Osio mvene ni: Tënë ti Nzapa Babâ, Nzapa Molenge, na Nzapa yingo vulu
Tënë so abâ gigi tongana nyen? Mbeni kota bakari atene: “A lingbi ti bâ so a sigigi na tënë so nduru na ngu 400. Tënë so ayeke tâ tënë . . . Tënë ti ‘Nzapa babâ, Nzapa Molenge, na Nzapa yingo vulu’ ti tâ tënë ni, a yeda na ni biani nduru na ngu 400; kozo na ngoi ni so, aChrétien ayeda na ni pëpe nga ala mä na bê na ni pëpe.”—New Catholic Encyclopedia (1967), Mbage 14 ni, lembeti 299.
Mbeni kota bakari ni nde atene: “A sara lani mbeni kota lïngö na gbata ti Nicée na lango 20 ti mai ti ngu 325. A yeke Togbia Constantin si amû li ni nga amû tënë na azo na ngoi ni so; na a yeke lo wani la lo sigigi . . . na kpengba tënë so afa songo so atingbi Christ na Nzapa, so ayeke na yâ ti tënë ti mabe so azo so abungbi ayeda na ni, so atene ‘Christ ayeke oko na Babâ ni.’ . . . Teti so mbeto ti togbia ni asara akota bua ni, ala sû maboko ti ala na gbe ti tënë so, na mingi ti ala asara ni na bê ti ala kue pëpe. Gi akota bua use si ake ti sû maboko ti ala na gbe ni.”—Encyclopædia Britannica (1970), Mbage 6 ni, lembeti 386.
Bible atene ti lo nyen? “Étienne, so asi singo na yingo vulu, ayeke bâ ndo gi na yayu, na lê ti lo atï na ndo ti gloire ti Nzapa nga Jésus so ayeke luti na koti ti Nzapa, na lo tene: ‘Ala bâ, mbi bâ yayu azi na Molenge ti zo ayeke luti na koti ti Nzapa.’ ”—Kusala 7:55, 56.
Ye so Étienne abâ afa nyen? Étienne asi singo na yingo vulu ti Nzapa na lo bâ Jésus “ayeke luti na koti ti Nzapa.” A yeke polele so Jésus aga Nzapa pëpe na pekoni so a zingo lo si lo kiri na yayu, me lo yeke mbeni zo nde na Nzapa. E mä tënë ti mbeni ota zo na tere ti Nzapa na yâ ti versê so pëpe. Atâa so bua Marie-Émile Boismard, so ayeke mbeni oko ti abua so a iri ala aDominicain, agi na yâ ti Bible ti wara aversê so asara tënë ti Nzapa Babâ, Nzapa Molenge, na Nzapa yingo vulu, lo tene na yâ ti buku ti lo À l’aube du christianisme—La naissance des dogmes, lo tene: “Tënë ti Nzapa Babâ, Nzapa Molenge, na Nzapa yingo vulu, . . . a lingbi ti wara ni oko pëpe na yâ ti Fini Testament.”
Togbia Constantin asigigi na tënë so lani ti kaï wuluwulu so ayeke na yâ ti Eglize na ngoi ti lo. Ye oko, tënë so akiri adü mbeni tënë nde: Marie, wali so adü Jésus, ayeke “Mama ti Nzapa”?
Bâ nga aversê so: Matthieu 26:39; Jean 14:28; 1 aCorinthien 15:27, 28; aColossien 1:15, 16
TÂ TËNË NI AYEKE SO:
Tënë ti Nzapa Babâ, Nzapa Molenge, na Nzapa yingo vulu abâ gigi nduru na ngu 400
[Lingu ti foto na lembeti 7]
Museo Bardini, Florence