Mbeni vizite so agbian ye kue

MBENI koli, so amaseka-wali use so ayeke aTémoin ti Jéhovah asara vizite na lo, asû tënë so: “Bê ti mbi adö dongo lani ti fa na sewa ti mbi tënë ti ‘a-ange’ use so Nzapa ato ala na mbi.” Ayenga kete kozoni na vizite ti ala, wali ti lo so ala sara ngu 45 akui. Vundu ahon ndo ti lo. Amolenge ti lo so akono awe adë bê ti lo, me ala lango ayo na lo. Mbeni kamarade wala voizin oko aga ti bâ lo pëpe.

Koli ni atene na amaseka so aga ti bâ lo: “Mbi ye Nzapa mbeni pëpe, mbi zia ti sambela lo awe.” Ye oko, ala sara ye na lo na nzobe mingi na ala zia na lo mbeni tract so aluti na ndo ti Bible so li ni atene Beku Wa Ayeke Dä Teti Azo ti E so Akui Awe? Lo diko ni na bï ni so na bê ti lo adë.

Kete na pekoni, aita-wali use so akiri. Ala bâ so na lâ ni so ala tingbi na lo, lo yeke na vundu mingi, na ala kiri ti bâ wala lo yeke tongana nyen. Koli ni asû mbeti na pekoni: “Bê ti mbi adö ti bâ so azo use so mbi hinga ala pëpe ayeke bi bê ti ala na mbi na ala gi bê ti ala ngbanga ti nzoni duti ti mbi.” Atënë so ala fa na lo na yâ ti Bible amû na lo ngangu. Awali ni atene fade ala yeke kiri mbeni lâ. Koli ni ayeke na kota ngia na a pusu lo ti sû atënë so ayeke na nduzu ge na yâ mbeni lettre so lo to na Da ti Royaume ti aTémoin ti Jéhovah so ayeke nduru na lo.

Kozoni ti gue na mbeni ndo nduru na mbeni oko ti amolenge ti lo, koli so ague na mbeni bungbi ti aTémoin ti Jéhovah nga lo te kobe na sewa ti mbeni oko ti amaseka-wali so ague ti ba lo. Lo sû na mbeti: “Mbi yeke londo ti gue na mbeni ndo nde, me mbi yeke girisa lâ oko pëpe amaseka so nga eglize ti ala na mbi yeke sara tënë ti ala lakue na yâ sambela ti mbi. Biani, mbi yeke sambela mingi fadeso. Ye kue agbian awe. A yeke amaseka so si asara ye mingi ti tene mbi gbian, na mbi yeke kiri singila lakue na ala ndali ni.”