aye ti tene nyen? Ti mingi ti azo, tënë “alango ti nda ni” aye ti fa so mbeni ye ayeke gue ti hunzi. Ye ni so ayeke nyen? Bâ aye so Nzapa amû zendo ni na yâ ti Bible.

A yeke futi ande azo ti sioni kue.

“A ngbâ kete, na fade azo ti sioni ayeke mbeni pëpe; fade mo bâ ndo so ala duti dä, na ala yeke mbeni pëpe. Me azo so ayeke na tâ be-ti-molenge, fade sese ni aga ye ti héritier ti ala, fade ala wara ngia na yâ siriri so awu mingi.”​—PSAUME 37:10, 11.

“L’Éternel abata ala kue so andoye Lo, me fade Lo fâ azo ti sioni kue.”​—PSAUME 145:20.

Sarango sioni na zo ayeke hunzi.

“Fade Lo sö zo so ye amanke lo mingi tongana lo toto na Lo, na Lo sö zo ti vundu so ayeke na zo oko pëpe ti sara na lo. Fade lo ton âme ti ala na yâ ye ti ngangu na sioye.”​—PSAUME 72:12, 14.

“Fade a yeke zi création nga na gbe ti ngbâa ti ye so abuba, na lo yeke wara liberté ti gloire ti amolenge ti Nzapa.”​—AROMAIN 8:21.

Azo ayeke wara ande aye so ala yeke na bezoin ni.

“Fade azo oko oko kue aduti na gbe ti vigne ti ala mveni, na gbe ti keke ti figue ti ala mveni; zo oko ti mû mbeto na ala ayeke pëpe.”​—MICHÉE 4:4.

“Fade azo asara da, na ala duti na yâ ni; fade ala lu vigne na yaka, na ala te lê ni. Fade azo asara da si mbeni zo aduti na yâ ni pëpe; fade ala lu ye si mbeni zo ate pëpe; fade lâ ti azo ti Mbi ayeke mingi tongana lâ ti keke; na azo ti Mbi so Mbi iri ala, fade ala wara ngia na kusala ti maboko ti ala teti lâ mingi.”​—ÉSAÏE 65:21, 22.

Fango ngbanga na lege ni ayeke duti dä.

“Biani, Nzapa nga ayeke bâ si a fâ ngbanga nzoni na ala pëpe? ala so lo soro ala awe na so ayeke toto na lo bï na lâ . . . Mbi tene na ala: Fade lo yeke bâ si a fâ ngbanga nzoni na ala nga hio.”​—LUC 18:7, 8.

“L’Éternel aye fango ngbanga ti mbilimbili, azo ti Lo ti nzobe, Lo zia ala pëpe; Lo bata ala lakue.”​—PSAUME 37:28.

Sarango ye ti mbilimbili ayeke mû ndo ti sese kue.

“Fade awakodoro ti sese so amanda lege ti mbilimbili.”​—ÉSAÏE 26:9.

“Na lege ti zendo ti lo, e yeke ku afini yayu na fini sese so mbilimbili ayeke duti ande na yâ ni.”​—2 PIERRE 3:13.

Même laso, azo ayeke changé asioni sarango ye ti ala

Biani, azendo so asara si tere ti e kue anzere. Me nyen la afa na e so azendo so ayeke ga ande tâ tënë? Laso e yeke na mbeni ye so afa polele so azendo so Nzapa amû ayeke ga ande tâ tënë. Ye ni ayeke nyen? A yeke so azo kutu na kutu na yâ ti dunia kue awara lege laso awe ti zia lege ti kion, sarango ye ti kirikiri, sarango ngangu na zo. Nga ala manda ti sara ye na lege ni, ti duti na siriri na azo nga ti sara nzoni bê. Laso, aTémoin ti Jéhovah so wungo ti ala ahon kutu mbasambala ayeke na yâ ti mbeni sewa ti aita so ayeke na yâ ti dunia kue. Ala hon ndo ti aye so asara si azo ayeke ke tere, ayeke sara ngangu na amba ti ala nga ayeke fâ tere na popo ti ala. A yeke aye tongana tënë ti mara, tënë ti kodoro, tënë ti poroso nga na tënë ti konomi.a So azo azia lege ti asarango ye tongaso asara si e yeke na kite oko pëpe so azendo ti Nzapa ayeke ga ande tâ tënë na yâ ti dunia kue.

