Atënë so azo ahunda

A yeke nzoni aChrétien abâ gingo nyama na gingo susu tongana nyen?

Bible akanga lege pëpe na zo ti gi nyama wala ti gi susu (Deutéronome 14:4, 5, 9, 20; Matthieu 17:27; Jean 21:6). Ye oko, a yeke nzoni aChrétien so ayeke sara aye so agbu li na ndo ti ambeni kpengba-ndia ti Bible.

Nzapa azi lege na Noé na ahale ti lo ti fâ anyama na ti te ni, me lo hunda na ala ti tuku mênë ni kozoni si ala te ni (Genèse 9:3, 4). Yanga so lo mû afa polele so a yeke nzoni zo abâ fini ti nyama na nene ni ndali ti so a londo na Nzapa. Ni la, aChrétien ayeke fâ anyama pëpe gi ti fa so ala yeke na akode mingi wala gi ti wara ngia na pekoni. Nga ti fâ nyama na mbana afa so ala bâ fini na nene ni pëpe​—aProverbe 12:10.

Mbeni ye nde ayeke dä so a lingbi e gbu li ti e na ndo ni, so andu bango ndo ti e. Abazengele so ayeke azo ti gingo susu ayeke lani na ngia na pekoni so ala gbu gbâ ti asusu. Me, mbeni ye oko afa pëpe so ala pika kate ti ala ndali ti kode ti gingo susu so ala yeke na ni. Nga, ye oko afa pëpe so ala gue ti sara mandako ti gingo susu na azo, ala gi susu ti fa so ala yeke akoli wala gi ti wara nzerengo tere na pekoni.​—Psaume 11:5; aGalate 5:26.

Tongaso, a yeke nzoni e hunda tere ti e: ‘Mbi yeke mbeni nzoni tapande na ndo tënë ti bango fini na nene ni tongana ti Jéhovah? Lisoro ti mbi wala li ti mbi ayeke mingi ni gi na ndo ti gingo susu wala gingo nyama? Sarango ye ti mbi afa so ye so anzere na mbi mingi ayeke gingo mbeni nyama, warango lo nga na fango lo? Wala, a fa so mbi yeke mbeni wakua ti Nzapa? Gingo nyama wala gingo susu asara si mbi sara kamarade mingi na azo so ayeke aTémoin ti Jéhovah pëpe wala asara si mbi bâ lege ti sewa ti mbi nzoni mbeni pëpe?’​—Luc 6:45.

Azo so ayeke gi nyama wala susu ti te alingbi ti pensé so a yeke sioni pëpe ti dö aye ti yingo ti zia na ngoi ti gingo susu nga na ti gingo nyama. Ye oko, e yeke fa so e yeke na mabe nga e zia bê ti e kue na Nzapa tongana e zia pëpe si mbeni ye akanga lege na e ti zia aye so bê ti lo aye na kozo ndo (Matthieu 6:33). Na ndo ni, aChrétien ayeda na andia kue ti “César” na ndo ti gingo nyama na ti gingo susu, atâa azo ti komande asara ye alingbi na ni wala pëpe.​—Matthieu 22:21; aRomain 13:1.

Ti duti na bango ndo ti Jéhovah na ndo ti tënë ti gingo nyama nga na ti gingo susu ayeke hunda peut-être na ambeni ita ti leke bango ndo ti ala si a gue oko na akpengba-ndia ti lo (aEphésien 4:22-24). Na ndo ni, a yeke nzoni e bâ na nene ni desizion so yingo-ti-hinga ti ambeni zo afa na ala ti mû. Wango so bazengele Paul amû alingbi biani na tënë so. Lo tene: “A lingbi e fâ ngbanga na li ti aita ti e mbeni pëpe; me a hon so, a lingbi i fâ ngbanga tongaso​—zo oko azia ye so zo apika gere ti lo dä . . . na lege ti ita ti lo pëpe.” (aRomain 14:13). Ti fa so e ye amba ti e na bê ti e kue nga e ne ala ayeke sara si e bata siriri ti kongregation. A yeke sara nga si e nzere na lê ti Wasarango e, so fini kue alondo na lo.​—1 aCorinthien 8:13.a

[Akete tënë na gbe ni]