Gbu ngangu tongana koli wala wali ti mo aduti be-ta-zo na mo pëpe

MARGARITA na koli ti lo Raúl, ala use kue asara lani na Jéhovah na yâ ti kusala ti ngoi kue teti angu mingi.a Me angoi kete na pekoni so ala dü kozo molenge ti ala, Raúl ato nda ti gue yongoro na Jéhovah. Yeke na yeke, Raúl atï na yâ ti lango-sioni na a zia lo na gigi ti congrégation. Margarita atene: “Na ngoi so aye so kue asi, ye ni asara mbi mo bâ mo tene mbi ye ti kui. Vundu ahon ndo ti mbi na mbi hinga ye so mbi lingbi ti sara pëpe.”

Kete na pekoni so Jane asara mariage, koli ti lo aduti be-ta-zo na lo pëpe na alege nde nde. Lo to nda ti pika lo. Jane atene: “Na ngoi so lo pika mbi ti kozoni, li ti mbi akpe, mbi hinga ye so mbi lingbi ti sara pëpe nga kamene ahon ndo ti mbi. Na pekoni, lakue lo pika mbi, lo hunda na mbi ti pardone lo. Lani mbi pensé so ndali ti so mbi yeke Chrétien, a lingbi mbi pardone lo lakue nga mbi girisa na ndo ni. Mbi pensé nga lani so tongana mbi fa kpale ti e na mbeni zo même na a-ancien ti congrégation, andâ mbi yeke be-ta-zo pëpe. Teti angu mingi lo sara gi tongaso. Lo pika mbi, na pekoni lo hunda pardon. Na yâ ti angoi so kue, mbi pensé ti mbi so mbeni ye ayeke dä so mbi lingbi ti sara ti tene koli ti mbi aye mbi. Na nda ni, na ngoi so lo dö mbi na molenge ti e ti wali lo zia, na bê ti mbi mbi tene so mbi bi na ngu awe, mbi tene nga so a yeke ti mbi fade ti sara aye mingi ti bata mariage ti e.”

Legeoko tongana ti so asi na Margarita nga na Jane, peut-être mo yeke na vundu, mo yeke na kpale ti nginza nga mabe ti mo awoko ndali ti so koli ti mo aduti be-ta-zo na mo pëpe. Wala peut-être mo yeke koli so asara mariage awe na mo yeke na vundu nga na kpale ndali ti so wali ti mo aduti be-ta-zo na mo pëpe. Biani, tongana ti so Bible afa ni kozo awe, e yeke na yâ ti “angoi ti akpale so ayeke ngangu na zo ti kanga bê na yâ ni”. Prophétie so afa so “na alango ti nda ni,” asewa ayeke tingbi na akpale, na mingi ni azo ayeke ye amba ti ala zo pëpe. A yeke bâ so ambeni zo so atene ala yeke sara na Nzapa ayeke azo ti wataka (2 Tim. 3:1-5). Amara ti kpale so alingbi ti si nga na atâ Chrétien; ni la, nyen la ayeke mû maboko na mo ti gbu ngangu tongana koli wala wali ti mo aduti be-ta-zo na mo pëpe?

Bâ tere ti mo tongana ti so Jéhovah abâ na mo

Kozoni kue, mo lingbi ti bâ so ayeke ngangu na mo ti yeda so mbeni zo so mo ye lo la ason bê ti mo tongaso. Mo lingbi ti tene so a yeke mo la mo sara si koli wala wali ti mo asara siokpari.

Dabe ti mo so, même Jésus so ayeke zo so alingbi kue, mbeni zo so lo zia bê ti lo na lo nga lo ye lo aduti lani be-ta-zo na lo pëpe. Jésus agbu li ti lo lani mingi nga lo sambela kozoni si lo soro abazengele ti lo so ayeke akota kamarade ti lo. Ala 12 kue ayeke lani awakua ti Jéhovah so a lingbi ti zia bê na ndo ti ala. Ye oko, a yeke tâ tënë so Jésus ayeke lani na vundu mingi na ngoi so Judas ‘aga zo ti kango zo.’ (Luc 6:12-16). Ye oko, ye so Judas asara so Jéhovah abi tënë ni na li ti Jésus pëpe.

