Ala zia lani ngia na bê ti ababâ na amama ti ala
“MOLENGE ti mbi, tongana bê ti mo ayeke na ndara, fade bê ti mbi awara ngia, même tâ bê ti mbi mveni.” (aProverbe 23:15). Biani, ababâ na amama Chrétien ayeke na ngia tongana amolenge ti ala awara ndara so alondo na Nzapa. Na samedi, lango 10 ti septembre 2005, azo 6 859 so alondo na akodoro nde nde aga na matanga ti mungo diplôme na a-élève ti klase 119 ni ti Ekole ti Galaad ti Mandango Bible ti Société Watchtower. Bê ti azo kue lani asi singo na ngia, mbilimbili ababâ na amama ti a-élève 56.
David Walker, mbeni ita so aninga na yâ sewa ti Béthel ti Amerika, ato nda ti kapa ni na mbeni sambela so alondo na bê. Na pekoni, zo so amû li ti kapa ni, David Splane ti Wabatango Bungbi, ato nda ti kapa ni na tenengo na ababâ na amama ti a-élève ni: “Ala lingbi ti tene e gonda ala na bê kue. Anzoni sarango ye so ala lu na yâ amolenge ti ala ti koli na ti wali apusu ala ti mû kua ti missionnaire.” Peut-être bê ti ababâ na amama so ayeke gi ala lani, ngbanga ti so amolenge ti ala ti koli na ti wali ayeke londo ti gue ti sara kua na yongoro ndo. Ye oko, Ita Splane adë bê ti ala, lo tene: “Ala gi bê ti ala na ndo ti amolenge ti ala pëpe. Jéhovah alingbi ti bâ lege ti ala nzoni mingi ahon ti so ala lingbi ti sara.” Lo kiri lo tene: “Ala gbu li na ndo nzoni so amolenge ti ala ti koli na ti wali ayeke sara ande. Azo so ayeke bâ pasi ayeke wara ande tâ dengo bê ti kozoni na yâ fini ti ala.”
Lege ti ngbâ ti mû ngia na azo
Ita so amû li ti kapa ni afa iri ti azo osio so ayeke ga na peko ti mba ti mû diskur. Kozo zo ti mû tënë ayeke Ralph Walls ti filiale ti Amerika; li ti tënë ti lo ayeke: “Zia lê ti i angbâ na zingo ni.” Lo tene so ti tene lê ti zo abuba na lege ti yingo ayeke sioni mingi ahon na lege ti mitele. Lê ti kongregation ti Laodicée na ngoi ti akozo Chrétien abuba lani na lege ti yingo. A-Chrétien so lê ti ala abuba lani na yâ ti kongregation so awara mungo maboko, me a yeke lakue nzoni mingi ti kpe ti duti na mara bubango lê tongaso. Zo alingbi ti sara ni tongana lo ngbâ ti bata lê ti lo ti yingo na zingo ni (Apocalypse 3:14-18). Wamungo tënë ni atene: “Zia lê ti i angbâ na zingo ni, na zia i bâ aita so ayeke mû li ni tongana ti so Jéhovah ayeke bâ na ala.” A lingbi a-élève ni agi bê ti ala senge senge pëpe tongana akpale ayeke na yâ ti kongregation. Seigneur Jésus Christ ahinga aye so kue. Lo yeke bâ ande si a leke akpale ni na tâ ngoi ni.
Na pekoni, Samuel Herd ti Wabatango Bungbi akiri tënë na hundango tënë so: “Ala yeke nduru ti sara ye?” Legeoko tongana ti so mbeni zo so ayeke gue na tambela ayeke mû abongo ti lo ti yungo ni, a lingbi a-élève ni ayü lakue fini zo na asarango ye ti lo. A lingbi ala bâ mawa ti azo tongana Jésus. Tongana lani mbeni zo ti buruma atene na lo: “Tongana Mo ye, Mo lingbi sara si tere ti mbi aga nzoni”, Jésus atene na lo: “Mbi yeda; tere ti mo aga nzoni.” (Marc 1:40-42). Na wamungo diskur ni atene: “Tongana i ye biani ti mû maboko na azo, fade i yeke wara ngia ti sara ni.” Mbeti ti aPhilippien 2:3 ahunda na aChrétien ti bâ “aita ti ala tongana azo so ayeke nzoni ahon ala”. Ita Herd atene: “Ti duti na tâ be-ti-molenge ayeke kota ye ahon ti duti na hingango ndo. Azo so i yeke tingbi na fango tënë nga na aita ti i na yâ ti kongregation ayeke wara ande nzoni na lege ti hingango ndo ti i tongana i yeke na tâ be-ti-molenge.” Lo hunzi tënë ti lo na tenengo so tongana a-élève ni angbâ ti yü ndoye ti aChrétien, ala yeke nduru awe ti gue na ndo so a tokua ala dä na fade kusala ti ala ayeke tambela nzoni biani.—aColossien 3:14.
