Nzapa ayeke pensé nga na e la?

“O [Jéhovah, FD] teti nyen Mo luti yongoro kâ? Teti nyen Mo honde tere ti Mo na lâ ti vundu?”​—PSAUME 10:1.

TONGANA e bi lê ti e gi kete na ndo ti ali ti asango, e yeke yeda biani so e yeke na “lâ ti vundu”. Na ndo ni, na ngoi so ye ti ngangu asi. Na tapande, na ngoi so mbeni ye ti sioni asi na e, mbeni ngangu ndao, wala mbeni zo so e ye lo akui, e lingbi ti hunda tere ti e: Nzapa ayeke bâ aye so nga la? Lo yeke bi bê ti lo nga na e la? Lo yeke même dä la?

Ye oko, a si na mo awe ti pensé so bango ndo ti e na ndo ti aye so e ku na mbage ti Nzapa ayeke na lege ni pëpe? Zia e mû mbeni tapande: tara ti bâ mbeni kete molenge so asara ngonzo ndali ti so babâ ti lo ague na kua. Molenge ni asara nzara ti babâ ti lo na lo ye si babâ ti lo akiri na kodoro. Lo pensé so babâ ti lo adö lo azia awe. Na yâ ti lango ni kue, fani mingi lo yeke tene: “Papa ayeke na ndo wa?”

E lingbi ti bâ hio so bibe ti molenge so ayeke na lege ni pëpe. Na ndo ni kue, tâ na ngoi ni so, babâ ti lo ni ayeke sara kua ti bâ lege ti azo ti sewa ni kue. Bibe ti e alingbi nga ti duti tongana ti molenge so na ngoi so e dema tere e tene: “Nzapa ayeke bâ nga apasi ti e la?”

Na tapande, ambeni zo aye ti ala ti tene Nzapa afâ ngbanga hio hio na ndo ti azo so ayeke sara aye ti sioni. Ambeni zo abâ ti ala Nzapa tongana mbeni Papa Noël so ayeke na yayu na so kua ti lo ayeke ti mû gbâ ti cadeau na azo: kua ti nginza, koli wala wali, wala ti sara si zo asö benda na yâ ti ngia ti nginza.

Abango ndo use so aye ti fa so tongana Nzapa afâ ngbanga hio hio pëpe wala lo sara pëpe aye so e hunda na lo, andâ lo sara sanka ti apasi so e yeke bâ nga lo hinga pëpe aye so e yeke na bezoin ni. Ye oko, atënë so kue ayeke tâ tënë pëpe! Ye ni ayeke ti so, na ngoi ni so Jéhovah angbâ ti sara kua ndali ti nzoni ti azo ti dunia kue, me lo yeke sara ni pëpe tongana ti so azo mingi ahunda na lo.

Tongaso, nyen la Nzapa angbâ ti sara nyen? Ti kiri tënë na hundango tënë so, a lingbi e kiri na tongo nda ti mbaï ti azo na ngoi so yâ ti songo ti azo na Nzapa abuba sioni sioni; me abuba biani biani pëpe.

Akpale so siokpari aga na ni

Tara ti bâ mbeni da so abuba asara angu mingi awe. Li ti da ni atï na yâ ni, aporte ni akungbi, azo asara aye kirikiri na tere ti mur ni. Ândö da ni ayeke nzoni, me ti fadeso pëpe. Na bango aye so abuba na tere ti da ni, ti kiri ti leke ni ayeke kete ye pëpe; na lekengo ni ayeke hunzi gi hio tongaso pëpe.

Fadeso bâ kpale so asi na azo ti dunia kue a sara angu 6000 tongaso awe na ngoi so mbeni ange, Satan, apusu Adam na Ève ti ke yanga ti Nzapa. Kozoni si ye so asi, Adam na Ève ayeke na nzoni seni na ala yeke na beku ti fini ti lakue lakue legeoko na amolenge so ala yeke dü ande (Genèse 1:28). Ye oko, na ngoi so ala sara siokpari, a yeke mo bâ mo tene ala buba sewa ti azo kue so ayeke bâ gigi na lege ti ala.

Bâ aye ti sioni so kengo yanga aga na ni tongana kete ye pëpe. Bible atene: “Na lege ti [Adam] siokpari alï na yâ ti dunia so, na lege ti siokpari kuâ aga.” (aRomain 5:12). Na ndo ti kuâ so siokpari aga na ni, siokpari abuba songo ti e na Wasarango e na abuba nga seni ti e, bibe ti e nga asara si e lingbi ti duti na vundu. Ni la, dutingo ti e ayeke tongana ti mbeni gbagbara da. A yeke na lege ni so Job, zo ti mbilimbili, afa dutingo ti e azo na lege so lo tene zo “ayeke na lâ mingi pëpe, na vundu ti lo asi singo.”​—Job 14:1.

