Sarango mariage nga dungo molenge na ngoi ti nda ni so

“Lâ ade mingi pëpe.”—1 ACOR. 7:29.

1. (a) Agbiango ye wa ayeke na popo ti ‘aye ti ngangu’ so ayeke si na azo laso? (b) Ngbanga ti nyen ti bi bê ti e na ndo ti gbiango ye so ayeke si na yâ ti sarango ye ti azo ti sewa?

MBETI TI NZAPA afa kozoni awe so na “lâ ti nda ni so”, fade azo ayeke sara bira na popo ti ala, sese ayeke yengi, nzara nga na akobela so ayeke fâ gbâ ti azo ayeke mû ndo (Dan. 8:17, 19; Luc 21:10, 11). Bible afa nga polele so na ngoi ti nda ni so, so ayeke mbeni kpengba ngoi na yâ ti mbaï ti azo, fade aye ayeke changé ande mingi na yâ ti dutingo ti azo. Fade akota gbiango ye na yâ ti asarango ye ti azo ti yâ ti sewa ayeke duti na popo ti aye so azo ayeke wara na “lâ ti nda ni”. (2 Tim. 3:1-4). Ngbanga ti nyen ti bi bê ti e na ndo ti akota gbiango ye so? Ngbanga ti so a mû ndo kue nga a yeke sara ngangu mingi na ndo ti azo, na ye so alingbi nga ti sara ngangu na ndo ti lege so aChrétien ayeke bâ na tënë ti mariage nga na dungo molenge. A yeke sara ngangu na ndo ti aChrétien na alege wa?

2. Bango ndo wa mingi ti azo ayeke na ni na ndo ti mariage nga na divorce?

² Laso na ndo kue, a yeke ngangu pëpe na azo ti sara divorce. Na ndo ni, na yâ ti akodoro mingi, wungo ti azo so asara divorce ayeke gue gi guengo na li ni. Ye oko, a yeke nzoni e girisa pëpe so bibe ti Jéhovah ayeke tâ nde mingi na bibe so mingi ti azo ayeke na ni na ndo ti mariage nga na divorce. Tongaso, bibe ti Jéhovah na ndo ti atënë so ayeke so wa?

3. Jéhovah na Jésus Christ abâ mariage tongana nyen?

³ Jéhovah aku ti tene azo so asara mariage awe asara ye alingbi na zendo so ala mû na ngoi ti mariage ti ala. Na ngoi so Jéhovah abungbi kozo koli na kozo wali na yâ ti songo ti mariage, lo tene so ‘fade zo aduti na wali ti lo; fade ala ga mitele oko.’ Na pekoni, Jésus Christ akiri na ndo ti oko tënë so na lo zia mbeni tënë na ndo ni, lo tene: “Tongaso ye so Nzapa abungbi awe, zia zo akangbi pëpe.” Jésus akiri atene: “Zo so azia wali ti lo, tongana a yeke tënë ti ye ti pitan pëpe, na lo kamata mbeni wali, lo sara lango-sioni.” (Gen. 2:24; Mat. 19:3-6, 9). Tongaso, Jéhovah nga na Jésus abâ songo so atingbi koli na wali ti lo na yâ ti mariage tongana mbeni ye so ayeke ngbâ lakue, na songo so ayeke hunzi gi na ngoi so mbeni oko akui (1 aCor. 7:39). Ndali ti so Nzapa la asara si mariage abâ gigi, a lingbi azo abâ sarango divorce tongana mbeni senge ye pëpe. Ti tâ tënë ni, Bible afa so Jéhovah ake ti tene azo asara divorce ndali ti mbeni raison so Bible amû lege na zo pëpe ti sara divorce ndali ni.a​—Diko Malachie 2:13-16; 3:6.

