Fade Jéhovah ‘afâ ngbanga ti ala na lege ni’

“Fade Nzapa afâ ngbanga ti ala [na lege ni, NW ] pëpe? ala so Lo iri ala na gigi, ala so atoto na Lo lâ na bï.”​—LUC 18:7.

1. Aita wa ayeke kpengba mo? Ngbanga ti nyen?

NA POPO ti aTémoin ti Jéhovah na ndo ti sese kue, mo yeke wara akoli na awali Chrétien so asara na Jéhovah be-ta-zo teti angu mingi awe. Mo hinga ambeni ti ita so nzoni? Peut-être mo yeke bi bê na ndo mbeni ita-wali so aga mbakoro awe, na so awara batême a sara angu mingi fadeso awe, me so ayeke manke bungbi kirikiri pëpe. Wala mo lingbi peut-être ti bi bê na ndo mbeni ita-koli so aga mbakoro awe, na so teti angu mingi fadeso ayeke mû maboko yenga na yenga na kapa ti fango tënë so kongregation aleke. Biani, mingi ti abe-ta-zo so atene ti ala so, ti si na ngoi so, Harmaguédon ahon awe. Ye oko, atâa so sioni sese ti laso angbâ, ye so abuba pëpe ziango bê ti ala na yâ ti azendo ti Jéhovah wala a sara nga pëpe si ala nze ti ‘gbu ngangu juska na nda ni’. (Matthieu 24:13). Kpengba mabe so awakua be-ta-zo ti Jéhovah so afa ayeke biani mbeni ye so akpengba aita kue na yâ ti kongregation.​—Psaume 147:11.

2. Ye wa so asi amû na e vundu mingi?

² Ye oko, na ambeni ngoi, ambeni ita alingbi ti sara ti ala ye nde. Ambeni ita afa tënë teti angu mingi awe, me tongana ngoi ayeke hon, mabe ti ala na mbage ti Jéhovah awoko na ala kaï ti ga na bungbi ti aChrétien. Vundu asara e mingi ti bâ amba ti e so e na ala e yeke voro Jéhovah kozo azia lo, nga na bê ti e kue e ye ti ngbâ ti mû maboko na “ngasangbaga” oko oko “so agirisa” ti kiri na yâ ti yangbo ni (Psaume 119:176; aRomain 15:1). Atâa so mabe ti ambeni Chrétien atï, ambeni angbâ lakue be-ta-zo, na ye so asara si ambeni hundango tënë abâ gigi. Ye wa amû maboko na gbâ ti aTémoin ti Jéhovah ti ngbâ ti bata mabe so ala yeke na ni na yâ azendo ti Jéhovah na ngoi so mabe ti ambeni atï? Ye wa e wani e lingbi ti sara ti ngbâ ti hinga biani so ‘kota lâ ti Jéhovah’ aga nduru? (Sophonie 1:14). Zia e bâ mbeni tapande so ayeke na yâ ti Évangile ti Luc.

Mbeni gbotongo mê teti azo so ayeke na fini “tongana Molenge Ti Zo asi”

3. Tapande ti womua na juge alingbi mbilimbili ti mû maboko na azo wa? Ngbanga ti nyen?

³ Na Luc chapitre 18, Jésus amû mbeni tapande na ndo mbeni womua na mbeni juge. Tapande so ague oko na tapande ti mbeni zo so awara gene na so azia pëpe ti hunda ye na kamarade ti lo, so e sara lisoro na ndo ni na yâ ti article so ahon (Luc 11:5-13). Ye oko, aversê so angoro aversê ti tapande ti womua na juge so afa na e so atënë ni andu mingi ni azo so ayeke na fini na ngoi so “Molenge Ti Zo asi” na yâ ti ngangu ti Royaume ti lo, ngoi so ato nda ni na ngu 1914.​—Luc 18:8.a

