‘Ye ti bata mbi alondo na Jéhovah’

Ti gbanzi ye na tele aga na deba nzoni ti Jéhovah

NA CAMEROUN, mbeni koli ayeke hon na vélo na yâ mbeni kota gbako ti kodoro ni. Teti angbonga mingi, lo hon na ndo ti alege so ngu amû ndo ni kue nga so potopoto ahon ndo ni. Lo yeke hon na yâ ti akpale so ti gue ti mû maboko na ambeni zo. Na Zimbabwe, akoli use azia abongo na aporo ti ala na li ti ala, na ala tambela kilomètre 15 na yâ ti angu so asuku mingi ti gue ti fa ye na ambeni zo so alango na mbeni yongoro ndo. Na mbeni ndo nde, mbeni wali ayeke londo na ngbonga osio ti ndapelele ti gue ti fa ye na mbeni wali-wanganga so alingbi ti wara lo gi na yanga ti ndapelele

Ngbanga ti nyen azo osio so ayeke sala angangu so kue? A yeke ngbanga ti so ala yeke aTémoin ti Jéhovah so ayeke sala kusala ti fa tâ tënë ti Mbeti ti Nzapa na azo na ngoi kue. A-Témoin ti Jéhovah so ayeke sala kusala ti ngoi kue ayeke apionnier permanent, apionnier spécial, amissionnaire, asurveillant so ague na ndo nde nde, nga azo saki mingi so ayeda na bê ti ala mveni ti sala kua na yâ ti aBéthel na ndo lê ti sese kue. Ala kue ayeke ndulu ti gbanzi aye na tele ti sala kua ti ala.a

Nzoni bibe si apusu ala ti sala kua

A-Témoin ti Jéhovah ayeke mû peko ti wango so bazengele Paul amû na Timothée: “Mo gi lege ngangu ti mû tele ti mo na Nzapa tongana zo so alingbi na lê ti Lo, zo so ahinga kusala ni si kamene asala lo pëpe, zo so afa nda ti tene-biani na lege ni.” (2 Timothée 2:15). Me nyen la apusu aTémoin saki mingi mingi ti mû kusala ti fango tënë ti ngoi kue?

Tongana a hunda na aita so amû kusala ti ngoi kue ngbanga ti nyen ala yeke sala ngangu mingi na yâ kusala ti Jéhovah, ala kue atene so a yeke ndoye so ala yeke na ni teti Nzapa nga teti amba ti ala zo si apusu ala ti sala tongaso (Matthieu 22:37-39). Tënë ti ala so ayeke biani na lege ni, ndali ti so tongana ndoye ayeke pëpe ti pusu zo ti sala ye, ka ngangu kue so lo mû ti sala na kua ayeke gi senge.​—1 aCorinthien 13:1-3.

Kusala so zo agbanzi ye na tele ti lo ti sala ni

A-Chrétien kue so amû tele ti ala na Nzapa ayeda na tisango ndo ti Jésus so: “Tongana mbeni zo aye ti ga na peko ti Mbi, a lingbi lo ke tele ti lo mveni, lo yô keke ti [pasi, NW ] ti lo, na lo ga na peko ti Mbi.” (Matthieu 16:24). Ti tene e ke tele ti e a ye ti tene, na bê ti e kue, e yeda so e yeke ti Jéhovah Nzapa na Jésus Christ nga a yeke ala si ayeke fa lege na e. Bango ndo so asala si azo mingi agbanzi ye na tele ti ala ti mû kusala ti ngoi kue.

A-Témoin mingi ayeke sala akota ngangu ti kono yâ ti kusala so ala yeke sala na Jéhovah. Bâ tapande ti Júlia so ayeke na ngu 56 na so ayeke pionnier permanent na Brésil. Lo dabe ti lo na mbeni ye so asi na lo, lo tene: “Mbeni ita Chinois apika singa na mbi ti hunda mbi wala mbi ye ti manda yanga ti Chinois. Teti so ngu ti mbi ague na li ni, mbi bi bê ti mbi lâ oko pëpe ti manda mbeni fini yanga ti kodoro. Me alango kete na pekoni, mbi yeda ti sala ngangu ti manda ni. Laso, mbi lingbi ti fa tënë na yanga ti Chinois.”

