Mungo maboko na mba asara si sewa amaï na lege ti yingo
SARANGO kua maboko na maboko ayeke kota ye ndali ti azo so aye si sewa ti ala amaï na lege ti yingo. Na ngoi so Jéhovah asara kozo koli na kozo wali, lo fa na ala so a yeke kota ye ti tene ala sara kua maboko na maboko. A lingbi Ève so “alingbi” na Adam asara kua na lo maboko na maboko (Gen. 2:18). A yeke nzoni na yâ ti mariage, koli na wali asara kua maboko na maboko, na ala mû maboko na mba (Zo-ti. 4:9-12). Ti tene ababâ na amama na amolenge asara aye so Jéhovah aku na mbage ti ala, a lingbi ala sara kua maboko na maboko.
Vorongo Nzapa na sewa
Barry na Heidi ayeke na amolenge oku. Ala bâ so mandango Bible lakue na sewa amû maboko na sewa ti ala ti maï na lege ti yingo. Barry atene: “Ndali ti mandango ye na sewa, ngoi na ngoi mbi yeke mû na amolenge ni adevoir ti sarango ni. Mbi lingbi ti hunda na ala ti leke acommentaire so aluti na ndo ti a-article ti Réveillez-vous! E yeke sara nga adémonstration na ndo ti aye so e lingbi ti tene na fango tënë si molenge oko oko kue ahinga ye so lo lingbi ti tene ande.” Heidi atene: “E kue e yeke na molongo ti aye so e ye ti sara si e maï na lege ti yingo; na ngoi na ngoi, e yeke kiri na ndo ni na ngoi ti mandango ye na sewa ti mû lege na e ti bâ aye wa e sara awe.” Koli na wali so abâ so ti mû ambeni bï sân ti bâ télé ayeke mû lege na sewa ni kue ti wara ngoi ti diko ye.
Abungbi ti congrégation
Mike na Dénise ayeke lani na amolenge osio na gbe ti ala. Na lege wa sarango kua maboko na maboko aga na ye ti nzoni na sewa ti ala? Mike atene: “Na ambeni ngoi, même mbeni kapa so a leke ni tâ nzoni alingbi ti tï na ngu, me e bâ so mungo maboko na mba asara si e yeke si na abungbi na l’heure.” Dénise atene: “Na ngoi so amolenge ni ayeke kono, ala oko oko kue ayeke na akua ti da ti sarango ni. Kim, kota molenge ti e ti wali, ayeke mû maboko na mbi na yâ ti kua ti tongo ye nga na lekengo table.” Michaël, molenge ti ala ti koli adabe ti lo, na lo tene: “Lakue na mardi na lakui, a yeke sara bungbi na da ti e. Ni la, e yeke leke yâ ti da, e yeke balêe ni nga e yeke leke aye ti duti.” Matthieu, mbeni molenge ti ala ti koli, atene: “Na alango ti bungbi, Papa ayeke sara kue ti zia kua ti kiri hio na yanga-da ti mû maboko na e ti leke tere ti e ndali ti bungbi.” Ye ti pekoni ayeke so wa?
Anzoni ye ti pekoni
Mike atene: “Na ngu 1987, mbi na Dénise e to nda ti kua ti pionnier. Na ngoi ni so, ambeni molenge ti e ota angbâ lani na gbe ti e. Use na popo ti ala aga nga apionnier, na atanga ni amû mbage na yâ ti kua ti lekengo ada ti Béthel. Mbeni ngia so sewa ti e akiri awara ayeke so e wara lege ti mû maboko na azo 40 ti mû tere ti ala na Jéhovah na ti wara batême. Sewa ti e awara nga lani pasa ti bungbi oko ti sara akua ti lekengo ada ti Béthel na ti abungbi na kodoro so e yeke dä, na même na ambeni kodoro nde.”
Biani, sarango kua maboko na maboko na yâ ti sewa ayeke ga na aye ti nzoni. Mo bâ ambeni lege so mo lingbi ti sara kua maboko na maboko na azo ti yâ ti sewa ti mo? Hinga biani so sarango kua maboko na maboko ayeke mû maboko na sewa ti maï na lege ti yingo.
[Foto na lembeti 29]
Sarango adémonstration ayeke sara si azo ahinga ti fa tënë nzoni