Mabe ti lo akpengba ambeni zo

A DÜ Silvia na décembre ngu 1992. Na lâ ni kâ, lo kpa mbeni molenge-wali so ayeke na nzoni seni. Me na ngu use, a bâ so Silvia ayeke na mucoviscidose, mbeni kobela so yorö ni ayeke dä pëpe na so asara si zo awu gbâ nga a ga na songo yâ na peko ti tengo kobe. Ndali ti kobela ni, Silvia ayeke mû acomprimé ti yorö 36 lâ oko oko, lo yeke gboto mbeni yorö na hon, na a yeke gboto yâ ti tere ti lo ti tene a kui pëpe. Teti so afufu ti lo ayeke kete mingi, a kanga mbeni ngbenda ti pupu na tere ti lo ti tene lo wu même tongana lo sigigi.

Mama ti lo, Teresa, atene: “A yeke ye ti dongo bê ti bâ lege so Silvia atiri na kobela so. Grâce na hingango Mbeti ti Nzapa, mabe ti lo akpengba. Mabe so amû maboko na lo ti hon ndo ti vundu na songo tere ti lo. Lo dabe ti lo lakue na zendo ti Jéhovah ti mbeni fini sese so na yâ ni fade azo ti kobela kue awara sava.” (Apocalypse 21:4). Na ngoi so sewa ti lo aye ti woko, ngia ti Silvia ayeke mû na ala ngangu. Lo tene na babâ na mama ti lo nga na ita ti lo ti koli: “Fade gigi na yâ fini sese akanga ndo ti apasi kue so e yeke bâ laso.”

Silvia ayeke fa lakue nzo tënë ti Mbeti ti Nzapa na azo, na ala bâ so lê ti lo ayeke na ngia mingi. Azo ti kongregation ti lo na aZoa ti Canaries ayeke na ngia ti mä akiringo tënë ti lo na ti bâ mungo mbage ti lo na abungbi. Nga, lakue tongana bungbi ahunzi awe, Silvia aye ti ngbâ ti sara lisoro na aita. Ngia ti lo na ndoye ti lo na mbage ti aita asara si ala kue aye lo.

Babâ ti lo, Antonio, atene: “Silvia afa na e mbeni kota ye: même tongana e yeke na kpale, fini ayeke mbeni matabisi so Nzapa amû na e, na a lingbi e kiri singila ndali ni.” Legeoko tongana Silvia, awakua ti Nzapa kue, amaseka na ambakoro, ayeke ku kungo ngoi so “fade wakodoro atene pëpe, Mbi yeke na kobela.”​—Esaïe 33:24.

[Foto na lembeti 31]

Silvia adiko mbeni versê ti Bible na mama ti lo agbu ngbenda ti pupu ni