Biani, laso na yâ ti mariage mbeni koli wala wali so alingbi kue ayeke dä pëpe. Koli na wali ti lo kue ayeke sara ka afaute. A yeke na lege ni so mbeni zo ti sungo Psaume atene: “O L’Éternel, tongana Mo bata tënë ti sioye, O Seigneur, ka zo nyen alingbi ti ngbâ?” (Ps. 130:3). Na mungo tapande ti Jéhovah, a yeke nzoni koli na wali ti lo kue aduti nduru ti pardone awokongo ti mba.​—1 Pi. 4:8.

Me, “fade zo oko oko na popo ti e ayeke kiri tënë na Nzapa ndali ti lo wani.” (aRom. 14:12). Na yâ ti mariage, koli wala wali so ahinga lo na zonga wala na sarango aye ti sioni, lo la lo yeke kiri tënë na Jéhovah. Jéhovah ake zonga nga na sarango ye ti ngangu na zo. Tongaso, mbeni raison oko ayeke dä pëpe ti tene mbeni koli wala wali asara ye na ndoye pëpe nga lo ne pëpe wali wala koli ti lo (Ps. 11:5; aÉph. 5:33; aCol. 3:6-8). Ti tâ tënë ni, tongana lakue mbeni Chrétien ayeke sara ye na ngonzo mingi na a sara tënë na lo gbä nga lo ye ti changé pëpe, a lingbi a zia lo na gigi ti congrégation (aGal. 5:19-21; 2 Jean 9, 10). A lingbi mbeni koli wala wali agi bê ti lo pëpe ndali ti so lo sara tënë ti sioni tambela ti koli wala wali ti lo na a-ancien. Biani, Jéhovah ayeke bâ mawa ti azo so mara ti ye ti sioni tongaso asi na ala.

Tongana mbeni koli wala wali so asara mariage awe agi mbeni wali wala mbeni koli nde, lo sara siokpari na tere ti koli wala wali ti lo so angbâ ti lo be-ta-zo nga lo sara siokpari na tere ti Jéhovah (Mat. 19:4-9; aHéb. 13:4). Tongana koli wala wali ni so asara ti lo sioni pëpe ayeke sara ngangu ti sara ye alingbi na afango ye ti Bible, lo yeke na bezoin pëpe ti pensé so a yeke lo la lo sara si koli wala wali ti lo agi mbeni wali wala mbeni koli nde.

Girisa pëpe so Jéhovah ahinga atënë ti bê ti mo. Lo fa tere ti lo tongana koli ti mara ti Israël, nga na yâ ti Mbeti ti lo a yeke wara gbâ ti atënë ti lo so afa vundu so lo yeke na ni lani ndali ti so mara ni aduti be-ta-zo na lo pëpe (És. 54:5, 6; Jér. 3:1, 6-10). Hinga so Jéhovah ayeke bâ angu ti lê ti mo so ayeke yuru ndali ti so koli wala wali ti mo aduti be-ta-zo na mo pëpe na yâ ti ambeni ye (Mal. 2:13, 14). Jéhovah ahinga so mo yeke na bezoin ti tene a dë bê ti mo nga a kpengba mo.

Lege so Jéhovah ayeke dë bê ti mo

Mbeni ye so Jéhovah ayeke sara kusala na ni ti dë bê ti zo ayeke congrégation ti aChrétien. Jane awara mara ti mungo maboko so. Jane adabe ti lo, lo tene: “Vizite ti surveillant ti circonscription atï lani tâ gi na ngoi so bê ti mbi ayeke na vundu mingi. Ita ni ahinga so mbi yeke na vundu mingi na pekoni so koli ti mbi asara divorce. Lo mû ngoi ti mû maboko na mbi ti gbu li ti mbi na ndo ti aversê tongana 1 aCorinthien 7:15. Aversê ti Bible nga na anzoni tënë so lo tene adë bê ti mbi so a yeke faute ti mbi pëpe nga asara si mbi wara siriri ti bê.”b