4. Ye wa Jésus asara tënë na ndo ni kozo ti tene lo mû tapande so ayeke na Luc chapitre 18?

⁴ Kozo ti tene Jésus amû tapande ti womua na juge, lo tene so aye so ayeke si ayeke fa polele singo ti lo na yâ ti ngangu ti Royaume “legeoko tongana nyekpa” so “asu na mbage oko na gbe yayu na asu juska na mbeni mbage na gbe yayu”. (Luc 17:24; 21:10, 29-33). Ye oko, mingi ti azo so ayeke na fini na “lâ ti nda ni” ayeke bi bê pëpe na aye so afa polele so Jésus asi awe (Daniel 12:4). Ndali ti nyen? Ndali ti a-oko nda ti tënë so apusu lani azo ti ngoi ti Noé na ti Lot ti mä pëpe agbotongo mê ti Jéhovah. Na ngoi ni so, azo ‘ate, ala nyon, ala vo ye, ala kä ye, ala lu le-kobe, na ala sara da juska lâ ni so a fâ ala kue.’ (Luc 17:26-29). Ala girisa fini ti ala ndali ti so ala zia si akusala ti ala ti lâ oko oko amû ngoi ti ala kue na tongaso ala yeke na ngoi pëpe ti bi bê na ndo ti ye so bê ti Nzapa aye (Matthieu 24:39). Laso nga, mingi ti azo ayeke sara ye legeoko tongaso na lege so ala yeke bi tere ti ala kue na yâ ti akusala ti ala ti lâ oko oko, na ala ke ti bâ aye so afa polele so sioni sese ti laso aga nduru ti hunzi.​—Luc 17:30.

5. (a) Jésus agboto lani mê ti azo wa? Ngbanga ti nyen? (b) Ye wa asara si mabe ti ambeni ita atï?

⁵ Biani, Jésus ayeke gi bê ti lo lani mingi so sese ti Satan alingbi ti gboto lê ti adisciple ti lo nga, na même ala lingbi ti “kiri” na yâ ti aye so ala zia awe (Luc 17:22, 31). Na a yeke ye so asi biani na ambeni Chrétien. Teti angu mingi, aita so ayeke gi na kota nzara ti tene Jéhovah afuti sioni sese ti laso. Ye oko, tongana Harmaguédon asi pëpe na ngoi so ala ku, bê ti ala anze. Bê ti ala anze ndali ti so ala bâ ti ala so lango ti fango ngbanga ti Jéhovah angbâ ti yo. Ala dë na yâ fango tënë, na yeke yeke, akusala ti sese so amû ngoi ti ala kue na tongaso ala yeke na ngoi mingi pëpe ti bi bê na ndo aye ti yingo (Luc 8:11, 13, 14). A si na mbeni ngoi, ala “kiri” na yâ ti aye so ala zia awe. So ayeke ye ti mawa biani!

‘A lingbi e sambela lakue’

6-8. (a) Fa tapande ti womua na juge. (b) Tongana nyen Jésus afa nda ti tapande so?

⁶ Nyen la e lingbi ti sara si ziango bê ti e na yâ gango tâ tënë ti azendo ti Jéhovah akiri na peko pëpe? (aHébreu 3:14). Jésus akiri tënë na hundango tënë so tâ gi na peko ti so lo gboto mê ti adisciple ti lo ti kiri mbeni pëpe na yâ ti sioni sese ti Satan.

⁷ Luc atene so Jésus “asara tënë na ala na parabole ti fa na ala [so] a lingbi ala sambela lakue, ala zia pëpe.” Jésus atene: “Mbeni juge ayeke na mbeni kodoro, lo kpe mbeto ti Nzapa pëpe, na lo yekia mbeni zo oko pëpe. Mbeni womua ayeke na yâ kodoro ni kâ, na lo ga lege mingi na juge so, lo tene na lo, Mo fâ ngbanga ti mbi [na lege ni, NW ] na li ti wato ti mbi. Kozoni, juge ni ayeda pëpe, me na pekoni, lo tene na bê ti lo, Kamême mbi kpe mbeto ti Nzapa pëpe na mbi yekia mbeni zo oko pëpe, me teti womua so aga ti hunda mbi lakue, fade mbi fâ ngbanga ti lo [na lege ni, NW ]; wala peut-être na lege ti gango ti lo lakue fade lo lungula ngangu ti mbi.”

⁸ Na peko ti so Jésus asara tënë so awe, lo fa nda ni, lo tene: “I mä tënë so juge ti kirikiri so atene. Fade Nzapa afâ ngbanga ti ala [na lege ni, NW ] pëpe? ala so Lo iri ala na gigi, ala so atoto na Lo lâ na bï, kamême bê ti Lo anze na ala pëpe. Mbi tene na i, fade Lo fâ ngbanga ti ala [na lege ni, NW ] fade fade. Me tongana Molenge Ti Zo asi, fade Lo wara mabe na sese?”​—Luc 18:1-8.

