Ti duti wayere afa so Nzapa ake mo awe?
NZAPA atene ândö na amolenge ti Israël: “Fade wanzinga oko ayeke na popo ti i pëpe.” A yeke ngbanga ti so na yâ ti Ndia so lo mû na ala, lo hunda ti bâ lege ti awayere na même ti zi kiri na li ti ala (Deutéronome 15:1-3, 5, 7-10). Tongaso, a lingbi fade ti wara wayere oko na popo ti azo ti Israël pëpe, teti Jéhovah amû zendo ti iri tënë nzoni na ndo ti ala. Ye oko, ala lingbi ti wara tënë nzoni so gi tongana ala sara ye alingbi na Ndia, ye so azo ti Israël asara pëpe.
Me, ye so aye pëpe ti tene so Nzapa aye azo so ayeke na ye mingi ahon ala so ayeke na ye mingi pëpe. Mingi ti awakua be-ta-zo ti Nzapa ayeke awayere. Prophète Amos ayeke lani gi mbeni senge berger na zo ti fango yaka (Amos 1:1; 7:14). Na ngoi ti prophète Élie, na ngoi so mbeni kota nzara atï na kodoro ti Israël, a yeke mbeni womua so ayeke zo ti mawa si abata Élie; womua ni ayeke na kete fuku na mafuta so Nzapa asara si ahunzi pëpe na ngoi ti kota nzara ni kue. Atâa Élie wala womua so aga nga zo ti mosoro pëpe; Jéhovah amû na ala gi ye so ala yeke na bezoin ni.—1 aGbia 17:8-16.
Aye so zo ayeke ku tere ti lo na ni pëpe alingbi ti sara si zo aga wayere. Ndao na kobela alingbi ti kanga lege teti kete ngoi wala biani biani na mbeni zo ti sara kua. Kuâ alingbi nga ti sara si ambeni zo aga nyindu wala womua. Aye ti sioni so kue afa pëpe so Nzapa ake mbeni zo awe. Mbaï ti Naomi na Ruth ayeke mbeni tapande so apika bê so afa tongana nyen Jéhovah, na ndoye, abâ lege ti azo so ye atia ala. Atâa so Naomi na Ruth ayeke na ye pëpe na peko ti kuâ ti akoli ti ala, Jéhovah Nzapa airi tënë nzoni na ndo ti ala na mungo na ala ye so ala yeke na bezoin ni.—Ruth 1:1-6; 2:2-12; 4:13-17.
A yeke polele so tongana mbeni zo ayeke na yâ ti yere aye ti tene pëpe so Nzapa ake lo awe. Azo so ayeke be-ta-zo na Jéhovah Nzapa alingbi ti zia bê ti ala na tënë ti Gbia David so lo tene: “Mbi yeke pendere giriri, na fadeso mbi yeke mbakoro; me mbi bâ Nzapa azia zo ti mbilimbili lâ oko pëpe, wala ahale ti lo ahunda kobe pëpe na lege ti [iringo] ye.”—Psaume 37:25.
[Foto na lembeti 8]
Atâa so Naomi na Ruth ayeke awayere, Jéhovah airi tënë nzoni na ndo ti ala na lo bata ala na ndoye