Me Nzapa adö e azo azia na pekoni so Adam na Ève asara siokpari? Oko pëpe! Ti tâ tënë ni, ti londo na ngoi ni so juska laso, Babâ ti e ti yayu angbâ ti sara kua ndali ti nzoni ti azo. Ti hinga nzoni aye so Nzapa angbâ ti sara ndali ti e, e yeke bâ aye ota so a hunda ti sara ti kiri ti leke mbeni da so abuba nga tongana nyen aye ni so oko oko kue ague oko na ye so Nzapa ayeke sara ti tene fini ti azo akiri aga nzoni.

1 Na pekoni so wa ti da ni abâ so da ni abuba awe, a yeke ti lo ti kiri ti leke ni wala ti kungbi ni.

Hio na peko ti kengo yanga na yâ ti yaka ti Éden, Jéhovah afa ye so lo ye ti sara ti tene fini ti azo akiri aga nzoni. Lo tene na ange so apusu azo ti ke yanga lo tene: “Fade Mbi zia tënë ti ke na popo ti mo na wali so, [nga] na popo ti hale [“ngongoa,” FD] ti mo na hale [“ngongoa,” FD] ti lo; fade lo mboko li ti mo, na fade mo mboko ndagere ti lo.”​—Genèse 3:15.

Na lege ti atënë so, Jéhovah amû zendo ti futi zo so apusu azo ti ke yanga na yâ ti yaka ti Éden (aRomain 16:20; Apocalypse 12:9). Na ndo ni, Jéhovah afa kozoni awe so “hale” wala ngongoa ni so a sara tënë ti lo ayeke zi ande azo na yâ ti siokparia (1 Jean 3:8). Na lege ti azendo so, Jéhovah afa lani polele aye so lo yeke sara ande: Nzapa ayeke kiri ti leke peko ti aye so lo leke ândö, me lo yeke futi ni pëpe. Me ti sara si fini ti azo akiri aga nzoni ayeke mû ngoi.

2 Mbeni wakode ti lekengo da asara plan ti da ni so akiri fini ni.

Jéhovah Nzapa amû na azo ti Israël andia nga na plan ti mbeni temple so a lingbi ala voro lo na yâ ni. Bible atene: “Aye so kue ayeke gbede ti mbeni ye so ayeke ga ande.” (aColossien 2:17). Legeoko tongana mbeni plan, aye ni so ayeke fä ti mbeni ye so ayeke kota mingi.

Na tapande, azo ti Israël ayeke mû lani asacrifice ti nyama ti tene a pardone asiokpari ti ala (Lévitique 17:11). Asacrifice so ayeke lani gbede ti kota sacrifice so a yeke sara ni angu ngbangbo mingi na pekoni; sacrifice so ayeke mû lege na azo ti wara tâ salut.b Plan ti tabernacle nga na temple so azo ti Israël avoro Nzapa na yâ ni lani ayeke fä ti aye so Messie ayeke sara ande, a to nda ni na kuâ ti lo juska na guengo ti lo na yayu.—Bâ tableau so ayeke na lembeti 7.

3 A soro mbeni zo ti lekengo da ti kiri ti leke da ni alingbi na aye so ayeke na yâ ti plan ni.

Jésus ayeke Messie so amû zendo ti lo, lo yeke mû peko ti tapande ti asacrifice so azo ti Israël amû nga lo yeke mû fini ti lo wani ti sö azo. A yeke tongaso si Jean Wabatizengo zo atene Jésus ayeke ‘Molenge ti ngasangbaga ti Nzapa, lo so azi siokpari ti dunia so’. (Jean 1:29). Jésus ayeda ti sara kusala so na bê ti lo wani. Lo tene: “Mbi londo na yayu mbi zu ti sara pëpe ye so bê ti mbi aye, me ti sara ye so bê ti lo so atokua mbi aye.”​—Jean 6:38.

Nzapa aye ti tene Jésus “[a]mû âme ti lo tongana ngere so a futa ti zi na azo mingi.” Lo ye nga ti tene Jésus ate mbele na adisciple ti lo teti mbeni Royaume (Matthieu 20:28; Luc 22:29, 30). Na lege ti Royaume so Nzapa ayeke sara ye so lo leke ti sara ndali ti azo. A iri tënë so a fa na ndo ti Royaume ti Nzapa “nzoni tënë” ndali ti so tënë ni afa so Nzapa azia mbeni ngorogbia na yayu ti komande na ndo ti sese!—Matthieu 24:14; Daniel 2:44.c

Kua ti lekengo aye ti tene akiri fini ni angbâ ti gue

Kozoni si Jésus akiri na yayu, lo mû yanga na adisciple ti lo, lo tene: “Ala sara si azo na popo ti amara kue aga adisciple. Ala batize ala na iri ti Babâ, na ti Molenge na ti yingo vulu . . . Bâ, mbi yeke na tere ti ala juska na lâ ni so aye ti ngoi so ayeke gue ti hunzi.”​—Matthieu 28:19, 20.

