Sara si gbungo li aga ye so anzere na mo
TI AMBENI zo, na mango tënë ti gbungo li ngangu kue ahunzi na ala. Ala lingbi ti bâ gbungo li tongana mbeni ngangu kua so ahunda ti tene bibe ti zo kue aduti gi na ndo ti mbeni ye. Kamene alingbi nga ti sara azo tongaso teti ala bâ gbungo li tongana senge ye, mbilimbili tongana ala diko ye na ndo nene ti gbungo li (aPhilippien 4:8). Ye oko, tongana e duti kpô ti gbu li na ndo atâ tënë so e manda na ndo Jéhovah, na ndo anzoni sarango ye ti lo, akusala ti kpene ti lo, aye so lo hunda na pendere ye so lo ye ti sara, a lingbi na a yeke duti ande tâ nzoni lege ti sara kua na ngoi ti e. Ngbanga ti nyen?
Jéhovah Nzapa ayeke Kota gbia ti dunia kue na lo yeke sara kua lâ na lâ ti tene kota ye so lo ye ti sara aga tâ tënë (Jean 5:17). Atâa so kue, lo yeke bi bê ti lo na aye so awakua ti lo oko oko agbu li dä. David, wasungo psaume, ahinga lani tënë so na yingo ti Nzapa apusu lo ti tene: “O L’Eternel, Mo tara mbi awe, na Mo hinga mbi. Mo hinga lege ti dutingo ti mbi na londongo ti mbi, yongoro kâ, Mo hinga bibe ti mbi.”—Psaume 139:1, 2.
Mbeni zo alingbi ti bâ atënë ti wasungo psaume so na sioni lê. Lo lingbi ti tene: ‘Atâa so Nzapa ayeke “yongoro kâ,” lo hinga asioni pensé kue so ayeke ga na li ti mbi.’ Biani, ti tene zo ahinga mara ti ye tongaso ayeke nzoni. A lingbi ti mû maboko na e ti tomba asioni pensé so aga na li ti e; na tongana e yeke na mara ti apensé ni so, e lingbi ti fa ni na Nzapa na dutingo na beku so fade lo yeke pardone e na lege ti mabe ti e na yâ sandaga ti fini ti Jésus so lo mû ti zi e (1 Jean 1:8, 9; 2:1, 2). Ye oko, na oko ngoi ni, zia e dabe ti e so Jéhovah ayeke bâ awakua ti lo na ti nzoni ni. Lo yeke mä e na ngoi so e yeke gbu li na ndo ti lo na singila na bê.
Peut-être mo yeke hunda tere ti mo: “Jéhovah ayeke bâ biani anzoni gbungo li kue ti awakua ti lo kutu mingi mingi so na nene ni?” Biani lo yeke sara ni. Jésus aluti lani mingi na ndo bingo bê ti Jéhovah na ndo ti e tongana lo tene so Jéhovah ayeke bâ même akete kete nzêrë; na pekoni lo tene : “Ngere ti i ayeke ngangu ahon ngere ti atiri [anzêrë] mingi.” (Luc 12:6, 7). Anzêrë alingbi ti pensé na Jéhovah pëpe. Tongaso, tongana Jéhovah ayeke bâ lege ti ala, bâ tongana nyen lo yeke bi bê mingi na e nga lo yeke na ngia tongana e oko oko kue e yeke gbu li na ndo ti lo! Biani, tongana David, e lingbi ti sambela na bê kue, e tene: “Zia . . . bibe ti mbi amû ngia na Mo, O L’Eternel, Tênë ti mbi na Zo Ti Ton mbi.”—Psaume 19:15.
Mbeni ye so nga afa atene Jéhovah ayeke bi bê ti lo biani na ndo gbungo li ti awakua be-ta-zo ti lo ayeke na yâ tënë ti prophète Malachie so lo tene ni na gbe ti yingo vulu ti Nzapa. Na ndo ngoi ti e, Malachie atene: ‘Ala so akpe mbeto ti L’Eternel, ala sara tënë na popo ti ala; na L’Eternel azia mê ti Lo ti mä, na Lo mä. Na a sara mbeti ti dabe na gbele Lo tënë ti ala so akpe mbito ti L’Eternel, na ala bi bê ti ala na iri ti Lo.’ (Malachie 3:16). Tongana e dabe ti e so Jéhovah ayeke ‘zia mê ti Lo ti mä’ e tongana e yeke bi bê na lo alingbi biani ti sara si gbungo li ti e na ndo Nzapa aga ye so anzere. Tongaso, zia e yeda na tënë ti wasungo psaume so lo tene: “Fade mbi gi bê ti mbi na kusala ti Mo kue, na mbi bi bê ti mbi tënë ti ye so Mo sara.”—Psaume 77:13.