Soro laso ye so ayeke si na mo kekereke
“Nzapa acréé zo na image ti Lo mveni, na image ti Nzapa Lo créé lo; Lo créé ala koli na wali.”—Genèse 1:27.
ATËNË so, so azo ahinga ni mingi, so a sû na yâ ti kozo chapitre ti Bible afa oko ti akota ye so Nzapa ‘asara si a ga pendere na ngoi ni.’ Lo mû fini na kozo koli Adam na kozo wali Ève; na ala lingbi kue (Zo-ti-fa-tene 3:11). Jéhovah Nzapa so ayeke Wasarango ala atene na ala: “I dü amolenge mingi, i wu, i si singo na sese, i sara si ye kue aga na gbe gere ti i; i komande asusu ti kota ngu ti ingo, andeke ti nduzu, na ye ti fini kue so atambela na ndo sese.”—Genèse 1:28.
Na lege ti atënë so Nzapa atene na kozo koli na kozo wali, lo fa na ala ye so lo ye ti sara. Lo hunda na ala ti tene ala dü, ala ga mingi na ala bâ lege ti sese, ti sara si sese ni kue aga mbeni paradis so ala na amolenge ti ala ayeke duti na yâ ni. Nzapa adiko kozoni awe pëpe mbeni ngoi so ala yeke kui. Me, Nzapa azia na gbele ala mbeni pendere gigi ti kekereke. Tongana ala soro ye na lege ni nga ala ngbâ ti sara ye so bê ti Nzapa aye, ala yeke duti ande na siriri nga na ngia teti lakue lakue.
Ala soro ye na lege ni pëpe, na ye ti pekoni ayeke so azo kue ayeke ga mbakoro na ala yeke kui. Biani, Job ayeda na tënë so, tongana lo tene: “Zo so wali adü lo ayeke na lâ mingi pëpe, na vundu ti lo asi singo.” (Job 14:1). Ye wa atambela lani nzoni pëpe?
Bible atene: “Na lege ti zo oko siokpari alï na yâ ti dunia so, na lege ti siokpari kuâ aga, tongaso kuâ amû azo kue ngbanga ti so ala kue asara fade siokpari.” (aRomain 5:12). Biani, “zo oko” ni so ayeke Adam; lo ke na mbana ti sara ye alingbi na yanga so Nzapa amû na lo, so ayeke polele (Genèse 2:17). Na sorongo ti sara tongaso, Adam azia lege so azi na lo ti ngbâ na fini teti lakue lakue na yâ ti paradis na ndo ti sese. Lo sara nga si amolenge ti lo awara pëpe fini ti lakue lakue tongana ye ti héritier nga lo sara si ngbanga ti siokpari na kui atï na li ti ala. Na bango ni zo alingbi ti tene so ala girisa ye kue awe. Me a yeke tongaso biani?
Ngoi so ye kue ayeke kiri ti ga fini
Angu saki mingi na pekoni, yingo ti Nzapa apusu zo ti sungo psaume ti tene: “Sese ni aga ye ti héritier ti azo ti mbilimbili, na fade ala duti dä lakue.” (Psaume 37:29). Ti fa biani so zendo so Nzapa amû na yaka ti Éden ayeke ga ande tâ tënë, Mbeti ti Nzapa afa pendere mingi ye so Nzapa ayeke sara na yâ ti kete ngoi, atene: “Fade lo yeke mbô ngu ti lê kue na lê ti ala, kuâ ayeke duti ande dä mbeni pëpe; mua, wala toto, wala pasi ayeke duti dä mbeni pëpe. Angbene ye ni ahon ti ala awe.” Na pekoni, Nzapa lo wani atene: “Bâ, mbi yeke sara si aye kue aga fini.”—Apocalypse 21:4, 5.
Teti so ngoi ti sarango ye oko oko kue ayeke dä, hundango tënë ni ayeke so: Ngoi so ye kue ayeke kiri ti ga fini ayeke si ande lawa, ti tene apendere zendo so Nzapa amû aga tâ tënë? A-Témoin ti Jéhovah, so asigigi na mbeti-sango so asara kue ti tene azo ahinga so e yeke fadeso na mbeni ngoi so Bible airi ni “alango ti nda ni,” na so ngoi ni aga nduru mingi awe ti tene Nzapa ‘asara si aye kue aga fini.’ (2 Timothée 3:1). E hunda mingi na mo ti manda Bible ti hinga apendere ye so alingbi ti ga ti mo. E hunda nga mingi na mo ti yeda na tisango ndo so atene: “I gi L’Éternel [na ngoi so] i lingbi wara Lo; i di iri ti Lo [na ngoi so] Lo yeke nduru.” (Ésaïe 55:6). Ahon ti bâ so a diko kozoni awe aye so ayeke si na yâ ti gigi ti mo, fini ti mo nga na beku ti mo ti fini ti lakue lakue aluti na ndo ti ye so mo soro ti sara.
[Kete tënë na lembeti 8]
“Bâ, mbi yeke sara si aye kue aga fini”