Mbeni zo ti tâ be-ti-molenge ti Afrika so aye Tënë ti Nzapa
BÊ TI azo so ague na sese ti Afrika tongana gene adö ti bâ so a yeke ngangu pëpe ti to nda ti sala lisoro na ndo Bible na azo ti kodoro ni. Ahundango tënë tongana “Royaume ti Nzapa ayeke nyen?” wala “Mbeni tâ yorö ndali ti akpale tongana nzara, kobela, bira na kengo-ndia ayeke dä?” ayeke gboto azo ti mä tënë. Azo mingi ayeke na ngia ti zi lege na mbeni wande ti fa na ala akiringo tënë ni na yâ ti Bible. Mingi ni, ye so azi lege ti manda Bible lakue na ala. Na tongana ala gue na li ni na lege ti yingo, ala ga aChrétien so akamata batême.
Kozo zo ti Afrika so asala tongaso, a sala tënë ti lo na Kusala 8:26-40. Lo yeke lani zo ti Éthiopie so ague na Jérusalem ti voro tâ Nzapa, Jéhovah.
Tongana ti so foto so na gbe ni afa, koli ti Éthiopie so ayeke kiri na kodoro na ndo puse ti mbarata ti lo, na lo yeke diko mbeni mbeti so angongbi. Mbeni zo so lo hinga lo pëpe aga na tele ti lo na lo hunda lo: “Mo hinga nda ti ye so mo yeke diko?” Na tâ be-ti-molenge lo hinga so lo yeke na bezoin ti wara mungo maboko na lo wa wande so, wafango tënë Philippe, ti ko na yâ puse ti lo. Na pekoni, lo hunda Philippe ti fa na lo nda ti atënë so lo londo fade fade ti diko. Philippe afa na lo so a yeke mbeni prophétie so aga tâ tënë ade ti ninga pëpe na ndo kui ti Messie, Jésus Christ. Philippe afa nga na lo ambeni tënë so andu “Tene-nzoni ti Jésus”, peut-être na ndo londongo ti Jésus na popo ti akuâ.
Na mango apendere tâ tënë so, zo ti Éthiopie so aye ti ga mbeni disciple ti Jésus na lo hunda: “Ye nyen akanga lege na mbi ti wara batême?” Na peko ti batême ti lo, koli ti tâ be-ti-molenge ti Afrika so akiri na kodoro ti lo na ngia, na Bible asala mbeni tënë pëpe na ndo ti lo.
Laso, aTémoin ti Jéhovah ayeke mû maboko na azo kutu mingi na ndo sese ti manda ye na ndo oko “Tene-nzoni” so. Azo ndulu na kutu omene tongaso ayeke manda Bible na da ti ala na ndembe so.