Tondo ti awafango tënë ti Royaume

Gingo azo so alingbi na yâ akete kodoro ti Australie

AHINGA mbeni kota mbage ti yâ ti kodoro ti Australie tongana ayongoro ndo. Na ambeni kodoro ni, aTémoin ti Jéhovah asi dä pëpe ngbele ye ngu 12. Tongaso, aTémoin ti Jéhovah ti Darwin, li-kodoro ti Territoire ti Banga, aleke mbeni kota kapa ti fango tënë ti lango gumbaya ti gi azo so alingbi.​—Matthieu 10:11.

Lekengo aye ni ato nda ni ngu oko kozoni, na salango nga mbeni carte ti kodoro ni so akono ahon sese ti Gabon fani ota. Ti hinga tongana nyen ndo ni akono mingi, bâ so ti londo na kota lege so mbeni gbagba ti batango anyama ayeke dä ti gue na yanga-da, popo ni ayo ahon kilomètre 30! Ahon so kue, popo ti ambeni ndo ti batango anyama ni ayo kilomètre 300 wala ahon so.

A yeke aTémoin ti Jéhovah 145 si amû mbage na kota kapa ti fango tënë ni. Ambeni alondo na ayongoro kodoro tongana Tasmanie. Ambeni aga na akpengba kutukutu so akungba kue na aye ti leke na kutukutu ayeke dä, nga pétrole na essence kue. Ambeni azia aye ti ala na yâ ti ambeni da so akutukutu ti ala agboto ni. Na ndo ni, a loué abus use so oko alingbi ti mû azo 22 ti yô na aita so kutukutu ti ala akpengba pëpe. Aita so ayeke na yâ ti abus afa tënë gi na azo so alango na akete gbata ti territoire ni.

Kozo ti gue na voyage ni, aita so amû li ni aleke adiskur na adémonstration so afa akode ti fango nzo tënë na yâ ti aterritoire ni so ayeke nde na ti so ala yeke fa ka tënë dä. Na tapande, ti fa tënë nzoni na amara ti a-Aborigène (so ti tene atâ zo ti kodoro ni), a hunda mingi ni ti sala ambeni ye nga ti hinga nzoni angobo ti salango ye ti ala. Ala fa nga lege ti sala tënë na ndo bango na nene ni batango anyama ti ngonda.

Aye ti pendere mingi asi na aita lani. Na tapande, na mbeni ndo so a-Aborigène ayeke dä, aita aleke ti mû mbeni kota diskur na ala. Wali ti ndo ni so azo ane lo mingi ague lo mveni ti sala tënë ni na azo ti kodoro ni. Na pekoni, a zia na azo so abungbi abuku 5 na abrochure 41. Na mbeni kete kodoro ni, a wara mbeni koli Aborigène. Lo yeke même na Bible ti lo mveni, me a yeke ngbele ni na a suru mingi. Tongana a hunda lo wala lo hinga iri ti Nzapa, lo yeda, na pekoni lo sigigi na mbeni ngbele Tour ti Ba Ndo na yâ ti bozo ti nduzu-bongo ti lo. Lo diko ândö mbeti ni, so afa Marc 12:30, so atene: “A lingbi mo ndoye [Jéhovah, NW ] Nzapa ti mo na bê ti mo kue.” Lo tene: “Mbi ye tâ versê so mingi.” Na peko ti mbeni yongoro lisoro, lo mû mbeni fini Bible na ambeni mbeti nga.

Ndulu na yanga ti ngu ti Carpentarie, mbeni mokonzi ti mbeni kota ndo ti batango anyama afa so tokua ti Royaume ni anzere na lo. Na ngoi so a fa lani na lo abuku Mbeti ti atene ti Bible nga na Hingango Ye So Ague na Fini ti Lakue Lakue,a lo hunda wala mbeni na popo ni ayeke na yanga ti Kriol. A yeke lani mbeni ye so adö bê ngbanga ti so atâa so mingi ti a-Aborigène atene Kriol, gi kete wungo ti ala si adiko ni. Na pekoni, aita amä so ala 50 kue so ayeke sala kua na ndo ni so ahinga ti diko Kriol. Mokonzi ni ayeke lani na ngia mingi ti wara ambeti ti manda na Bible na yanga ti Kriol, nga lo mû numéro ti téléphone ti lo ti tene a hiri na lo.

Na yâ alango gumbaya ti kota fango tënë so, a zia na azo lani kue aBible 120, abuku 770, apériodique 705 na abrochure 1 965. Na ndo ni, a sala avizite 720 na a to nda ti manda Bible na azo 215.

Biani, a kaï nzara ti yingo ti azo mingi so alingbi, so akangbi tele ti ala na yâ ti kota kodoro so.​—Matthieu 5:6.

[Kete tënë na gbe ni]

[Carte na lembeti 30]

(Ti bâ ni mbilimbili, bâ mbeti ni.)

AUSTRALIE

TÉRRITOIRE TI BANGA

Darwin

Ngu ti Carpentarie

Sydney

TASMANIE