Lo yeke na droit ti wara iri

AZO oko oko kue ayeke na droit ti wara mbeni iri. Na kodoro ti Tahiti, même mbeni fini bébé so azo ahinga babâ na mama ti lo pëpe ayeke wara mbeni iri. Da-gbata ti kodoro ni alingbi ti zia iri na ndo ti molenge so a hinga babâ na mama ti lo pëpe.

Ye oko, mbeni zo ayeke dä so azo adoro droit ti lo ti wara mbeni iri, droit so a lingbi ti tene so azo kue si ayeke na ni. Ye ti dongo bê ni ayeke so, zo ni so ayeke “Babâ, [so] na lege ti Lo, afami kue so ayeke na yayu na so ayeke na ndo sese awara iri ti ala.” (aEphésien 3:14, 15). Bâ, azo mingi laso ake ti sara kusala na iri ti Wasarango ye kue so ayeke na yâ ti Bible. Ala zia na place ni ambeni iri nde tongana “Nzapa”, “Seigneur” wala “L’Eternel.” Tongaso, iri ti Nzapa ayeke nyen? A yeke wara iri ti Nzapa na Genèse 22:14: “Abraham adi iri ti ndo so Jéhova-Jiré; azo atene juska laso, Na hoto ti L’Eternel [“Jéhovah”, NW ], fade a bâ Lo.”

Na popo ti ngu 1800 ti si na ngu 1850, tongana amissionnaire ti Sociéte ti amissionnaire ti Londres asi lani na Tahiti, azo ti kodoro ni ayeke voro anzapa mingi. Anzapa ni oko oko kue ayeke na iri ti ala, na ala so azo ni ayeke voro ala mingi ayeke Oro na Taaroa. Ti zia kangbi na popo ti Nzapa so ayeke na yâ ti Bible na ambeni nzapa ni nde so, amissionnaire ni so aku pëpe ti di iri ti Nzapa so akiri pekoni na Iehova na yanga ti Tahitien.

Azo mingi ahinga iri so na ala yeke di ni mingi na yâ lisoro ti ala ti lâ oko oko nga na yâ ti ambeti so ala yeke tokua na mba. Gbia Pomare ti Use ni, so lo komande lani na Tahiti na tongo nda ti ngu 1800, asara kusala fani mingi na iri ti Nzapa na yâ ti ambeti so lo wani lo yeke tokua na azo. Mbeni ye so afa ni ayeke lettre ti lo so ayeke ndo ti lembeti so. A sû lettre ni na yanga ti Anglais na a wara ni na yâ da ti batango aye ti ndara ti Tahiti na azoa ni. Lettre ni so afa biani atene azo aduti lani nduru ti yeda ti di iri ti Nzapa na ngoi ni kâ. Na ndo ni, iri ti Nzapa asigigi fani saki mingi na yâ ti kozo Bible ti yanga ti Tahitien so a hunzi sarango ni na ngu 1835.

[Foto na lembeti 32]

Gbia Pomare ti Use ni

[[Lingu ti foto na lembeti 32]

Foto ti gbia ni na lettre ni: Collection du Musée de Tahiti et de ses Îles, Punaauia, Tahiti