Margarita so e sara fade tënë ti lo, lo nga kue lo bâ so Jéhovah ayeke mû maboko na lege ti congrégation ti aChrétien. Margarita atene: “Na ngoi so a yeke polele so koli ti mbi aye ti changé bê ti lo pëpe, mbi mû amolenge ti mbi na e kite e gue na mbeni gbata nde. Na singo ti e, mbi wara mbeni da ti chambre use so mbi loué ni. Na ndade ni, vundu ahon ndo ti mbi, na ngoi so mbi ngbâ ti zi yâ ti akungba ti e, mbi mä mbeni zo apika yanga-da. Mbi bâ mbi tene a yeke wali so mbi loué da ti lo ni so la, lo lango gi na tere ti da ni. Mo ye ti bâ, a yeke ita-wali so lani amanda Bible na mama ti mbi na so amû nga maboko na sewa ti e ti hinga tâ tënë. Lo ku tere ti lo fade ti bâ mbi ge pëpe, me lo ga na yanga-da ni so ndali ti so lo yeke manda Bible na wali so mbi loué da ti lo. Bê ti mbi adë na ye so asara si mbi tï na toto. Mbi fa na lo ye so asi na mbi, na e use kue e tï na toto. Hio, lo leke ti tene e gue na bungbi na lango ni so. Aita ti congrégation ayamba e nzoni, na a-ancien ti congrégation ni aleke ambeni ye ti mû maboko na mbi ti bata amolenge ti mbi na lege ti yingo.”

Tongana nyen ambeni zo alingbi ti mû maboko

Biani, amembre ti congrégation ti aChrétien alingbi ti mû maboko na alege mingi. Na tapande, fadeso a lingbi Margarita agi kua ti nginza. Mbeni sewa na yâ ti congrégation ni ahunda ti bâ lege ti amolenge ti lo na peko ti ekole tongana bezoin ni ayeke dä.

Margarita atene: “Ye so anzere na mbi mingi ayeke so, aita ahunda ti fa tënë legeoko na mbi nga na amolenge ti mbi.” Na lege ti mungo maboko tongaso, amembre ti congrégation ayeke mû maboko ti “yô aye so ane amba ti ala na popo ti ala” nga na sarango tongaso ala yeke sara ye alingbi na “ndia ti Christ.”​—aGal. 6:2.

Azo so ayeke bâ pasi ndali ti siokpari ti amba ti ala abâ na nene ni mingi mara ti mungo maboko tongaso. Koli ti Monique adö lo azia na amolenge osio. Koli ni azia nga lo na bon ti kutu omene na ndo ni tongaso na ndo ti lo. Monique atene: “Aita ti mbi ti bungbi aye mbi mingi. Tongana fade ala mû maboko na mbi pëpe ka mbi yeke gbu lê ni pëpe. Mbi bâ so Jéhovah amû na mbi aita so ayeke tâ nzoni mingi, ala wani amû tere ti ala ti mû maboko na amolenge ti mbi. A nzere na mbi ti bâ so amolenge ti mbi ague na li ni na lege ti yingo grâce na mungo maboko ti ala. Tongana mbi yeke na bezoin ti wango, a-ancien ayeke mû maboko na mbi. Tongana mbi yeke na bezoin ti sara tënë na mbeni zo, ala yeke mä mbi.”​—Marc 10:29, 30.

Biani, mbeni kamarade so ayeke na ndoye ahinga angoi wa a yeke nzoni pëpe ti sara lisoro na kamarade ti lo na ndo ti ye ti vundu so asi na lo (Zo-ti. 3:7). Margarita atene: “Mbi ye mingi ti sara lisoro na aita-wali ti fini congrégation ti mbi na ndo ti fango tënë, a-étude so e sara na azo, amolenge ti e nga na ambeni ye nde, me pëpe na ndo ti akpale ti mbi. Mbi kiri singila mingi so ala sara si mbi girisa na ndo ti akpale so asi na mbi nga ala mû maboko na mbi ti sara gi mbeni ye nde.”

Kpe ti futa kula

Tongana angoi ayeke hon, mo yeke tene mbeni pëpe so a yeke mo la mo sara si koli wala wali ti mo asara siokpari, me bê ti mo alingbi ti son ndali ti so mo yeke bâ pasi ndali ti siokpari ti koli wala wali ti mo. Tongana tënë ni angbâ ti son bê ti mo, ngonzo ni alingbi ti sara si a yeke ngangu na mo ti duti be-ta-zo na Jéhovah. Na tapande, mo lingbi ti gi alege ti futa kula na koli wala wali ti mo ni so aduti be-ta-zo pëpe na mo.