Mark Noumair, mbeni oko ti awafango mbeti na Galaad, asara si azo ayeke ku ti hinga ye so lo ye ti tene na yâ tënë ti lo so li ni ayeke: “Mo yeke ngbâ ande ti bata ni?” Tënë ni andu singila so e yeke na ni ndali ti aye ti nzoni so Jéhovah asara teti e. Mbeti ti Psaume 103:2 atene: “O âme ti mbi, sara tënë nzoni na L’Eternel, na mo girisa pëpe ye ti nzoni ti Lo kue.” Azo ti Israël akiri lani singila pëpe ndali ti manne so abata ala na fini; ala iri ni “kobe ti sioni so.” (Nombre 21:5). Tongana ngoi ayeke hon, ngangu ti manne ni angbâ ti lo, me singila ti ala ndali ni amiro. Ita ni atene: “Tongana i girisa anzoye so Jéhovah asara na i zia si kusala ti i na kodoro wande aga mbeni senge ye, fade ye so ayeke sara ngangu na ndo lege so i yeke bâ na kusala so Jéhovah amû na i.” Psaume 103:4 atene so Jéhovah ayeke sara si “nzobe . . . aga couronne ti mo”. A-élève ni ayeke bâ ande nzobe ti Nzapa na yâ ti afini kongregation ti ala.
Mbeni wafango mbeti ni nde, Lawrence Bowen, asara tënë na ndo li ti tënë “Fade anzoye so aga ye ti mo?” Lo tene so a-élève ti klase 119 ti Galaad aleke tere ti ala ngangu ti duti amissionnaire so ayeke lë lengo. Me ti fadeso, a lingbi ala ngbâ nduru na Jéhovah nga na kua so lo mû na ala. Na Apocalypse 14:1-4, a fa azo 144 000 tongana “ala so ague na peko ti Molenge Ti Ngasangbaga na ndo kue so Lo gue.” Azo kue so ayeke na yâ ti bungbi so angbâ be-ta-zo na Jéhovah nga na Molenge ti lo, atâa atara so asi na ala, ala wara ye so ala zia na gbele ala. Wamungo tënë ni atene: “Atâa ye so alingbi ti si, e nga e yeke ngbâ be-ta-zo na Jéhovah nga na kua so lo mû na e.” Tongana ala sara tongaso, fade anzoye ti Jéhovah ‘ayeke ga ye’ ti a-élève ni.—Deutéronome 28:2.
Lege ti tene kusala ti ala alë lengo
Na nda-yenga oko oko ti mandango ye ti ala, a-élève ni ague lani na fango tënë. Tongana ti so Wallace Liverance, wakuasu ti ekole ni atene na ala na ngoi ti kapa ni, aye afa polele so ala sara kua lani nzoni. Ala fa nzo tënë na ayanga ti kodoro bale-oko tongaso na ala to nda ti manda Bible na azo. Mbeni élève ni na wali ti lo ato nda ti manda Bible na mbeni koli ti kodoro ti Chine. Na pekoni so ala gue abâ lo fani use, ala hunda tënë ti bê ti lo na ndo hingango Jéhovah. Lo zi Bible ti lo na lo hunda ala ti diko Jean 17:3. Ti lo, lo bâ so lo yeke na ndo lege ti fini.
Na pekoni, Anthony Morris ti Wabatango Bungbi ahunda tënë na aita ota so ayeke sara kua na yâ akomite ti filiale ti kodoro ti Côte d’Ivoire, ti Équateur na ti République Dominicaine. Aita so adë bê ti a-élève ni so akomite ti filiale ayeke ku kungo ti yamba ala na ala ayeke mû maboko na ala ti duti nzoni na ndo so a yeke tokua ala dä.