Filiale ti aTémoin ti Jéhovah na Pérou atene: “Na yâ ti angu so ahon a ninga pëpe, apionnier permanent mingi ayeda ti gue na aterritoire so akongregation ayeke dä pëpe. Na salango tongaso ala fa na gigi so ala sala mbito pëpe nga ala yeke ndulu ti gbanzi ye na tele ti ala. Ala yeke gue na agbata so ayo na ando so wâ ti dada na ambeni ye tongaso ayeke dä pëpe nga so warango kua ti nginza ayeke ngangu. Aita-koli na ita-wali ni ayeke ndulu ti sala ye kue so alingbi ti mû lege na ala ti ngbâ na ando so kâ. Me kota ye ni ayeke so, na ndo nde nde so ala si dä kusala ti ala aga na aye ti nzoni. Asurveillant so ague na ndo nde nde atene so afini groupe abâ gigi ndali ti apionnier permanent so agbanzi ye na tele ti ala.”

Ti mû maboko na aita ti ala, ambeni Chrétien azia fini ti ala na lê ti kuâ (aRomain 16:3, 4). Na mbeni kodoro ti Afrika so bira ayeke dä, mbeni surveillant ti circonscription atene: “Kozoni si mbi na wali ti mbi e si na ndangba ndo so ayeke na popo ti kodoro so awabingo kpale akanga lege dä nga na ti so aturugu ti batango kodoro ayeke dä, akota zo osio ti awabingo kpale ni nga na aturugu ti ala angoro e na ala hunda na e ti fa ambeti ti e. Gi na ngoi so ala bâ mbeti ti e ala hinga so e londo na ndo so aturugu ti batango kodoro ayeke dä, tongaso ala to nda ti bâ e na sioni lê. Ti ala, ala tene mbi ga gi ti bembe ndo na iri ti aturugu ti kodoro ni. Tongaso, ala tene ala yeke bi mbi na yâ ti mbeni kota dû. Mbi fa na ala so e yeke aTémoin ti Jéhovah na nda ni ala zia e ti gue.” Akongregation ayeke na ngia mingi so aita so ayeke ndulu ti gbanzi ye na tele ti ala awara lege ti ga ti bâ ala!

Atâa akpale so ala wara, wungo ti awakua ti ngoi kue angbâ ti gue na li ni na ndo sese kue (Esaïe 6:8). Awakua so asala kua na ngangu abâ na nene ni mingi matabisi so ala yeke na ni ti sala na Jéhovah. Laso azo kutu mingi nga ayeke sepela Jéhovah, na ala kue ayeke na oko bibe ti gbanzingo ye na tele so. Na Jéhovah ayeke hiri gbâ ti adeba nzoni na ndo ti ala (aProverbe 10:22). Teti ala hinga Jéhovah ayeke ngbâ ti hiri deba nzoni na ndo ti ala nga lo yeke mû maboko na ala, angangu wakua tongaso ayeke na oko bango ndo ti wasungo psaume so ahe bia lani atene: ‘Ye ti bata mbi alondo na Jéhovah.’​—Psaume 121:2.

[Kete tënë na gbe ni]

[Kete tënë na lembeti 9]

“Azo ti Mo [ayeke mû] ala mveni na nzobe, na lâ ti bira ti Mo.”​—PSAUME 110:3

[Encadré na lembeti 8]

JÉHOVAH ABÂ NA NENE NI MINGI AWAKUA SO AMÛ BÊ TI ALA KUE TI SALA NA LO

“I duti kpô, i zia ye ayengi i pëpe, i wu na kusala ti Seigneur lakue, teti i hinga kusala ti i ayeke senge pëpe na yâ Seigneur.”​—1 aCorinthien 15:58.

“Nzapa ayeke kirikiri pëpe si Lo lingbi girisa kusala ti i, ndoye so i fa giriri teti iri ti Lo.”​—aHébreu 6:10.