Me nyen la asara si azo ni achangé tongaso? Kiringo tënë ni ayeke na yâ ti mbeni zendo so prophète Ésaïe asû ni na yâ ti Bible. Lo tene:

“Fade ikaï aduti na ndo oko na molenge ti ngasangbaga, na ze alango na sese na tere ti molenge ti ngasa; molenge ti bagara, na pendere bamara, na bagara ti mafuta, fade ala lango na ndo oko; na fade kete molenge afa lege na ala. . . . Fade bamara ate pere tongana bagara. Fade molenge so ade ti nyon me asara ngia na yanga ti dû ti konga, na molenge so azia me awe ayôro maboko ti lo na yâ dû ti ouonjébira. Fade a sara ye ti ngangu, wala a futi ye pëpe na Hoto ti Mbi ti nzoni-kue; teti fade sese ni asi na ndara ti L’Éternel, legeoko tongana kota ngu ti ingo asi na ngu.”​—Ésaïe 11:6-9.

Prophétie so asara gi tënë ti mbeni ngoi so siriri ayeke duti ande na popo ti azo na anyama? Ên-ën, a ye ti sara tënë ti aye mingi. Ndangba mbage ti versê ni afa ye so aga na agbiango ye ni so. A tene: “Fade sese ni asi na ndara ti L’Éternel.” Ndara ti Nzapa ayeke sara si anyama achangé sarango ye ti ala? Oko pëpe. Me a lingbi ti changé gi azo na asara si ambeni zo achangé awe! Prophétie so afa kozoni awe so azo so sarango ye ti tere ti ala ayeke tongana ti anyama ayeke changé ti sara ye tongana ti Christ ndali ti so ala manda ye so Bible afa nga ala sara ye alingbi na ni.

Bâ tapande ti Pedro.b Na ngoi so lo lï lani na yâ ti mbeni bungbi ti aterroriste, lo pensé so lo yeke tiri ndali ti ye so ayeke na lege ni. Na pekoni so lo manda ti sara kusala ti terroriste, a mû yanga na lo ti gue ti sungba mbeni ndokua ti lapolice. Na ngoi so lo yeke leke tere ti lo ti sara ni, a zia maboko na ndo ti lo. A bi lo na kanga teti ngu oko na ndambo, me kâ lo ngbâ ti sara kusala ti lo ti terroriste ni. Na ngoi so Pedro angbâ na kanga, aTémoin ti Jéhovah amanda Bible na wali ti lo. Na pekoni so Pedro asigigi na da ti kanga, lo nga kue lo to nda ti manda Bible. Ye so lo manda na ndo ti Jéhovah Nzapa apusu lo ti changé aye mingi na yâ ti sarango ye ti lo nga na bango ndo ti lo na ndo ti fini. Pedro atene: “Mbi mû merci na Jéhovah so mbi fâ zo lâ oko pëpe na yâ ti angu kue so mbi sara kua ti terroriste. Fadeso mbi mû épée ti yingo so ayeke Bible ti fa na azo tënë ti tâ siriri nga na fango ngbanga ti mbilimbili: nzoni tënë ti Royaume ti Nzapa.” Pedro ague même asara vizite na ndokua ti lapolice so lo leke lani ti sungba ni ti fa na azo ni tënë ti siriri nga ti mbeni dunia so sarango ngangu na zo ayeke duti dä pëpe.

Ngangu so Mbeti ti Nzapa alingbi ti sara na ndo ti azo ayeke nga mbeni ye so apusu e ti mä na bê na zendo ti Nzapa so atene fade sarango aye ti sioni kue ayeke hunzi. Tâ tënë, azo ayeke ngbâ ande ti sara ye ti sioni lakue lakue pëpe. Jéhovah aga nduru awe ti futi zo so ayeke na gunda ti sarango aye ti sioni, Satan Zabolo, so ayeke na peko ti aye so ayeke si na yâ ti dunia. Bible atene: “Dunia so kue ayeke na gbe ti Zo ti sioni.” (1 Jean 5:19). Me a ga nduru ti futi lo awe. Même azo so ake ti zia lege ti sioni sarango ye ti ala, a yeke futi ala. A yeke nzere ande mingi na e ti duti na fini na ngoi ni so!

Nyen la a lingbi mo sara ti wara aye ti nzoni so? Hinga so a yeke “ndara ti L’Éternel” la apusu azo ti changé laso nga na yâ ti ngoi kete gi ndara so la ayeke ga na gbiango ye na yâ ti dunia kue. Na tapande ti Pedro, tongana mo manda Bible na mo sara ye alingbi na ni, mo nga kue mo lingbi ti duti na fini na yâ ti dunia so “mbilimbili ayeke duti ande na yâ ni.” (2 Pierre 3:13). Tongaso, e wa mo ti gbu ngoi so angbâ ti manda ti hinga Nzapa nga na Jésus Christ. Teti na sarango tongaso, mo yeke wara fini ti lakue lakue.​—Jean 17:3.

[Akete tënë na gbe ni]

[Kete tënë na lembeti 9]

Mo kue mo lingbi ti ku ti duti na fini na yâ ti dunia so “mbilimbili ayeke duti ande na yâ ni.”​—2 PIERRE 3:13