‘Mo fâ ngbanga ti mbi na lege ni’

9. Kota tënë ti tapande ti womua na juge ayeke nyen?

⁹ Kota tënë so ayeke na gunda ti pendere tapande so asigigi polele. Jésus nga na azo use so lo sara tënë ti ala na yâ ti tapande ni asara tënë na ndo ti kota tënë so. Womua ni adema tere ti lo, lo tene: ‘Mo fâ ngbanga ti mbi na lege ni.’ Juge ni atene: ‘Fade mbi fâ ngbanga ti lo na lege ni.’ Jésus ahunda tënë so: ‘Fade Nzapa afâ ngbanga ti ala na lege ni pëpe?’ Na ndo Jéhovah, Jésus akiri tënë lo tene: ‘Fade Lo fâ ngbanga ti ala na lege ni fade fade.’ (Luc 18:3, 5, 7, 8). Lawa mbilimbili si Nzapa ayeke ‘fâ ngbanga ti ala na lege ni’?

10. (a) Lawa si a fâ ngbanga na lege ni na ngoi ti akozo Chrétien? (b) Lawa si a yeke fâ ande ngbanga ti awakua ti Nzapa ti laso na lege ni? A yeke sara ni tongana nyen?

¹⁰ Na ngoi ti akozo Chrétien, “lâ ti futa kula” (wala “alango so Nzapa ayeke kiri na azo peko ti aye ti sioni so kue ala sara”, Kingdom Interlinear) asi na ngu 70 na ngoi so a futi Jérusalem na temple ti lo (Luc 21:22). Ti awakua ti Nzapa ti laso, Jéhovah ayeke fâ ande ngbanga ti ala na lege ni na “kota lâ” ti lo (Sophonie 1:14; Matthieu 24:21). Na ngoi ni so, fade Jéhovah ayeke “kiri pono na ala so asara ye ti pono” na awakua ti lo “tongana [Jésus Christ a] ga ti futa kula na azo so ahinga Nzapa pëpe, na ala so ake ti mä Tene-nzoni ti Seigneur ti e Jésus.”​—2 aThessalonicien 1:6-8; aRomain 12:19.

11. Na lege wa a yeke fâ ande ngbanga na lege ni “fade fade”?

¹¹ Ye oko, Jésus adë bê ti e so Jéhovah ayeke fâ ande ngbanga na lege ni “fade fade.” E lingbi ti gbu nda ti tënë so tongana nyen? Mbeti ti Nzapa atene so “kamême bê ti [Jéhovah] anze na ala pëpe”, lo yeke fâ ande hio ngbanga ti ala na lege ni na tâ ngoi ni (Luc 18:7, 8; 2 Pierre 3:9, 10). Tongana Moa aga lani na ngoi ti Noé, a futi azo ti sioni fade fade. Legeoko nga, tongana wâ alondo na yayu atï na ndo ti azo ti sioni na ngoi ti Lot, a futi ala kue. Jésus atene: “Fade a yeke tongaso na lâ ni so Molenge Ti Zo asi.” (Luc 17:27-30). “Fade fade ye ti futi” ayeke kiri ti tï na ndo ti azo ti sioni ti laso (1 aThessalonicien 5:2, 3). Biani, e hinga na bê kue so Jéhovah alingbi pëpe ti zia si lango so lo diko ti fâ ngbanga na ndo sioni sese ti Satan ahon.

‘Fade Lo fâ ngbanga ti ala na lege ni’

12, 13. (a) Na lege wa tapande ti Jésus na ndo womua na juge afa na e mbeni kpengba ye ti manda? (b) E hinga tongana nyen so Jéhovah ayeke mä sambela ti e na lo yeke fâ ngbanga na lege ni?

¹² Tapande so Jésus amû na ndo womua na juge agboto lê ti e na ndo ambeni kpengba tâ tënë. Ti fa nda ti tapande ni, Jésus atene: ‘I mä tënë so juge ti kirikiri so atene. Fade Nzapa afâ ngbanga ti ala na lege ni pëpe? ala so Lo iri ala na gigi.’ Ti tâ tënë ni, Jésus agi lani pëpe ti zia kamba na popo ti Jéhovah na juge so mo bâ mo tene Jéhovah ayeke sara nga ye na mbage ti awakua ti lo tongana ti juge so. Nde na so, Jésus afa na adisciple ti lo mbeni kpengba ye ti manda na ndo Jéhovah na lege so lo gboto lê ti ala na ndo kangbi so ayeke na popo ti Nzapa na juge so. Kangbi wa ayeke na popo ti ala?

¹³ Juge ti yâ ti tapande ti Jésus ayeke “juge ti kirikiri”, me Jéhovah ayeke “Juge ti mbilimbili”. (Psaume 7:12; 33:5). Juge ni abi bê ti lo kete pëpe na ndo womua ni, me ti Jéhovah, lo yeke bi bê ti lo na azo oko oko kue (2 Chronique 6:29, 30). Juge ni aye pëpe ti mû maboko na womua ni, me ti Jéhovah, lo yeda na bê ti lo kue ti mû maboko na azo so asara na lo, na lo yeke nduru ti sara ni (Esaïe 30:18, 19). Ye wa e manda dä? Tongana juge ti kirikiri so amä demango tere ti womua so na lo fâ ngbanga ti lo na lege ni, a yeke nzere ande na Jéhovah mingi ti mä sambela ti awakua ti lo na ti fâ ngbanga ti ala biani na lege ni!​—aProverbe 15:29.

14. Ngbanga ti nyen a yeke nzoni ti ngbâ lakue ti duti na mabe na yâ gango ti lâ ti fango ngbanga ti Nzapa?

¹⁴ Tongaso, azo so ayeke na mabe mbeni pëpe na yâ gango ti lâ ti fango ngbanga ti Nzapa asara mbeni kota faute. Ngbanga ti nyen? Ngbanga ti so ala mä na bê mbeni pëpe so ‘kota lâ ti Jéhovah’ ayeke nduru, sarango ye ti ala afa so ala yeke na kite na ndo gango tâ tënë ti azendo ti Jéhovah. Me zo oko pëpe ayeke na raison ti tene so Nzapa ayeke be-ta-zo pëpe (Job 9:12). Mbeni nzoni tënë ti tene e oko oko kue e hunda tere ti e na ni ayeke so: “Mbi mveni mbi yeke ngbâ be-ta-zo?” A yeke tâ gi oko tënë so Jésus ahunda na hunzingo ti tapande ti womua na juge so la.

‘Fade lo wara mabe [so] na sese?’

15. (a) Hundango tënë wa Jésus asigigi na ni? Ngbanga ti nyen? (b) A yeke nzoni e hunda tere ti e na tënë wa?

¹⁵ Jésus asigigi na kpengba hundango tënë so, lo tene: “Tongana Molenge Ti Zo asi, fade Lo wara mabe [so, NW, ] na sese?” (Luc 18:8). Tënë ‘mabe so’, so Jésus asara tënë ni ge ayeke nde na senge tënë ti mabe, me a yeke mbeni mbilimbili mara ti mabe so womua so ayeke na ni. Jésus akiri tënë lani pëpe na hundango tënë ti lo so. Lo sigigi na hundango tënë so ti mû lege na adisciple ti lo ti gbu li na ndo ti mara ti mabe so ala yeke na ni. Wala mabe ti ala ato nda ti woko na tongaso a lingbi ti sara ande si ala kiri na yâ ti aye so ala zia awe? Wala ala yeke na mara ti mabe ti womua so? Laso nga, a yeke nzoni e oko oko kue e hunda tere ti e tongaso: ‘ “Molenge Ti Zo” ayeke bâ so mbi yeke na mara ti mabe wa?’

16. Mara ti mabe wa womua so ayeke lani na ni?

¹⁶ Ti tene e duti na popo ti azo so Jéhovah ayeke fâ ande ngbanga ti ala na lege ni, a yeke nzoni e sara ye tongana ti womua so. Mara ti mabe wa lo yeke lani na ni? Lo fa mabe ti lo na lege so lo ‘ga lege mingi na juge so, lo tene na lo, Mo fâ ngbanga ti mbi na lege ni’. Womua so ague lani lege mingi ti bâ mbeni juge so ayeke mbilimbili pëpe juska lo fâ ngbanga ti lo na lege ni. Ye so amû lege na awakua ti Jéhovah laso ti hinga biani so fade Jéhovah ayeke fâ ngbanga ti ala na lege ni, atâa lo sara ni pëpe na ngoi so ala ku tere ti ala na ni. Ahon so, ala fa so ala zia bê ti ala kue na azendo ti Jéhovah na lege so ala yeke ngbâ lakue ti sambela lo; biani, ala yeke ‘toto na Lo lâ na bï’. (Luc 18:7). Ti tâ tënë ni, tongana mbeni Chrétien azia ti sambela ti tene Nzapa afâ ngbanga ti azo ti lo na lege ni, lo fa so lo yeke na mabe mbeni pëpe so fade Jéhovah ayeke sara mbeni ye ngbanga ti awakua ti lo.

17. Anda ti tënë wa apusu e ti ngbâ lakue ti sambela nga ti duti na mabe so lâ ti fango ngbanga ti Jéhovah ayeke si ande biani?