Bâ mariage tongana mbeni kota ye

4. Ngbanga ti nyen ambeni Chrétien so ade maseka abâ so ala mû nzoni desizion pëpe tongana ala dö tere ti sara mariage?

⁴ Mingi ti azo laso ayeke bi bê ti ala ahon ndo ni na ndo ti tënë ti bungbingo ti koli na wali. Na yâ ti lango oko oko, a yeke ngangu pëpe ti tene zo abâ gbâ ti alimon nga na afoto so andu bungbingo ti koli na wali. Zo alingbi pëpe ti dë kite so aye so a yeke fa ayeke sara ngangu na ndo ti zo, mbilimbili na ndo ti amaseka so e ye ala mingi na yâ ti kongregation. A yeke nzoni aChrétien so ade maseka asara ye tongana nyen na gbe ti sioni ngangu so, so alingbi ti zia nzara ti bungbingo ti koli na wali na bê ti ala atâa so ala yeke gi ti ke sioni nzara so? Ti gi ti hon ndo ni, ambeni maseka ayeke sara mariage hio mingi. Ala pensé so sarango tongaso ayeke mû lege na ala ti kpe ti tï na yâ ti lango-sioni. Ye oko, kete na pekoni, ambeni mingi abâ so ala mû nzoni desizion pëpe. Ndali ti nyen? Ndali ti so kete na peko ti ngia so ala wara ti sara mariage, ala bâ so na yâ ti aye so ala yeke sara lâ oko oko, aye so agbu bê ti ala ayeke nde nde. Ni la, akoli na awali so mariage ti ala ayeke tongaso ayeke na kota kpale.

5. Nyen la ayeke mû maboko na mbeni koli na wali ti lo ti ngbâ ti sara ye alingbi na zendo so ala mû na ngoi ti mariage ti ala? (Bâ nga kete tënë na gbe ni.)

⁵ Ti sara mariage na mbeni zo, même na mbeni mba ti mo Chrétien, na ti bâ na pekoni so sarango ye ti lo ayeke tâ nde na ti so mo ku tere ti mo na ni alingbi ti duti mbeni ngangu kpale ndali ti mo (1 aCor. 7:28). Ye oko, atâa ye ni ayeke ngangu tongana nyen, atâ Chrétien ahinga so tongana ala yeke na ngia na yâ ti mariage ti ala pëpe, nzoni lege ti leke kpale ni ayeke pëpe ti sara divorce ndali ti mbeni raison so Bible ayeda na ni pëpe. Ni la, azo so ayeke sara ngangu ti bata songo ti mariage ti ala ndali ti so ala ye ti ngbâ ti sara ye alingbi na zendo so ala mû na ngoi ti mariage ti ala alingbi biani ti tene aita ti yâ ti kongregation ane ala nga amû maboko na ala.b

6. A yeke nzoni aChrétien so ade maseka abâ sarango mariage tongana nyen?

⁶ Mo de maseka nga ade mo sara mariage pëpe? Tongana a yeke tongaso, a yeke nzoni mo bâ tënë ti sarango mariage tongana nyen? Mo lingbi ti kpe ti wara vundu tongana mo ku juska mo kpengba koli wala mo kpengba wali, mo gbu li ti mo nzoni nga mo kpengba na lege ti yingo si mo to nda ti bâ tere na mbeni Chrétien ndali ti mariage. Biani, Bible afa pëpe ngu so ayeke nzoni zo awara ni awe si lo sara mariage.c Ye oko, Bible afa so a yeke nzoni mo ku juska kota nzara so amaseka ayeke na ni ti bungbi koli na wali akiri na peko. Ndali ti nyen? Ndali ti so kota nzara ti bungbingo koli na wali alingbi ti sara si mo gbu li ti mo nzoni pëpe. A lingbi nga ti sara si mo mû adesizion ti ndara pëpe na mo wara vundu ande na pekoni. Girisa pëpe so awango ti ndara so Jéhovah amû na yâ ti Bible na ndo ti mariage ayeke ndali ti nzoni ti mo nga ayeke sara si mo duti na ngia.​—Diko Esaïe 48:17, 18.

Dutingo babâ wala mama ayeke kota kua

7. Nyen la ayeke si na ambeni maseka so asara mariage? Ngbanga ti nyen ye so alingbi ti dü tënë na popo ti ala?

⁷ Ambeni koli na wali so asara mariage na ngoi so ala de maseka mingi adü molenge atâa so ade ala kpengba koli wala wali kue pëpe. Ndali ti so ala dü hio mingi, ala yeke na ngoi pëpe ti gi ti hinga mba nzoni. Na ndo ni, bango lege ti molenge ahunda ngoi mingi na zo. A yeke na lege ni ti tene mbeni mama amû ngoi mingi ti bâ lege ti molenge ti lo. Ye oko, sarango tongaso ayeke sara peut-être si babâ ti molenge ni so ade maseka mingi asara mbanda. Na ndo ni, tongana mbeni babâ na mama amû ngoi mingi ti bâ lege ti molenge ti ala na bï na ala lango nzoni pëpe, ye so alingbi ti dü tënë na popo ti ala. Hio tongaso, koli na wali ni so ade maseka mingi abâ so bango lege ti molenge ni akanga lege na ala ti sara ye so bê ti ala aye. Ala lingbi fadeso pëpe ti gue na ando so ala yeke gue dä kozo wala ti sara aye so ala yeke sara kozo. Ka so dutingo ti ala achangé awe so, a yeke nzoni ala bâ ni tongana nyen?

