Nginza ayeke gunda ti tâ ngia?

A DÜ Sonia na Espagne. Tongana lo de kete, lo na mama ti lo ayeke gue na abungbi ti aTémoin ti Jéhovah. Me tongana lo kono, lo gue na gbata ti Londres, na Angleterre, kâ lo to nda ti sara kua na yâ ti mbeni kota ndokua so abâ tënë ti nginza.

Sonia aye kua ti lo mingi. Lo wara nginza dä mingi na aclient ti lo amû na lo gbâ ti nginza ti sara na kua ndali ti ala. A yeke pendere kua mingi na lo maï na yâ ni mingi. Lâ oko oko, Sonia ayeke sara kua ngbonga 18 na lo yeke lango gi ngbonga use wala ota na bï. Lo mû bê ti lo kue na kua ni. Mbeni lâ, ye ti ngangu asi na lo na ye kue achangé na yâ ti fini ti lo. Sonia awara mbeni ngangu kobela so aga peut-être na lege ti akua so lo sara ahon ndo ni. Lo yeke gi na ngu 30 senge.

Mbage ti tere ti Sonia kue akui na awanganga ahinga pëpe wala lo yeke kiri ti sara tënë ande. Mama ti lo ague hio na Angleterre ti bâ lege ti lo. Na ngoi so Sonia akomanse ti tambela, mama ti lo atene na lo: “Mbi yeke gue na bungbi, mo ga e gue teti mbi lingbi ti zia mo ngbâ mo oko pëpe.” Sonia ayeda ti gue. Nyen la asi na pekoni?

Sonia atene: “Ye kue so mbi mä kâ ayeke tâ tënë. A yeke pendere mingi. Mbi yeke na ngia ti yeda ti manda Bible na mbeni oko ti azo mingi so abara mbi na kozo guengo ti mbi na Da ti Royaume. Angbene kamarade ti mbi azia ti ga ti bâ mbi, me afini kamarade ti mbi aye mbi na ala bi bê ti ala na mbi.”

Yeke na yeke Sonia akiri asara tënë, na lo gue nga na li ni hio mingi na yâ ti mandango Bible ti lo. Lo manda Bible ni asara ngu oko pëpe lo wara batême. Mingi ti afini kamarade ti lo ayeke na yâ ti kusala ti fango tënë ti Nzapa na ngoi kue, na lo bâ ngia so ala yeke na ni. Sonia atene: ‘Mbi ye nga ti ga tongana ala, mbi ye ti mû nzoni ye kue so mbi yeke na ni na Jéhovah!’ Sonia aga fadeso wafango tënë ti Nzapa na ngoi kue.

Sonia amanda nyen na ndo ti ye so asi na lo? Lo tene: “Atâa so mbi wara gbâ ti nginza, ngangu so kua ni asara na ndo ti mbi nga na siriri so atia mbi asara si mbi gi bê ti mbi na mbi yeke na ngia pëpe. Mbi bâ so ye so ayeke kota mingi na yâ ti fini ayeke ti duti na nzoni songo na Babâ ti mbi ti yayu, Jéhovah. Mbi yeke fadeso na ngia biani.”

Bazengele Paul atene: “Ndoye ti nginza ayeke gunda ti asioni ye nde nde kue; na gingo ti wara mara ti ndoye so, ambeni ahon yongoro na mabe na ala kpo tere ti ala na aye ti vundu mingi.” (1 Timothée 6:10). Na lege ti aye so asi na lo, Sonia alingbi ti tene so tënë so ayeke tâ tënë.