Tongana mo bâ so mara ti apensé tongaso ayeke kporo na yâ ti mo, gbu li ti mo na ndo ti tapande ti Josué na Caleb. Abe-ta-zo so azia lani fini ti ala na lê ti kuâ na ngoi so ala gue ti bembe ndo na Sese ti Zendo. Ambeni mba ti ala so ague lani legeoko na ala ayeke na mabe pëpe na ala pusu azo ti Israël ti ke yanga ti Jéhovah. Ambeni zo ti Israël aye même lani ti bo Josué na Caleb na tênë na ngoi so ala wa azo ni kue ti ngbâ be-ta-zo na Jéhovah (Nom. 13:25–14:10). Ye so amolenge ti Israël asara so asara si Josué na Caleb kue asara angu 40 na yando, ndali ti faute ti ala pëpe, me ndali ti faute ti amba ti ala.

Atâa so peut-être bê ti Josué na Caleb ason lani, ala zia pëpe si siokpari ti aita ti ala apusu ala ti bata ngonzo na bê ti ala. Ala zia lani lê ti ala angbâ gi na ndo ti kusala so ala yeke sara na Jéhovah. Na hunzingo ti angu 40 so ala sara na yando, Jéhovah afuta ala nga na azo ti mara ti Lévi, na sarango si ala sö kuâ na popo ti azo ti ngoi ti ala nga lo mû lege na ala ti lï na Sese ti Zendo.​—Nom. 14:28-30; Jos. 14:6-12.

Sarango ye ti koli wala wali ti mo so ayeke be-ta-zo na mo pëpe alingbi ti sara si mo bâ pasi teti angoi mingi. Ala lingbi ti sara divorce, nga na pekoni mo lingbi ti duti na vundu nga na kpale ti nginza. Ye oko, a hon ti sara vundu ahon ndo ni, girisa pëpe so Jéhovah ahinga ye so lo lingbi ti sara na azo so asara siokpari na mbana, legeoko tongana ti amolenge ti Israël so ayeke lani na mabe pëpe na yando.​—aHéb. 10:30, 31; 13:4.

Mo lingbi ti hon ndo ni!

A hon ti zia si asioni bibe asara si mo woko kue, sara si li ti mo asi singo na apensé ti Jéhovah. Jane atene: “Mango aTour ti Ba Ndo nga na Réveillez-vous! na ndo ti kasete amû maboko na mbi ti gbu ngangu. Abungbi nga kue amû ngangu na mbi. Mungo mbage lakue na abungbi amû maboko na mbi ti girisa na ndo ti akpale ti mbi. Fango tënë amû nga maboko na mbi tongaso. Mungo maboko na ambeni zo ti kpengba mabe ti ala na Jéhovah, asara si mabe ti mbi wani akpengba. Na ndo ni, ti mû maboko na azo so angbâ ti manda Bible asara si li ti mbi angbâ gi na ndo ti aye so ayeke kota ye.”

Monique so e sara tënë ti lo fade atene: “Guengo lakue na abungbi nga ti fa tënë alingbi na ngangu ti mbi asara si mbi gbu ngangu. Mbi na amolenge ti mbi e ye tere mingi nga e yeke nduru mingi na aita ti congrégation. Aye so asi na mbi amû maboko na mbi ti hinga awokongo ti mbi. Mbi wara atara, me grâce na mungo maboko ti Jéhovah mbi hon ndo ni.”

Mo nga kue mo lingbi ti gbu ngangu na yâ ti mara ti atara tongaso. Atâa vundu so mo yeke na ni ndali ti so koli wala wali ti mo aduti be-ta-zo na mo pëpe, sara kue ti mû peko ti wango ti Paul so: “Zia e dö lege ti sarango ye ti nzoni e zia pëpe, ngbanga ti so tongana ngoi ni alingbi, fade e yeke ko lengo ni tongana e woko pëpe.”​—aGal. 6:9.

[Akete tënë na gbe ni]

[Foto na lembeti 31]

Aita-wali so akoli ti ala ake ala akiri singila mingi na azo so amû maboko na ala na yâ ti fango tënë