Atënë so azo ahunda

Na peko ti ndangba tara so ayeke duti na hunzingo ti Ngu Saki Oko, azo alingbi ande ti sara siokpari nga ti kui?

Aversê use so ayeke na Apocalypse afa na e ambeni ye so alingbi ti mû lege na e ti kiri tënë na hundango tënë so: “A bi Kui na Ndo-ti-awakinda na lac ti wâ. So ayeke kui use ni​—lac ti wâ so.” (Apocalypse 20:14). “Fade Lo mbô ngule kue na lê ti ala, na kui ayeke mbeni pëpe. Vundu, wala toto, wala sana, ayeke mbeni pëpe teti kozo ye ni ahon awe.”​—Apocalypse 21:4.

Bâ ngoi so tënë ni ayeke ga tâ tënë. A yeke bi ande “Kui na Ndo-ti-awakinda” na lac ti wâ na peko ti so a fâ ngbanga ti azo so asö kuâ na Harmaguédon, ala so a zingo ala na kuâ nga na azo kue so a dü ala na peko ti Harmaguédon. A yeke fâ ngbanga ti ala alingbi na ye so “a sara na mbeti nde nde”; ambeti ni so ayeke fa aye so Jéhovah ahunda na azo ti sara na yâ ti ngu saki oko ni (Apocalypse 20:12, 13). Bazengele Jean afa peko ti mbeni suma ni nde, na a yeke wara tënë ti suma ni so na Apocalypse chapitre 21. Suma ni so ayeke ga ande tâ tënë na ngoi ti Komandema ti Ngu Saki Oko ti Christ Jésus. Me, a yeke ga ande tâ tënë kue na ngoi so ngu saki oko ni ahunzi. Ngu saki oko ni ayeke lâ ti fango ngbanga. Tongana Jésus akiri na Royaume ni na Babâ ti lo awe, Jéhovah ayeke duti ande biani na azo, so ti tene lo yeke pëpe na bezoin ti mbeni wasara-songo na popo ti lo na azo. Jéhovah ayeke duti ande biani na “azo ti Lo” na lege ti mitele pëpe me na lege ti yingo na lo yeke duti na ala teti lakue lakue. Na ngoi so azo aga mbilimbili-kue ngbanga ti so ala wara awe aye kue ti nzoni ti peko ti sandaga ti Christ, zendo so atene “kui ayeke mbeni pëpe” ayeke ga ande tâ tënë biani.​—Apocalypse 21:3, 4.

Tongaso, kuâ so a sara tënë ni na yâ ti aversê so e fa na nduzu ge ayeke ti so aga na lege ti siokpari ti Adam. Na lege ti sandaga ti Christ, fade a yeke zi lo kuâ ni so biani biani (aRomain 5:12-21). Tongana a zi biani awe kuâ so azo awara ni na lege ti Adam, fade azo ayeke ga tongana Adam na ngoi so Nzapa acréé lo. Adam ayeke lani mbilimbili-kue, me a ye ti tene pëpe so lo lingbi ti kui pëpe, ên-ën. Jéhovah atene lani na Adam ti te pëpe “lê ti keke ti hinga nzoni na ti hinga sioni”. Nga lo kiri lo tene na Adam: “Na lâ ni so mo te lê ni so, fade mo kui biani.” (Genèse 2:17). So ayeke lani kuâ so Adam awara ni ndali ti so lo sara siokpari na mbana. Na peko ti ndangba tara so ayeke duti na hunzingo ti Komandema ti Ngu Saki Oko ti Christ, azo ayeke ngbâ lakue na liberté ti soro ye so bê ti ala aye (Apocalypse 20:7-10). Ala yeke ngbâ lakue na ngangu ti soro ala mveni ti ngbâ ti sara na Jéhovah wala pëpe. So aye ti tene so peut-être ambeni zo ayeke ke ande ti mä yanga ti Nzapa tongana ti so Adam asara lani.

Na peko ti ndangba tara ni, na ngoi so kui na ndo-ti-awakinda ayeke duti dä mbeni pëpe, nyen la ayeke si ande na ala so ayeke soro ti sara kpengba-li na Nzapa? Na ngoi ni so, kuâ so aga na lege ti siokpari ti Adam nga ndo-ti-awakinda so ayeke dû ti kuâ ti azo so ayeke na beku ti zingo ayeke duti dä mbeni pëpe. Me, Jéhovah alingbi ti futi azo kue so asara kpengba-li na lo na lac ti wâ, so ti tene ala yeke na beku ti zingo na kuâ mbeni pëpe. Kuâ ti ala ni ayeke duti legeoko tongana ti Adam na Eve so ala kui biaku biaku. Me a yeke pëpe kuâ so aga na lege ti siokpari ti Adam.

Ye oko, e yeke na raison pëpe ti ku ti tene ye tongaso asi na ngoi ni kâ. Ala so ayeke hon ande na yâ ti ndangba tara ni ayeke duti ande tâ nde mingi na Adam. Ala gbu ngangu na yâ ti atara nde nde kue. E lingbi ti duti na beku so azo so ayeke hon na yâ ti ndangba tara ni ayeke azo so alingbi ndali ti so Jéhovah abâ yâ ti ala nzoni na lo hinga ye so ayeke na bê ti ala. E lingbi ti duti lakue na beku so ndangba tara ni ayeke zi azo kue so ayeke sara kusala na lege ni pëpe na liberté so ala yeke na ni ti soro ye ti bê ti ala. Ni la, atâa so a lingbi ti si so ambeni zo so ayeke hon na yâ ti ndangba tara ni ayeke sara ande kpengba-li na Nzapa na a yeke futi ande ala, a yeke biani ngangu ti tene mara ti ye tongaso asi ande.

[Foto na lembeti 31]

Na peko ti ndangba tara, na lege wa azo ayeke ga tongana Adam?