Ti fa nda ti afä ayeke kota ye mingi!

Gertrud, mbeni mama na Zamani atene: “Mbi bâ ti mbi kozoni mbi tene, li ti molenge ti e Andreas aso gi senge. Me lo yeke na nzara ti kobe pëpe nga tele ti lo ayeke wâ mingi. Songo li ni akiri aga ngangu, na mbi to nda ti gi bê ti mbi. Tongana koli ti mbi akiri na kodoro, e mû Andreas ti gue ti bâ docteur. Tongana lo bâ aye so aso Andreas, hio lo to lo na hôpital. Kpale ni ayeke gi senge songo li pëpe. Andreas ayeke na méningite. A mû na lo yorö, na kete na pekoni tele ti lo akaï.”

ABABÂ na mama mingi ahinga ye so asi na Gertrud. Ala bâ aye so afa atene kobela ayeke hara molenge ti ala. Atâa so a yeke akobela kue si aga na kpale pëpe, ababâ na mama alingbi ti sala hange tongana tele ti molenge ti ala aye ti so. Ti bâ aye so asi na molenge ni na ti sala ye hio alingbi ti kanga lege na mbeni ye ti ngangu. Na ye so ayeke kota ye mingi.

Ye so ayeke tâ tënë na yâ ti ambeni ye so ane mingi ahon tënë ti seni. Mbeni tapande ni ayeke kpale ti tsunami so asi na nze ti décembre ngu 2004 na yâ ti akodoro so ayeke na tele ti ngu-ingo so ayeke na popo ti Afrika, Asie na Australie. Andokua ti letäa ti akodoro tongana Australie na Hawaii abâ na lege ti amasini ti ala so sese ayengi ngangu na banga ti Sumatra, na ala fa so mbeni kota kpale alingbi ti si na pekoni. Ye oko, lege ayeke lani dä pëpe ti tokua na azo so alango na akodoro so ti kpe hio. Ye ti pekoni ayeke so azo 220 000 tongaso awara kuâ.

Ambeni fä so ane ngangu mingi

Na ngoi so Jésus Christ ayeke lani na sese, lo fa na awamango lo nene ti bâ afä nga ti sala ye alingbi na ni. Lo sala lani tënë ti mbeni ye so ayeke kota mingi. Mbeti ti Nzapa atene: “A-Farizien na aSadducéen aga, ala hunda Lo ti fa na ala mbeni fä ti yayu, teti ala ye ti tara Lo. Me Lo kiri tënë na ala, Tongana lâ aye ti kui, i tene, Fade ndo aga nzoni, teti le-nduzu abe. Na ndapelele i tene, Fade ngu apika laso, teti le-nduzu abe na mbinda ayeke mingi. I hinga fä ti le-nduzu, me i lingbi hinga fä ti fadeso pëpe.”​—Matthieu 16:​1-⁠3.

Tongana lo sala tënë ti “fä ti fadeso”, Jésus aye ti tene so a lingbi aJuif so amä lo ahinga so ngoi ti ala ayeke ngoi ti sala ye hio. Mbeni ye ti sioni mingi aga ndulu ti tï na ndo bungbi ti aye ti aJuif na a yeke ndu ala kue. Lango kete kozoni na kuâ ti lo, Jésus asala tënë ti fä ti singo ti lo na adisciple ti lo. Ye so lo tene na ngoi ni kâ ane mingi teti azo kue laso.