Mo lingbi ti bata ni pëpe tongaso sara kua na ni nzoni

NGOI so ahon awe ayeke kiri pëpe. Azo mingi ahinga mato so. So ti tene mo lingbi pëpe ti gbu ngoi ti kiri na ni na peko. Tongana lo hon awe, lo hon awe. Mo lingbi ti bata ni ti sara kua na ni mbeni lâ pëpe. Ti gi ti bata ngoi sân ti sara kua na ni ayeke ye ti buba. Ye nyen ayeke si tongana mo lango ngbonga miombe na mo tara ti bata tanga ti angbonga ti lango ni na sarango ye oko pëpe? Na hunzingo ti lango ni, angbonga so mo sara na ye oko pëpe ahon biani awe.

A lingbi ti haka ngoi na mbeni kota bale so asua na ngangu. Bale ayeke sua ti lo gi suango. Mo lingbi ti kanga lege na ni pëpe, nga mo lingbi ti sara kua na alê ti ngu ni oko oko kue pëpe. Giriri, na tere ti abale, azo ato nda ti sara akota roue wala mbeni ye so akpa gere ti kutukutu. Aroue so ayeke turne tongana ngu ahon na yâ ni na a yeke mû ngangu na amasini ti ala ti tambela: amasini ti nekango le-kobe, ti fango keke, ti pompengo aye tongana ngu na ti pikango ye ngangu. Legeoko nga, mo lingbi ti bata ngoi pëpe, me ti mû ni ti sara na nzoni kua. Ye oko, ti sara ni, a lingbi mo tiri na aye use so ayeke nzi ngoi: pusungo ye na peko nga na batango ye kirikiri na tere ti mo. Zia e bâ kozoni tënë ti pusungo ye na peko.

E kpe pusungo ye na peko

Mbeni mato atene: Ku kekereke pëpe ti sara ye so mo lingbi ti sara laso. Ye oko, ambeni zo agbian yâ ni, atene: Sara kekereke pëpe ye so mo lingbi ti sara na yenga ti peko. Tongana ala yeke na gbele mbeni ngangu kua, ala gi lege ti kpe ni na pusungo ni na peko. Pusungo ye na peko aye ti tene “ti kiri lakue mbeni ye na peko; ti ngbâ ti ku ti sara mbeni ye so a lingbi fade a sara ni.” Ti zo so aye ti pusu ye na peko, a ga mbeni ye ti tere ti lo. Tongana kua ni ahon ndo ti lo, lo wara dengo bê na pusungo ni na peko na a nzere na lo ti duti senge, juska ye ni akiri agbu hon ti lo.

Ngoi na ngoi, seni ti e wala dutingo ti e a lingbi ti sara si e pusu na peko ambeni kusala ti e wala même kue. Nga, e kue e yeke na bezoin ti wu tere na peko ti akua ti e. Même Molenge ti Nzapa asara tongaso. Jésus afa tënë mingi, me lo zia nga mbeni ngoi ti tene lo na adisciple ti lo awu tere (Marc 6:31, 32). Mara ti wungo tere tongaso asara nzoni na zo. Me pusungo ye na peko ayeke ti lo nde, mingi ni a sara sioni na zo. Zia e bâ mbeni tapande.

Mbeni maseka ayeke na yenga ota ti leke tere ti lo teti kizama ti math. Lo yeke na gbâ ti ambeti na abuku ti dikongo ni. Mbeto asara lo. Lo pensé ti pusu ni na peko na lo tï na yâ ti gbanda ni. Ahon ti manda mbeti, lo bâ ti lo télé. Lâ na lâ, lo pusu na peko ye so lo lingbi ti sara ti wara kizama ti lo. Na lango oko na kizama ni, na bï, lo fâ tere ti lo ti diko mbeti. Lo duti fadeso, lo to nda ti bi lê na yâ ti ambeti ti lo.

