Lo fa tënë ti mabe ti lo na akamarade ti lo ti klase

MO YE ti mû maboko na akamarade ti mo ti klase ti hinga mbilimbili tënë na ndo ti atënë ti mabe ti mo? Magdalena, so ayeke na ngu 18 na so ayeke élève ti lycée na kodoro ti Pologne, ayeke fa lakue atënë ti mabe ti lo tongana Témoin ti Jéhovah na akamarade ti lo ti klase. Tongaso, ala yeke hunda lakue na lo mara ti ahundango tënë so: Ti duti Témoin ti Jéhovah aye ti tene nyen? Mo mä na bê na Jésus Christ? Na lege wa lo lingbi ti mû maboko na akamarade ti lo ti klase? Magdalena asambela Jéhovah ti fa lege na lo, na lo sala ye alingbi na asambela ti lo.​—Jacques 1:5.

Mbeni lâ, Magdalena ahunda mbeni wafango ye na lo so ayekia tënë ti mabe ti lo ti mû lege na lo ti tene lo fa kasete vidéo Les Témoins de Jéhovah: un nom, une organisation.a Wafango ye ni ayeda. Magdalena asala tënë ni na akamarade ti lo ti klase, lo tene: “Mbeni kamarade ti mbi ayeke leke tele ti lo ti fa na gbele klase ni kue mbeni kapa ti fango tënë ti Nzapa so amû penze ngbonga 90, so na ngoi ni a yeke fa mbeni kasete vidéo nga a yeke zia lege na mbeni salango lisoro na ndo aTémoin ti Jéhovah. I ye ti ga ti bâ ni?” