Lo yeke mbakoro me lo duti gi lo oko pëpe

MBAKORO asara si azo mingi aga awazin nga ala duti gi ala oko. Me ti Fernand Rivarol, so lo kui na Genève, na Suisse tongana lo yeke na ngu 95, ayeke tongaso pëpe. Lo yeke lani gi lo oko ndali ti so wali ti lo akui awe na nga molenge ti lo ti wali ague na da ti koli ti lo. Atâa so lo ngbâ lani gi na yanga-da, lo duti gi lo oko pëpe. Lakue lo yeke duti na yanga ti table na salon na tere ti téléphone, lo yeke pika singa na azo ti sara lisoro na ala na ndo tënë ti Nzapa.

Na ngoi so lo ngbâ lani na ngangu, a si so Fernand aduti tâ gi lo oko. Ngbanga ti nyen? Gi kete na peko ti so Fernand na wali ti lo aga aTémoin ti Jéhovah na ngu 1939, Use Bira so Amû Sese Kue ato nda ni na Poto. Fernand agbu tënë ti Nzapa ti lo ngangu na lo ye pëpe ti sara sioni na zo. Ndali ni, a tomba lo na kua na lo sara kanga a ninga. Kue a sara ngu oku na ndambo so a zia lo yongoro na wali ti lo nga na molenge ti lo ti wali so ade lani kete.

Tongana lo dabe ti lo lani na ni, Fernand atene: “Ti azo mingi, ala bâ so mbi ke mbeni nzoni kua ti nginza na mbi zia afami ti mbi gi tongaso. Azo ane mbi lani mbeni pëpe na ala bâ mbi tongana zo so akpe ndia ti kodoro pëpe. Ye oko, tongana mbi yeke pensé na angoi ti ngangu so, mbi yeke bi bê ti mbi mingi na ndo lege so Jéhovah amû lani maboko na mbi nga na sewa ti mbi. Juska laso, atâa so angu mingi ahon awe, mbi ngbâ ti zia bê ti mbi kue na Jéhovah na mbi ngbâ ti gbu ngangu tongana ti so mbi sara lani.”

A yeke mabe so Fernand ayeke na ni si apusu lo ti fa na azo beku so lo yeke na ni na yâ Mbeti ti Nzapa na lege ti téléphone. Tongana lo wara mbeni zo so adengi mê nzoni na tënë so lo fa, lo yeke tokua na zo ni ambeti ti nzapa na lege ti poste. Na pekoni, lo yeke pika singa na zo ni ti bâ wala ambeti so lo tokua na zo ni anzere na lo. Ngoi na ngoi, azo ayeke sû lettre ti kiri singila na lo. Ye so asara si lo yeke lani na ngia mingi.

Mbeni zo tongana Fernand so alango na ndo so mo yeke dä alingbi ti fa tënë ti Nzapa na mo. Ngbanga ti nyen mo dengi mê ti mo pëpe ti mä ye so lo yeke fa na mo ti tene mo hinga aye so lo mä na bê dä? A-Témoin ti Jéhovah ayeke lakue na ngia ti fa tënë ti mabe ti ala na mo.