8. A yeke nzoni zo abâ dutingo babâ wala mama tongana nyen? Ngbanga ti nyen?

⁸ Legeoko tongana ti so a yeke nzoni zo abâ sarango mariage tongana mbeni senge ye pëpe, a yeke nzoni zo abâ dutingo babâ wala mama tongana mbeni kota kua so Nzapa amû na lo. Atâa aye wa achangé na yâ ti dutingo ti mbeni koli na wali ti lo so ayeke aChrétien na ngoi so ala dü molenge, a yeke nzoni ala sara ngangu ti leke dutingo ti ala si a mû lege na ala ti bâ lege ti molenge ti ala nzoni. Ndali ti so Jéhovah la asara si azo alingbi ti dü amolenge, a lingbi ababâ na amama abâ molenge so ala dü lo fini fini tongana “ye ti héritier so L’Eternel amû na zo.” (Ps. 127:3). Ni la, mbeni babâ wala mbeni mama so ayeke Chrétien ayeke sara ngangu ti sara akua so a mû na ‘ababâ na amama na yâ ti Seigneur’.​—aEph. 6:1.

9. (a) Batango molenge andu nyen? (b) Nyen la mbeni koli alingbi ti sara ti mû maboko na wali ti lo ti ngbâ ngangu na lege ti yingo?

⁹ Batango molenge ahunda ti tene zo azia lege ti sarango ambeni ye teti angu mingi. A hunda ti tene ababâ na amama amû ngoi ti ala mingi nga na ngangu ti ala mingi ti bâ lege ti molenge ni. A lingbi mbeni koli so ayeke Chrétien ahinga so teti angu mingi na pekoni so ala dü molenge ti ala, wali ti lo ayeke wara ande peut-être lege pëpe ti mä ye nzoni na ngoi ti abungbi. Na ndo ni, lo lingbi peut-être pëpe ti wara ngoi mingi ti manda Bible lo wani nga ti gbu li na ndo ni. Ye so alingbi ti sara si lo woko na lege ti yingo. Mbeni koli so abâ na nene ni aye so a ku na mbage ti ababâ ti molenge ayeke sara ye so lo lingbi ti sara ti bâ lege ti molenge ni. Lo yeke gi ti mû maboko na wali ti lo na lege so lo yeke sara lisoro na lo na yanga-da na ndo ti ambeni ye so wali ti lo amä pëpe na ngoi ti abungbi. Lo lingbi nga ti bâ lege ti molenge ti ala ti sara si wali ti lo awara ngoi nzoni ti sigigi na fango tënë.​—Diko aPhilippien 2:3, 4.

10, 11. (a) Zo ayeke sara tongana nyen ti ‘fa lege na amolenge na wango ti Seigneur’? (b) Ngbanga ti nyen a lingbi a gonda ababâ na amama so ayeke aChrétien?

¹⁰ Dutingo nzoni babâ wala mama ahunda ye mingi ahon gi ti mû kobe na molenge, ti vo na lo bongo, ti sara si lo lango na nzoni ndo nga ti bâ lege ti seni ti lo. Ndali ti so e yeke na yâ ti mbeni ngoi ti ngangu, gi na ngoi so amolenge ade kete, a lingbi a fa na ala ti sara ye na yâ ti fini ti ala ague oko na akpengba-ndia ti Nzapa. A lingbi a “fa lege na ala na wango ti Seigneur.” (aEph. 6:4). “Wango” so andu sarango si mbeni molenge ahinga apensé ti Jéhovah a to nda ni na ngoi so lo de kete juska lo kpengba koli wala wali.​—2 Tim. 3:14, 15.

