A yeke pëpe gi mbeni senge salango ngia
AKETE molenge aye mingi ti sala ngia. Me, buku Maïngo ti kete molenge (Angl.) atene so “ngia ni ayeke gi pëpe mbeni ye ti akete molenge wala mbeni senge senge ye. Ngia ayeke biani kota ye so ayeke na gunda ti maïngo ti akete molenge.” Na lege ti salango ngia, akete molenge alingbi ti sala kusala na mongoli ti ala ti gbu nda ti aye so angoro ala, wala ti sala kusala maboko na maboko na amba ti ala.
Akete molenge so ato nda ni na ngu osio wala ngu oku ayeke tara ti sala ye tongana akota zo na ngoi ti angia ti ala. Mbeni lâ, Jésus asala tënë ti akete molenge so ayeke sala ngia. Ambeni kete molenge aye ti sala ngia ti “mariage”, ambeni mba ti ala aye ti ala ti sala ngia ti “lungo kuâ”, na tongana ti so amolenge ayeke sala ni lege mingi, ala yeke papa na popo ti ala ngbanga ti so ambeni aye pëpe ti lï na yâ ti ngia ni (Matthieu 11:16, 17). Mara ti asalango ngia tongaso ayeke mbeni nzoni lege ti zia na yâ mongoli ti amolenge so angbâ ti kono nene ti kua so akota zo ayeke sala, na ye so ala lingbi ti girisa ni lâ oko pëpe.
Akete molenge so mo yeke bâ ala na yâ ti foto so angbâ ti sala ngia ti mandango Bible na mbeni zo. A yeke tâ mandango Bible pëpe, me ye so ayeke na yâ bê ti ala ayeke so ala yeke na tâ nzara ti fa tënë ti Nzapa na ambeni zo. Na ye so ayeke mbeni kpengba ye ti manda ngbanga ti so Jésus ahunda lani na azo so amû peko ti lo ti gue ti sala adisciple na ti fa na ala ti sala ye kue so lo komande na ala.—Matthieu 28:19, 20.
Ababâ na mama so amolenge ti ala aye ti sala angia tongana ti mandango Bible, ti mungo adiskur wala ti fango tënë da na da alingbi biani ti duti na ngia. Ti tâ tënë ni, amolenge ayeke haka peko ti ye so ala yeke bâ na tele ti akota zo so ayeke ndulu na ala. Angia ti yâ ti Bible so ala yeke sala afa na gigi so a “fa lege na ala na wango ti Seigneur.”—aEphésien 6:4.
Jéhovah ayeda ti tene akete molenge amû mbage ti ala na yâ tâ vorongo. Lo tene lani na Moïse ti bungbi “amolenge” ti mä tënë ti ndia so a yeke diko ni (Deutéronome 31:12). Tongana akete molenge abi tele ti ala na vorongo Jéhovah, ala yeke fa ni na gigi na lege ti angia so ala yeke sala ni. Mbeni kete molenge so ayeke sala ngia so na yâ ni lo bâ tele ti lo tongana mbeni wafango tënë ti Nzapa ato nda ti mû awe kozo kapa ti gango mbeni wafango tënë.