¹⁷ Teti so dutingo ti womua so ayeke nde, ye so afa na e so e yeke na ambeni nda ti tënë ti ngbâ lakue ti sambela. Tara ti bâ ambeni kangbi so ayeke na popo ti dutingo ti e na ti womua so. Womua ni angbâ lakue ti ga ti bâ juge ni atâa so mbeni zo oko ti wa lo ti sara ni ayeke dä pëpe; me ti e, Mbeti ti Nzapa awa e mingi ti “zia ti sambela pëpe.” (aRomain 12:12). Mbeni ye oko ti dë bê ti womua ni so fade a yeke yeda na ye so lo hunda ayeke dä pëpe; me ti e, Jéhovah adë bê ti e so fade lo yeke fâ ngbanga ti e na lege ni. Na lege ti prophète ti lo, Jéhovah atene: “Tongana tënë ni asi fade pëpe, mo ku; fade a ga biani, a manke pëpe.” (Habakuk 2:3; Psaume 97:10). Womua ni ayeke pëpe na mbeni wamungo maboko so alingbi ti sara tënë na place ti lo na ti sara si tënë ti lo ni ane. Me ti e, e yeke na mbeni ngangu wamungo maboko, Jésus so “Lo yeke na koti ti Nzapa, Lo yeke sambela teti e!” (aRomain 8:34; aHébreu 7:25). Tongaso, tongana womua so, atâa akpale so lo yeke na ni lo ngbâ lakue ti hunda juge so na beku so gbandangba lo lingbi ti fâ ngbanga ti lo na lege ni, e lingbi mingi ahon ti ngbâ lakue ti duti na mabe so lâ ti fango ngbanga ti Jéhovah ayeke si ande biani!

18. Na lege wa sambela ayeke kpengba mabe ti e na ayeke sara si a fâ ngbanga ti e na lege ni?

¹⁸ Tapande ti womua so afa na e so kamba ayeke na popo ti sambela na mabe; a fa nga na e so ti ngbâ ti sambela ayeke kanga lege na aye so alingbi ti sara si mabe ti e awoko. Me, ye so aye ti tene pëpe so ti sambela gi teti lê ti zo alingbi ti sara si mabe ti e atï pëpe (Matthieu 6:7, 8). Tongana bê ti e apusu e ti sambela ngbanga ti so e bâ so e yeke tâ na bezoin ti tene Nzapa amû maboko na e, mara ti sambela tongaso ayeke sara si e ga nduru na Nzapa nga ayeke sara si mabe ti e akpengba. Teti so a hunda ti tene zo aduti na mabe tongana lo ye ti sö fini ti lo, a yeke ye ti dongo bê pëpe tongana Jésus ahunda na adisciple ti lo ti “sambela lakue” na ti “zia pëpe.” (Luc 18:1; 2 aThessalonicien 3:13). Biani, atâa e sambela wala e sambela pëpe, ‘kota lâ ti Jéhovah’ ayeke ga lakue. Me ti tene a fâ ngbanga ti e na lege ni na e sö fini ti e na lâ ti bira ti Nzapa, a lingbi e duti na mabe, e sara ye mbilimbili nga e ngbâ lakue ti sambela.

19. E yeke fa tongana nyen so e hinga na bê ti e biani so ‘fade Nzapa ayeke fâ ngbanga na lege ni’?

¹⁹ Tongana ti so e dabe ti e na ni, Jésus ahunda tënë so: ‘Tongana Molenge Ti Zo asi, fade Lo wara mabe so na sese?’ Kiringo tënë ti kpengba hundango tënë so ayeke so wa? E yeke na ngia mingi so na ndo lê sese kue, awakua ti Jéhovah kutu mingi so ayeke be-ta-zo afa na lege ti asambela ti ala, be-nze-pepe ti ala nga na gbungo ngangu ti ala so ala yeke na mabe so biani. Tongaso, kiringo tënë na hundango tënë ti Jésus so ayeke “ën”! Biani, atâa aye ti kirikiri so sese ti Satan ayeke sara na e laso, e mä na bê biani so ‘fade Nzapa afâ ngbanga ti ala na lege ni, ala so Lo iri ala na gigi’.

[Kete tënë na gbe ni]

Mo dabe mo na ni?

• Ye wa asara si mabe ti ambeni Chrétien atï?

• Aye wa amû lege na e ti hinga biani so lâ ti fango ngbanga ti Jéhovah ayeke ga?

• Anda ti tënë wa amû lege na e ti ngbâ ti sambela lakue?

• Tongana nyen ti ngbâ ti sambela lakue ayeke sara si mabe ti e atï pëpe?

[Foto na lembeti 19]

Tapande ti womua na juge afa na e nyen?

[Afoto na lembeti 21]

Azo kutu mingi amä na bê biani so ‘fade Nzapa ayeke fâ ngbanga ti ala na lege ni’