Na pekoni, Leonard Pearson ti sewa ti Béthel ti Amerika asara lisoro na aita ota ti komite ti filiale ti Ouganda, ti Papouasie-Nouvelle-Guinée na ti République Démocratique ti Congo. Aita so awa a-élève ni ti bi tere ti ala kue na yâ fango tënë. Mbeni koli na wali missionnaire so asara ngu 21 na Congo amû maboko na azo 60 ti mû tere ti ala na Nzapa na ti kamata batême. Koli na wali so ayeke na a-étude 30, na azo 22 so ala yeke manda Bible na ala ayeke gue na bungbi. Ndali ti mara ti kota kongo le-kobe ti yingo tongaso, a yeke fadeso pendere ngoi ti sara kusala tongana missionnaire.
Fango tënë na bibe ti sara ye hio
Gerrit Lösch, ti Wabatango Bungbi, amû tënë ti nda ni. Li ti tënë ti lo ayeke: “E sara tënë na ndo Nzapa na e sara tënë ti témoin na ndo Jésus na lâ ti Seigneur.” Na yâ buku ti Apocalypse, a yeke wara atënë “témoin”, “atémoin” na “tënë ti témoin” fani 19. Tongaso, Jéhovah afa polele kusala so lo yeke na ni ndali ti azo ti lo. A lingbi e fa tënë so lawa? Na ngoi ti “lâ ti Seigneur”. (Apocalypse 1:9, 10). Lâ ti Seigneur so ato nda ni na ngu 1914, a ga juska na ngoi ti e na a ngbâ ti gue. Na Apocalypse 14:6, 7, a sara tënë ti a-ange so ayeke mû maboko na kua ti fango tënë na ndo Nzapa. Apocalypse 22:17 afa so a mû kungba ti fango lege na kusala ti fango tënë na ndo Jésus na tanga ti aChrétien so a sa yingo na ndo ti ala. Me a lingbi azo kue awara nzoni na lege ti matabisi so laso. Na versê 20, Jésus atene: “Mbi yeke ga fade.” Ita Lösch awa azo kue so aga, lo tene: “I dekongo na azo, i tene: ‘I ga! I nyon ngu so amû fini senge senge.’ Jésus ayeke ga fade fadeso. E leke tere ti e awe?”
Fred Rusk, so afa mbeti lani na Ekole ti Galaad teti ngu 11, ahunzi kapa ni na mbeni sambela ti kiri singila na Jéhovah so andu bê ti azo kue so aga. A yeke lani mbeni lango so ahunzi nzoni nga mbeni ngoi ti kota ngia.
[Encadré na lembeti 13]
AYE TI HINGA NA NDO KLASE NI
Wungo ti akodoro so a-élève ni alondo dä: 10
Wungo ti akodoro so a tokua ala dä: 25
Wungo ti a-élève ni: 56
Ngu ti ala oko oko angoro na tele ti ngu: 32,5
Ngu ti mingi ti ala na yâ tâ tënë: 16,4
Ngu ti mingi ti ala na yâ kusala ti ngoi kue: 12,1
[Foto na lembeti 15]
Klase 119 ni ti Galaad, Ekole ti Mandango Bible ti Société Watchtower
Na yâ bungbi ti a-iri so a fa na gbe ni ge, a fa numéro ti amolongo ni ti londo na devant ti kiri na peko, nga na ndo molongo oko oko, a fa iri ti azo ni ti londo na gati ti gue na koti.
(1) Helgesen, S.; Daugaard, H.; Pierluissi, A.; Joseph, I.; Racanelli, C. (2) Byrge, T.; Butler, D.; Freedlun, J.; Nuñez, K.; Pavageau, C.; Doumen, T. (3) Camacho, O.; Lindqvist, L.; Broomer, A.; Wessels, E.; Burton, J.; Woodhouse, O.; Doumen, A. (4) Tirion, A.; Connally, L.; Fournier, C.; Gil, A.; Johnsson, K.; Hamilton, L. (5) Byrd, D.; Scribner, I.; Camacho, B.; Laschinski, H.; Hallahan, M.; Libuda, O. (6) Joseph, A.; Lindqvist, M.; Helgesen, C.; Nuñez, D.; Scribner, S.; Fournier, J. (7) Pierluissi, F.; Pavageau, T.; Broomer, C.; Racanelli, P.; Butler, T.; Woodhouse, M.; Libuda, J. (8) Laschinski, M.; Freedlun, S.; Burton, I.; Tirion, M.; Byrd, M.; Byrge, J. (9) Wessels, T.; Hallahan, D.; Connally, S.; Gil, D.; Daugaard, P.; Hamilton, S.; Johnsson, T.