E bâ ye si e mä na bê na ni?

“Ambeni zo atene so zo alingbi pëpe ti hinga tâ tënë na ndo ti Nzapa nga na ndo ti gigi ti kekereke tongana ti so abungbi ti nzapa ti aChrétien nga na ambeni bungbi ti nzapa nde ayeke bi bê ti ala na ni. Même tongana zo alingbi ti hinga ni, lo lingbi pëpe ti hinga ni na ndembe so e yeke dä.”​—ATËNË TI BERTRAND RUSSELL, MBENI WANDARA, NA NGU 1953.

ZO SO asigigi na mara ti bibe tongaso ayeke mbeni zo ti gingo nda ti ye na ndo ti anyama. Iri ti lo ayeke Thomas Huxley. A dü Huxley na ngu 1825. Lo yeke mbeni zo ti ngoi ti Charles Darwin nga lo yeke mbeni zo so ayeda ngangu mingi na fango ye so atene zo abâ gigi na lege ti nyama. Na ngu 1863, Huxley asû na yâ ti mbeti ti lo, lo tene so lo bâ ye oko pëpe so afa so mbeni Nzapa ayeke dä so “andoye e nga so abâ lege ti e tongana ti so abungbi ti nzapa ti aChrétien ayeke fa ni.”

Azo mingi laso ayeke yeda na bibe ti azo so, so asara ngangu mingi na ndo ti bibe ti amba ti ala. Ala yeke tene so ala yeke mä na bê gi na aye so ala lingbi ti bâ ni na lê ti ala. Ala lingbi ti tene so a yeke ye ti buba ti mä na bê na mbeni zo wala na mbeni ye so ye oko afa pëpe so zo ni wala ye ni ayeke dä biani.

Bible ahunda na e ti mä na bê na Nzapa gi tongaso sân ti gi ti hinga wala lo yeke dä? Bible ahunda na e ti sara tongaso pëpe. Bible afa so tongana e mä na bê na ye so azo atene sân ti gi ti bâ wala tënë ni ayeke tâ tënë, ye so e sara ayeke ye ti buba. Bible atene: “Zo so li ti lo ayeke dä pëpe, lo yeda na tënë kue, me zo ti ndara abata lege ti lo nzoni.”​—aProverbe 14:15.

Ka ti tënë ti mango na bê na Nzapa, a yeke tongana nyen? Mbeni ye ayeke dä so afa biani so Nzapa ayeke dä? Nga, mbeni ye ayeke dä so afa so lo ndoye e na lo yeke bâ lege ti e?

Azo ayeke bâ asarango ye ti Nzapa polele

Na ngoi so Paul, so ayeke mbeni zo ti sungo Bible ayeke sara lani tënë na azo ti Athènes so ahinga mbeti mingi, lo tene so Nzapa “asara sese na ye kue so ayeke na yâ ni”. Paul atene na azo so ayeke mä lo, so ayeke azo ti dengo kite, so Nzapa ayeke bi bê ti lo na azo nga so “Lo yeke yongoro pëpe na e oko oko kue”.​—Kusala 17:24-27.

Nyen la afa na Paul so Nzapa ayeke biani dä na so lo yeke bi bê ti lo na azo so lo créé ala? Paul afa mbeni raison ni na ngoi so lo tokua lettre na amba ti lo aChrétien so ayeke na gbata ti Rome. Lo tene na ndo ti Nzapa, lo tene: “A komanse na lâ ni so Nzapa acréé sese so, azo ahinga ye ti Lo so lê abâ pëpe, . . . azo ahinga ye so mbilimbili na lege ti ye so Lo sara awe.”​—aRomain 1:20.

Na yâ ti alembeti ti peko, e yeke bâ ande asarango ye ota so Nzapa ayeke na ni, so azo alingbi ti bâ ni polele na yâ ti aye so lo créé. Na ngoi so mo yeke bâ atapande so, hunda tere ti mo: ‘Mandango ye na ndo ti asarango ye ti Nzapa so andu mbi tongana nyen?’

[Kete tënë na lembeti 3]

Bible ahunda na e pëpe ti mä na bê na Nzapa gi tongaso