Kua so ayeke sara si fini ti azo akiri aga nzoni ahunzi pëpe na ngoi so Jésus akui. A yeke ngbâ ti gue juska na “ngoi so aye ti ngoi so ayeke gue ti hunzi”, ngoi so Royaume ti Nzapa ayeke to nda ti komande na ndo ti sese. Ngoi ni la e yeke dä so. E hinga ni ngbanga ti so fä so Jésus afa ni kozoni awe na ndo ti “ngoi so aye ti ngoi so ayeke gue ti hunzi” aga tâ tënë laso awe.d​—Matthieu 24:3-14; Luc 21:7-11; 2 Timothée 3:1-5.

Laso, na yâ ti akodoro 236, aTémoin ti Jéhovah ayeke sara ye alingbi na yanga so Jésus amû ti fa nzoni tënë ti Royaume ti Nzapa. Biani, a leke mbeti so mo yeke diko so ti mû maboko na mo ti hinga ye mingi na ndo ti Royaume so nga na aye so Royaume ni ayeke sara ande. Na lembeti 2 ti Tour ti Ba Ndo, mo yeke wara tënë so: “Mbeti so . . . a dë bê ti amara kue na nzoni tënë so, so na yâ ti ngoi kete Royaume ti Nzapa (so ayeke mbeni ngorogbia na yayu) ayeke zi aye ti sioni kue na ayeke sara si sese aga paradis. A sara si zo amä na bê na Jésus Christ, so akui si e lingbi ti wara fini ti lakue lakue nga so ayeke komande fadeso tongana Gbia so Nzapa azia lo na ndo ti Royaume so.”

Tâ tënë, ti fadeso mo lingbi ti ngbâ ti mä tënë ti aye so aterroriste asara wala akpale tongana kota pupu, kota ngu-nzapa so abuba aye, wala ye ti ngangu alingbi ti si na mo wani. Me mandango Bible ayeke mû lege na mo ti duti na kite oko pëpe so Nzapa ayeke bi bê ti lo na azo. Na mbage, “lo yeke yongoro na e oko oko kue pëpe.” (Kusala 17:27). Na ndo ni, zendo so lo mû ti kiri ti leke aye so kozo babâ na kozo mama ti e agirisa ni ayeke ga ande biani tâ tënë.​—Ésaïe 55:11.

[Kete tënë na gbe ni]

[Tableau/​Afoto na lembeti 7]

(Ti bâ ni mbilimbili, bâ buku ni)

“A kpa gi tâ ye ni kpango”: Ye so tabernacle aduti lani fä ni

GBALAKA

Nzapa ayeke na ngia ti yeda na sandaga ti Jésus.​—AHÉBREU 13:10-12.

KOTA PRÊTRE

Jésus.​—AHÉBREU 9:11.

1 Na Lango ti Kangango ndo ti Siokpari, kota prêtre amû sandaga ndali ti siokpari ti azo.​—LÉVITIQUE 16:15, 29-31.

1 Na lango 14 ti Nisan ti ngu 33, Jésus amû fini ti lo na sandaga ndali ti e.​—AHÉBREU 10:5-10; 1 JEAN 2:1, 2.

NDO SO AYEKE NZONI-KUE

A kiri a dü Jésus tongana molenge ti Nzapa na lege ti yingo na ngoi so lo yeke lani na ndo ti sese.​—MATTHIEU 3:16, 17; AROMAIN 8:14-17; AHÉBREU 5:4-6.

RIDO

Tere ti Jésus, ye so akangbi lani popo ti fini so ayeke ti sese na fini so ayeke ti yayu.​—1 ACORINTHIEN 15:44, 50; AHÉBREU 6:19, 20; 10:19, 20.

2 Kota prêtre ahon na peko ti rido so akangbi popo ti Ndo so ayeke nzoni-kue na Ndo so ayeke nzoni-kue ahon atanga ni.

2 Na peko ti so lo zingo na kuâ, Jésus ‘ahon na peko ti rido ni’ na lege so lo gue na yayu ti ‘si na gbele Nzapa ndali ti e.’—AHÉBREU 9:24-28.

NDO SO AYEKE NZONI-KUE AHON ATANGA NI

Yayu.​—AHÉBREU 9:24.

3 Kâ na Ndo so ayeke nzoni-kue ahon atanga ni, kota prêtre afi mbage ti mênë ti sandaga ni na gbele arche ti mbele.​—LÉVITIQUE 16:12-14.

3 Na fango ngere ti mênë ti lo so atuku, Jésus amû tâ ye so ayeke kanga ndo ti siokpari ti e.​—AHÉBREU 9:12, 24; 1 PIERRE 3:21, 22.