Lo diko mbeti ngbii, l’heure ahon. Na ngoi so azo ti sewa ti lo kue alango awe, lo sara ngangu ti manda gbâ ti andia nde nde ti sarango na acalcul ni. Na ndade ni, na ekole, teti li ti lo anze lo tiri ti kiri tënë na ahundango tënë so a fa. Lo wara nzoni note pëpe, na lo bi kizama ni na ngu. A lingbi lo kiri lo diko mbeti, na peut-être lo yeke monté na klase ti peko pëpe.

Pusungo ye na peko aga na kpale na élève so. Me mbeni kpengba-ndia ti Bible ayeke dä so alingbi ti mû maboko na azo ti kpe mara ti kpale so asi na maseka so. Bazengele Paul atene: “I bata nzoni si i tambela na lege ni, i tambela tongana awabuba pëpe, me tongana awandara; i zia l’heure ti i ahon senge pëpe.” (aEphésien 5:15, 16). Paul ayeke wa lani aChrétien ti tene na ndara ala mû ngoi ti ala ti sara na aye ti yingo, me kpengba-ndia so alingbi ti mû maboko na zo na yâ ti ambeni kota ye ti fini ti lo. Teti a yeke mingi ni na e ti soro ngoi wa ti sara na mbeni kua, fade e yeke bâ anzoni ye ti peko ti kua ni nga e yeke hunzi ni hio tongana e soro ti sara ni na ngoi so alingbi na e ahon ti ‘zia l’heure ti e ti hon senge’. Tongana ti so versê ni atene, so ayeke sarango ye ti “awandara” la.

Ngoi so alingbi na maseka ni ti manda ye teti kizama ti lo ayeke so wa? Peut-être ti tene lakue na bï lo mû penze-ngbonga 15 ti kiri ti bâ yâ ti ambeti ti lo. Tongana lo sara fade tongaso, ka lo yeke fâ tere ti lo pëpe ti diko mbeti na bï kozo na kizama ni, ngoi so a yeke fade nzoni ti tene lo lango. Na lango ti kizama ni, lo yeke nze fade pëpe nga lo hinga mbeti ti lo nzoni, na a yeke duti fade ngangu na lo pëpe ti wara kizama ti lo.

Tongaso, tongana a mû na mo mbeni kusala ti sara, gi ti hinga ngoi so alingbi ndali ni na sara ni biani. Na sarango tongaso, mo yeke kpe gbanda ti pusungo ye na peko nga na asioni ye ti pekoni. Nga mo yeke wara ngia na yâ mbeni kusala so mo sara ni nzoni. Ye so ayeke tâ kota ye tongana kusala ni andu ambeni zo, na tapande akusala so a mû ti sara na yâ ti kongregation.

Bata ye kirikiri na tere ti mo pëpe

Tongana ti so e tene kozo, use ye ti sara na nzoni ngoi ti e ayeke ti bata ye kirikiri na tere ti e pëpe. E kue e hinga so a hunda ngoi ti bâ lege ti aye, ti leke ni, ti sara kua na ni, ti sukula ni, ti bata ni, na ti gi ni. Gbâ ti aye ahunda ngoi mingi. Ti sara kua na yâ mbeni kubu wala da so aye asi singo dä ayeke te ngoi mingi na a yeke so bê mingi. Nde na so a yeke ngangu pëpe ti sara kua na ndo so ayeke polele na akungba kirikiri ayeke dä pëpe. Na ndo ni, tongana akungba ayeke wu na ndo ti tere, a yeke mû nga ngoi mingi ti wara ye so mo gi.

Awakode na ndo akusala ti da atene so nduru na ndambo ti ngoi so azo amû ti sukula na da ahon senge senge ndali ti “bango lege ti akungba, pusungo mbage na mbage gbâ ti aye so angoro zo na aye so a zia kirikiri na yâ ti da.” A yeke nga tongaso na yâ ti ambeni kusala ti zo. Ni la, tongana mo ye ngoi ti mo ahon senge senge pëpe, bâ aye nde nde so ayeke na tere ti mo. Aye kirikiri amû yâ ti da na tere ti mo? A kanga lege na mo ti sara kua? Na ye ti sioni ahon, a mû ngoi ti mo kue? Ni la, zi ambeni ye so ayeke senge senge na tere ti mo.

