Gingo anzoni kiringo tënë

Mbi yeke sara tongana nyen ti bata seni ti mbi?

Mbi yeke sara tongana nyen ti tene sewa ti mbi aduti na ngia?

Mbi yeke sara tongana nyen ti bata kua ti nginza ti mbi?

MO HUNDA ambeni ti atënë so lâ oko awe? Mo wara anzoni kiringo tënë so aga na aye ti nzoni na mo? Ngu oko oko, a yeke sigigi na abuku so wungo ni asi 2 000 tongaso ti mû awango na ndo ti akpengba tënë so nga na ambeni kpengba tënë ni nde. Gi na Grande-Bretagne, azo ayeke mû wungo ti nginza 7 500 000 000F CFA ngu oko oko ti vo abuku so ayeke mû awango na ndo lege ti hongo ndo ti akpale ti lâ oko oko. Na Amerika, wungo ti anginza so a wara na peko ti kango mara ti abuku so asi 30 000 000 000F CFA. A yeke biani gi mo oko pëpe si mo yeke gi ti wara anzoni wango na ndo lege ti hongo ndo ti akpale ti lâ oko oko.

Mbeni wasungo mbeti atene na ndo ti awango so a yeke wara na yâ ti gbâ ti ambeti so, lo tene: “Afini buku mingi akiri gi na ndo ti atënë so a sû ândö awe.” Biani, mingi ti awango so ayeke na yâ ti abuku so ayeke gi a-oko tënë ti ndara so a sû na yâ ti mbeni oko ti angbene buku so aninga ahon atanga ni kue. A kangbi buku ni so ahon tanga ti abuku kue. A kiri pekoni kue wala gi mbeni mbage ni na ayanga ti kodoro asi 2 400 tongaso. Na ndo sese kue, a pete wungo ti buku so ahon 4 600 000 000. Buku so ayeke Bible.

Bible atene polele atene: “Tënë kue ti Mbeti ti Nzapa alondo na yanga ti Nzapa, na a yeke nzoni ti fa nda ti tënë, ti zingo na zo, ti kiri zo na lege ni, na ti fa na zo lege ti sara ye mbilimbili.” (2 Timothée 3:16). Ti tâ tënë ni, a sû Bible pëpe tongana mbeni senge buku so ayeke na anzoni wango so alingbi ti mû maboko na zo. Kozo ye so a sû Bible ndali ni ayeke ti fa na azo ye so bê ti Nzapa aye. Atâa so kue, Bible ayeke na aye mingi ti fa na e na ndo lege so e lingbi ti hon ndo ti akpale so ayeke si na azo kue. A mû nga azendo so, tongana zo asara ye alingbi na wango ti Bible, lo yeke wara nzoni dä (Esaïe 48:17, 18). Tongana zo asara ye alingbi na atënë ti yâ ti buku so, lo yeke wara aye ti nzoni mingi dä, atâa kete mara ti lo, ndo so lo kono dä wala hingango ye ti lo.