‘Ye ti bata mbi alondo na Jéhovah’

Hingango ye ti Nzapa akpengba asewa

MBENI koli na wali ti lo so ayeke na Argentine ahiri mur so ala leke ti kangbi yâ ti da ti ala use “mur ti Berlin” (tongana tâ mur so akangbi lani yâ ti gbata ti Berlin use: Berlin ti Tö na Berlin ti Do). Ala yeke mä tele oko pëpe; ala ke tele ngangu.

Mawa ni ayeke so a yeke gi koli na wali so si ayeke na yâ ti kpale so pëpe. Na yâ ti asewa mingi, papa, lango-sioni na kengo ndo ahon ndo ni. A yeke ye ti mawa biani, teti sewa ayeke mbeni ye so Nzapa la azia ni na sese (Genèse 1:27, 28; 2:23, 24). Matabisi ti Nzapa so ayeke mbeni pendere ndo so a lingbi a fa tâ ndoye dä (Ruth 1:9). Na salango ye so Nzapa ahunda na ala, azo ti sewa kue alingbi ti mû gonda na Jéhovah na ti duti mbeni deba nzoni na popo ti ala.a

Teti so a yeke Nzapa si ayeke na gunda ti sewa, e yeke na bezoin ti zi lege na bango ndo ti lo ti fa na e tongana nyen a lingbi sewa atambela. Tënë ti lo amû awango so alingbi biani ti mû maboko na sewa ti ga nzoni, mbilimbili tongana akpale alondo. Na ndo kungba ti akoli, Bible atene: “A lingbi akoli andoye awali ti ala legeoko tongana tele ti ala mveni.” Tongana koli asala ye alingbi na ye so a hunda so, tele ti wali ti lo ayeke nzere mingi ti ‘yekia koli lo.’​—aEphésien 5:25-29, 33.

Na ndo kamba ti songo na popo ti ababâ na mama na amolenge ti ala, bazengele Paul asû na mbeti: “I, ababâ, i gi amolenge ti i na tënë pëpe, si ngonzo agbu ala; me i bata ala, i fa lege na ala na wango ti Seigneur.” (aEphésien 6:4). Na salango tongaso, fade nzoni mango tele ayeke duti dä, ye so asala si a yeke ngangu pëpe na amolenge ti mä yanga ti ababâ na mama ti ala.—aEphésien 6:1.

Atënë so e londo ti bâ ayeke atapande ti wango ti ndara ti Bible na yâ duti ti sewa. Na salango ye alingbi na akpengba-ndia ti Nzapa, asewa mingi aduti na ngia. E mû tapande ti koli na wali so e sala tënë ti ala na li ni fade. Na peko ti mandango Bible nze ota na aTémoin ti Jéhovah, ala to nda ti sala ye alingbi na awango ti ndara na ndo tënë ti mariage. Ala sala ngangu mingi ti maï lisoro na popo ti ala, ti bi bê na abezoin ti mba na ti duti ndulu ti mû pardon (aProverbe 15:22; 1 Pierre 3:7; 4:8). Ala manda ti hon ndo ti ngonzo ti ala na ti bi lê na mbage ti Nzapa ti hunda maboko ti lo na ngoi so ye atara ti gue nzoni pëpe (aColossien 3:19). Kete na pekoni, “mur ti Berlin” ni atï!

Nzapa alingbi ti kpengba sewa

Hingango ye ti Nzapa nga na salango ye so lo hunda alingbi ti kpengba mbeni sewa ti luti ngangu na gbele akpale. A yeke kota ye mingi ngbanga ti so aprophétie afa so sewa ayeke wara mbeni ngangu kpale na ngoi ti e. Paul afa kozoni so salango ye nga na dutingo ti azo na yâ ti kodoro ayeke buba na ngoi so e yeke dä. Lo tene lani so “na lâ ti nda ni,” fade azo asala ye nzoni pëpe, ‘azo andoye asongo ti ala pëpe’, na kengo yanga ti ababâ na mama ayeke duti dä, même na popo ti ala so “a bâ ala tongana azo ti bata tënë ti Nzapa”.—2 Timothée 3:1-5.