Zingo aye ti senge senge na tere ti mo alingbi ti duti kete ye pëpe. Ti bi mbeni ye so mo ye me so mo yeke na bezoin ni pëpe alingbi ti so: mo bâ mo tene mo girisa mbeni nzoni kamarade. Tongaso tongana nyen ti hinga so mbeni ye ayeke ti bata ni wala ti bi ni? Ambeni zo ayeke na ndia so: tongana ngu oko ahon si mo sara kua na mbeni ye pëpe, lungula ni. Ka tongana ngu oko ahon awe me mo ngbâ ti gi bê ti mo? Bata ye ni na mbeni ndo teti nze omene, mo bâ. Tongana mo kiri mo bi lê dä na mo bâ so na peko ti ngu oko na ndambo mo sara kua na ni pëpe, peut-être a yeke duti ande ngangu na mo mingi pëpe ti lungula ni. Atâa a yeke tongana nyen, ye so mo gi ayeke ti zi ambeni ye so ayeke senge senge na tere ti mo na ti sara kusala nzoni ahon na ngoi ti mo.

Biani, batango ye kirikiri na tere ti zo andu pëpe gi da ti lo wala ndo so lo sara kua dä. Jésus asara tënë ti ‘kusala ti leke ye ti sese so na handa ti mosoro’ so alingbi ti ‘kanga Tënë’ ti Nzapa na ti sara si zo ‘alë pëpe’ na lege ti nzo tënë ni (Matthieu 13:22). Fini ti mbeni zo alingbi ti si singo na akusala nga na gingo ye mingi mingi tongaso a yeke ngangu na lo ti wara ngoi so a hunda ti bata tâ kota ye so ayeke nzoni kapa ti aye ti yingo na ti sara ye na lege ni. Ye ti pekoni ayeke so lo lingbi ti wara sioni na lege ti yingo nga na nda ni ti lï pëpe na yâ fini sese ti zendo ti Nzapa, ndo so kâ fade e yeke wara ngoi teti lakue lakue ti sara na ye so aga na nzerengo tere nga na ngia.—Esaïe 65:17-24; 2 Pierre 3:13.

Mo bâ so lakue mo yeke tiri ti wara ngoi ti sara na aye so mo bâ a yeke ti mo ti sara: aye so andu kua ti nginza ti mo, da ti mo, oto ti mo, aye so mo ye ti sara, avoyage, kapa ti kpengo loro ti mo, angoi ti ngia ti mo, wala ambeni ye so agbu bê ti mo? Tongana a yeke ni la, peut-être a yeke nzoni mo gbu li ti bâ tongana nyen mo lingbi ti zi aye so ayeke senge ti tene mo wara ngoi mingi teti aye ti yingo.

Biani, ngoi ayeke hon ti lo hongo tongana mbeni bale so ayeke sua. A lingbi pëpe ti kiri na ngoi na peko wala ti bata ni; tongana lo hon awe, lo hon awe. Me na mungo peko ti ambeni nzoni kpengba-ndia ti Bible nga na sarango ambeni ye, e lingbi ti wara ngoi so e yeke na bezoin ni ti bata “ye so ayeke nzoni ahon”, ye so ayeke ga na e anzoni ye teti lakue lakue, nga a yeke ‘mû gloire na Nzapa na a yeke sepela lo.’​—aPhilippien 1:10, 11.

[Foto na lembeti 8, 9]

Ngoi ayeke tongana mbeni bale so asua ngangu; a lingbi ti kamata ni ti sara na nzoni kusala

[Foto na lembeti 9]

Ngoi so alingbi na maseka so ti manda ye teti kizama ti lo ayeke so wa?

[Foto na lembeti 10]

Sarango kua na ndo so aye asi singo dä ayeke te ngoi na a so bê