Ota mvene ni: Anzoni zo kue ayeke gue na yayu
Tënë so abâ gigi tongana nyen? Na peko ti kuâ ti abazengele ti Jésus, ti londo na ngu 101 ti ga na ni, azo ayeke bâ lani atënë ti akota zo ti Eglize na nene ni mingi. Âdu ti aye so ala yeke fa, mbeni kota bakari (New Catholic Encyclopedia (2003), Mbage 6 ni, lembeti 687) atene: “Mingi ti ye so ala yeke fa lani ayeke so ala tene na peko ti so a sara aye nde nde so a hunda ti sara na peko ti kuâ ti mbeni zo ti zi sioni so angbâ na tere ti lo, hio tongaso âme ti zo ni ayeke gue ti duti na nzoni ndo na yayu.”
Bible atene ti lo nyen? “Ngia ayeke na ala so ayeke sara ye na ngangu pëpe, teti fade sese ayeke ga ti ala.”—Matthieu 5:5.
Atâa so Jésus atene lani na adisciple ti lo so lo yeke gue ti “leke mbeni ndo” ndali ti ala na yayu, lo tene mbeni ye ti fa so a yeke anzoni zo kue pëpe si ayeke gue na yayu (Jean 3:13; 14:2, 3). Bâ so lo sambela lani ti tene a sara ye so bê ti Nzapa aye, “na yayu legeoko nga na ndo ti sese.” (Matthieu 6:9, 10). Ti tâ tënë ni, a leke aye use ndali ti azo ti mbilimbili. Mbeni kete wungo ti ala ayeke gue ti komande na yayu legeoko na Christ, me atanga ni kue ayeke wara ande fini ti lakue lakue na ndo ti sese ge.—Apocalypse 5:10.
A si na mbeni ngoi, bango ndo ti Eglize ti ândö na ndo ti kua ti lo na ndo ti sese ge achangé. Ye ti pekoni ayeke so wa? Mbeni kota bakari (The New Encyclopædia Britannica) atene: “Yeke na yeke, Eglize amû fadeso place ti Royaume ti Nzapa so azo ayeke ku ni.” Eglize ato nda ti sara si gere ti lo agbu sese na lege so lo yôro tere ti lo na yâ ti poroso, na lo ke tënë so Jésus atene polele atene a lingbi adisciple ti ni aduti “ti dunia so pëpe”. (Jean 15:19; 17:14-16; 18:36). Na bango ngangu so Constantin Togbia ti Rome ayeke na ni na ndo ti aye, Eglize achangé ambeni ye so lo mä na bê na ni; mbeni oko ti aye ni so andu Nzapa ayeke tongana nyen.
Bâ nga aversê so: Psaume 37:10, 11, 29; Jean 17:3; 2 Timothée 2:11, 12
TÂ TËNË NI AYEKE SO:
Mingi ti anzoni zo ayeke wara ande fini ti lakue lakue na ndo ti sese, me na yayu pëpe
[Lingu ti foto na lembeti 6]
Art Resource, NY