Ti sala kue ti nzere na lê ti Nzapa ayeke mû maboko ti mingo aye kue so alingbi ti sala sioni na sewa. Asewa mingi abâ so gi mbeni yorö so alondo na mbage ti Nzapa si alingbi ti mû maboko na ala ti tiri nzoni na gbele akpale mingi so asi na ala. Tongana azo ti sewa aye ti bata mbeni nzoni songo na Nzapa, a lingbi kozoni kue ala mû peko ti akpengba-ndia ti Bible na ala hinga so “tongana L’Eternel asala da ni pëpe, kusala ti ala so asala da ni ayeke senge senge.” (Psaume 127:1). Kota ngia ti sewa ayeke ga gi na lege ti ziango Nzapa na kozo ndo na yâ duti ti sewa ni.​—aEphésien 3:14, 15.

Na Hawaii, mbeni koli so iri ti lo ayeke Dennis abâ tongana nyen tënë so ayeke tâ tënë. Atâa so lo tene ni yeke Chrétien, zonga na tiri alï na yâ fini ti lo. Na peko ti so lo sala kua ti turugu, lo kiri lo ga zo ti gingo tënë mingi nga sioni mingi. Na dango bê na ni, lo tene: “Mbi yeke tiri ândö mingi. Mbi gi bê ti mbi lani oko pëpe na ndo ye so alingbi ti si na mbi, na mbito ti kuâ asala lani mbi oko pëpe. Asioni yanga na atiri ni angbâ lani ti gue. Wali ti mbi so ayeke Témoin ti Jéhovah awa lani mbi ti manda Bible.”

Dennis ake ngangu so wali ti lo ayeke sala lani. Ye oko, tambela ti lo ti Chrétien awoko yâ ti sioni bango ndo ti lo. Na nda ni, Dennis na wali ti lo nga na amolenge ti lo ague na mbeni bungbi. Na pekoni, lo to nda ti manda Bible, na lo gue na li ni pendere mingi. Lo zia ti nyon manga so lo yeke nyon ngbele ye ngu 28, na lo zia ti bungbi na akamarade so lo na ala abi tele ti ala na yâ aye so lo yeke tara lani ti hon ndo ni. Na kiringo singila na Jéhovah, Dennis atene: “Sewa ti mbi aga nzoni ahon ti kozo. E yeke gue na abungbi nga na fango tënë na sewa. Amolenge ti mbi asala mbito ti mbi fadeso pëpe, ngbanga ti so mbi manda ti hon ndo ti ngonzo ti mbi na ti zia zonga. E lingbi ti sala tënë ti aye kue nga ti sala apendere lisoro na ndo Bible. Tongana fade mbi manda tâ tënë ti Mbeti ti Nzapa pëpe, ka laso mbi kui awe; mbi yeke sala ândö ngonzo hio mingi.”

Asewa alingbi ti wara tâ ngia tongana ala sala kua ngangu ti sala ye so bê ti Jéhovah aye. Aye so asi kozo na yâ fini ti azo afa so même gi tongana zo oko na yâ ti sewa asala ye alingbi na akpengba-ndia ti Bible, ye ayeke gue nzoni ahon ti so fade tongana zo oko asala ni pëpe. Lekengo mbeni sewa ti Chrétien ayeke kete ye pëpe; a hunda kode nga na ngoi. Me azo kue ti yâ ti asewa tongaso ayeke na beku so fade Jéhovah ayeke hiri deba nzoni na ndo angangu kue so ala sala. Ala lingbi ti tene peko ti atënë ti wasungo psaume so: ‘Ye ti bata mbi alondo na Jéhovah, Lo so asala yayu na sese.’—Psaume 121:2.

[Kete tënë na gbe ni]

[Kete tënë na lembeti 9]

Na lege ti Nzapa, “afami kue so ayeke na yayu na so ayeke na ndo sese awara iri ti ala.”​—AEPHÉSIEN 3:⁠15

[Encadré na lembeti 8]

JÉHOVAH AYEKIA MINGI YE SO LO LEKE TETI SEWA

“Nzapa ahiri tene nzoni na ndo ala; Nzapa atene na ala, I dü amolenge mingi, i wu, i si singo na sese.”​—Genèse 1:28.

“Ngia ayeke na azo kue so akpe mbito ti L’Eternel . . . Fade wali ti mo ayeke tongana vigne so alë mingi na yâ da ti mo.”​—Psaume 128:1, 3.