E yeke na bezoin ti mbeni Messie?

A LINGBI ti si so mo hunda tere ti mo na tënë so: “E yeke na bezoin ti mbeni Messie?” Biani, a yeke na lege ni ti hunda tere ti mo wala mbeni Messie alingbi biani ti sara mbeni ye ndali ti mo.

Ambeni zo so mo yeke mû tënë ti ala na nene ni mingi alingbi ti tene biani na mo so mo yeke tâ na bezoin ti mbeni Messie, tongana ti so azo kue nga ayeke na bezoin ti lo. Na ngoi ti akozo Chrétien, mbeni zo so ahinga lani ndia ti aJuif ngangu atene tënë so na ndo Messie ni: “Na yâ Lo zendo ti Nzapa kue ayeke oui.” Ge, lo ye ti fa kusala ti Messie ni na yâ ti aye so Nzapa aye ti sara, so ayeke ti iri tënë nzoni na ndo amara kue ti sese (2 aCorinthien 1:20). Teti so kusala ti Messie ni ayeke kota mingi, aprophétie ti Bible asara tënë mingi na ndo gango ti lo nga na fini ti lo na ndo sese. Na yâ ti mbeni buku so azo kutu mingi adiko ni na yâ ti angu 70 so ahon, Henry Halley atene: “A sû Testament ti Giriri ti sara si azo aku na nzara ni Gango ti [Messie], nga ti leke lege ti ku na gango ti lo ni.” Me gango ti lo ayeke kota ye biani? A yeke nzoni ti tene tënë so agbu bê ti e ngbanga ti nyen?

Iri “Messie” aye biani ti tene “Lo so a sa ye na li ti lo” nga nda ni ayeke legeoko na iri Christ so azo ahinga ni mingi. A lingbi Messie ni, so mbeni kota bakari ti ngu 1970 (Encyclopædia Britannica) airi lo “kota watongo zo”, aga ndali ti so Adam na Eve asara ye lani na mbana. A sara ala lani nzoni-kue, nga a zia na gbele ala pendere beku ti fini ti lakue lakue na yâ Paradis, me ala girisa ni. Mbeni ange ti kpengba-li, so na pekoni a hinga lo na iri ti Satan Zabolo, atene so Wasarango ala akanga lege ti aye mingi na ala. Nga, lo tene so ala yeke duti ande nzoni mingi tongana a yeke na ala mveni ti soro ye ti nzoni na ti sioni.​—Genèse 3:1-5.

Lo handa Eve, na Eve amä na bê na mvene so. A lingbi ti tene so Adam abâ songo ti lo na wali ti lo na nene ni mingi ahon ti duti be-ta-zo na Nzapa, na lo mû peko ti Zabolo na yâ kpengba-li so lo sara (Genèse 3:6; 1 Timothée 2:14). Asioni ye ti peko ti sarango ye ti ala ayeke gi pëpe pasa ti fini ti lakue lakue na ndo sese so ayeke paradis so ala mveni agirisa ni, me ala ga na siokpari nga na kuâ ndo ti ahale ti ala so ala ade ti dü ala pëpe.​—aRomain 5:12.

Na lê ni lê ni, Jéhovah, Wasarango e, afa mbeni ye so na lege ni lo yeke hunzi ande gbâ ti akpale so ayeke ga na peko ti kengo yanga so. Jéhovah ayeke sara si azo akiri alë songo na lo na lege ti mbeni kpengba-ndia so a yeke fa ni ande na yâ ti Ndia ti Moïse; kpengba-ndia ni ayeke “fini teti fini”. (Deutéronome 19:21; 1 Jean 3:8). Ti tene mbeni oko ti ahale ti Adam na Eve aduti mbeni lâ na fini lakue lakue na yâ ti paradis tongana ti so Wasarango ye aleke lani teti azo, a lingbi a sara ye alingbi na kpengba-ndia so kozo si. Ye so la asara si a lingbi e wara Messie ni.

Lâ ni so lo yeke dë ngbanga na li ti Zabolo, Jéhovah Nzapa atene kozo prophétie so: “Fade Mbi zia tënë ti ke na popo ti mo na wali so, na na popo ti hale ti mo na hale ti lo; fade lo mboko li ti mo, na fade mo mboko ndagere ti lo.” (Genèse 3:15). Mbeni wagingo nda ti Bible atene so “mbaï ti azendo ti Mbeti ti Nzapa so andu Messie ato nda ni na ndo ti tënë [so].” Mbeni nde atene ti lo so Messie ni ayeke zo so na lege ti lo fade Nzapa “ayeke zi akpale kue so aga ndali ti siokpari” so Adam na Eve asara nga na oko ngoi ni lo yeke ga na aye ti nzoni na azo.​—aHébreu 2:14, 15.

Ye oko, peut-être mo hinga biani so laso ade azo awara aye ti nzoni so pëpe. Nde na so, azo ayeke nga na beku oko pëpe. Nda ni la, mbeni kota bakari (The World Book Encyclopedia) atene so “aJuif mingi angbâ ti ku gango ti mbeni Messie” na “lo yeke zi ande aye ti sioni nga lo yeke futi awato ti ala”. Ye oko, Bible atene so Messie ni aga awe. Mbeni nda ti tënë ayeke dä ti mä na bê na ye so Bible atene so? Article ti peko ayeke kiri tënë dä.