¹¹ Tongana Jésus ahunda lani na adisciple ti lo ti “fa tënë na amara kue si ala ga adisciple,” lo ye biani lani ti tene so a lingbi ababâ na amama amû maboko na amolenge ti ala ti ga adisciple (Mat. 28:19, 20). A yeke ngangu ti sara tongaso ndali ti so azo so ayeke na gbe ti ngangu ti Satan ayeke gi ti sara ngangu na ndo ti amaseka. Ni la, ababâ na amama so asara si amolenge ti ala aga aChrétien so amû tere ti ala na Nzapa awe alingbi biani ti tene aita kue ti yâ ti kongregation agonda ala. Mabe ti ababâ na amama so nga bango na nene ni kua so Nzapa amû na ala asara si ala ‘hon’ na ngangu ye so azo ti sioni ayeke gi ti sara na ndo ti amolenge ti ala.​—1 Jean 5:4.

Nzoni raison apusu ala ti ngbâ kumbamba wala ti dü pëpe

12. Ngbanga ti nyen ambeni Chrétien asoro ti ngbâ kumbamba teti mbeni ngoi?

¹² Ndali ti so “lâ ade mingi pëpe” nga “ye ti sese so [ayeke gbian, MN ]”, Bible awa e ti gi ti bâ aye ti nzoni so Chrétien ayeke wara tongana lo ngbâ kumbamba (1 aCor. 7:29-31). Ni la, ambeni Chrétien asoro ti ngbâ kumbamba na yâ ti fini ti ala kue wala teti ambeni ngu kozoni si ala sara mariage. Ye ti nzoni ni ayeke so aChrétien so amû ngoi so ala ngbâ kumbamba ti sara na ye so bê ti ala wani aye pëpe. Ambeni mingi angbâ kumbamba ti mû lege na ala ti sara na Jéhovah sân ti ‘gi bê ti ala na mbeni ye’ nde. (Diko 1 aCorinthien 7:32-35.) Ambeni Chrétien so ayeke kumbamba ayeke sara kua ti pionnier wala ala yeke sara kua na Béthel. Ambeni ayeke gi ti kono yâ ti kusala ti ala na yâ ti bungbi ti Jéhovah na lege so ala yeke gi ti sara aye so a hunda ti mû lege na ala ti gue na Ekole ti Formation Ministérielle. Ambeni Chrétien amû ambeni ngu ti sara kua ti ngoi kue na ngoi so ala ngbâ kumbamba, na pekoni ala sara mariage. Fani mingi, aChrétien so abâ so aye so ala manda na ngoi so ala ngbâ lani kumbamba angbâ lakue ti mû maboko na ala na yâ ti mariage ti ala.

13. Ngbanga ti nyen ambeni Chrétien so asara mariage awe amû desizion ti dü pëpe?

¹³ Na yâ ti ambeni kodoro, mbeni ye ayeke changé na yâ ti dutingo ti asewa: ambeni koli na wali asoro ti dü molenge pëpe. Ambeni asara ni ndali ti tënë ti konomi; ti ambeni, a yeke ndali ti so ala ye ti tene mbeni ye akanga lege na ala pëpe ti sara mbeni kua so ayeke ga na ala nginza mingi. Na popo ti aChrétien, a yeke wara nga akoli na awali so asoro ti dü molenge pëpe. Fani mingi, a yeke ndali ti so ala ye ti tene mbeni ye akanga lege na ala pëpe ti sara na Jéhovah. Ye so aye pëpe ti tene so aChrétien so ayeke wara ngia pëpe na yâ ti mariage ti ala. Ye oko, ala yeda na bê ti ala kue ti zia aye ti Royaume na kozo ndo ahon ti zia na kozo ndo anzoni ye so mariage ayeke ga na ni (1 aCor. 7:3-5). Ambeni ti aChrétien so ayeke sara kua na Jéhovah nga na aita ti ala na lege so ala yeke sara kua ti circonscription, ti district wala ti Béthel. Ambeni ayeke sara kua tongana apionnier wala amissionnaire. Jéhovah ayeke girisa ande lâ oko pëpe kua so ala sara nga na ndoye so ala fa ndali ti iri ti lo.​—aHéb. 6:10.

“Ye ti ngangu na yâ mitele”

14, 15. “Ye ti ngangu” wa ababâ na amama so ayeke aChrétien alingbi ti wara “na yâ mitele” ti ala?

¹⁴ Bazengele Paul atene na aChrétien so asara mariage awe so fade ala yeke wara “ye ti ngangu na yâ mitele” ti ala (1 aCor. 7:28). Ye so alingbi ti ndu songo tere ti koli ni wala ti wali ni, ti amolenge ti ala wala ti ababâ wala amama ti ala so aga mbakoro awe. A lingbi nga ti ndu akpale nga na vundu so ala yeke wara na ngoi so ala yeke bata amolenge ti ala. Tongana ti so a fa na tongo nda ti article so, Bible afa kozoni awe so ‘aye ti ngangu’ so ayeke ngangu na zo ti kanga bê dä ayeke si na “lâ ti nda ni”. Na popo ti aye ti ngangu so a yeke wara tënë ti amolenge so ayeke ‘ke yanga ti mama na babâ ti ala’.​—2 Tim. 3:1-3.

¹⁵ Batango amolenge ayeke mbeni kota kpale na ababâ na amama so ayeke aChrétien. E kue e yeke wara akpale na “lâ ti ye ti ngangu” so. Ye oko, ababâ na amama so ayeke aChrétien ayeke gi lakue ti hon ndo ti sioni ngangu so azo ti “sese so” alingbi ti sara na ndo ti amolenge ti ala (aEph. 2:2, 3). A yeke gi ababâ na amama la ayeke sö benda lakue pëpe. Tongana a si so mbeni molenge na yâ ti sewa ti aChrétien azia ti sara na Jéhovah, a yeke biani “ye ti ngangu” la asi na ababâ na amama ni so atara ti fa lege ti Jéhovah na molenge ni.​—aProv. 17:25.

“Fade kota ye ti vundu aga”

16. “Ye ti ngangu” wa Jésus asara tënë ni kozo awe?

¹⁶ Akoli na awali so asara mariage awe na ala so adü amolenge ayeke wara “ye ti ngangu”. Ye oko, mbeni “ye ti ngangu” ayeke dä so ahon ati so e sara tënë ni ge. Na yâ ti prophétie so Jésus afa na ndo ti ngoi ti singo ti lo nga na ti hunzingo ti aye ti ngoi so, lo tene: “Fade kota ye ti vundu aga, ye ti vundu tongaso ayeke giriri pëpe, na lâ ti komansema ti sese juska fadeso; biani, fade ye tongaso alingbi si mbeni lâ oko pëpe.” (Mat. 24:3, 21). Na pekoni, Jésus afa so fade azo mingi so asi singo ayeke sö ande kuâ na ngoi ti “kota ye ti vundu” so. Me, Satan na azo ti lo ayeke sara ande kue ti gi ti sara sioni na aTémoin ti Jéhovah so aye ti ala tënë ti siriri. Kite ayeke dä pëpe so a yeke duti ande mbeni ngoi ti ngangu teti e kue, atâa e yeke akota zo wala amolenge.

17. (a) Ngbanga ti nyen e bâ gigi ti e ti kekereke na mbeto pëpe? (b) A yeke nzoni aye wa asara ngangu na ndo ti lege so e yeke bâ na mariage nga na dungo molenge?

¹⁷ Ye oko, a yeke nzoni pëpe ti tene mbeto ti ye so ayeke si kekereke ahon ndo ti e. Ababâ na amama so ayeke be-ta-zo na Jéhovah ahinga na bê ti ala kue so Jéhovah ayeke bata ala na amolenge ti ala. (Diko Esaïe 26:20, 21; Soph. 2:2, 3; 1 aCor. 7:14.) Me ti fadeso, e hinga so e yeke na lâ ti aye ti ngangu. Zia si hingango ye so asara ngangu na ndo ti lege so e yeke bâ na tënë ti sarango mariage nga na ti dungo molenge na ngoi ti nda ni so (2 Pi. 3:10-13). Tongaso, ye so e yeke sara na yâ ti gigi ti e ayeke ga na gonda na Jéhovah nga na kongregation ti aChrétien, atâa e yeke aChrétien so ade kumbamba wala e sara mariage awe, wala e dü molenge wala pëpe.

[Akete tënë na gbe ni]

Mo dabe ti mo na ni?

• Ngbanga ti nyen a yeke nzoni aChrétien so ade maseka adö tere ti sara mariage pëpe?

• Batango molenge andu nyen?

• Ngbanga ti nyen aChrétien mingi angbâ kumbamba wala ala sara mariage me ala soro ti dü pëpe?

• “Ye ti ngangu” wa ababâ na amama so ayeke aChrétien ayeke wara?

[Foto na lembeti 25]

Ngbanga ti nyen a yeke na lege ti ndara ti tene aChrétien so ade maseka aku juska ala kpengba awe si ala sara mariage?

[Foto na lembeti 26]

Mbeni koli alingbi ti sara ye mingi ti mû maboko na wali ti lo ti wara ngoi nzoni ti sara aye ti yingo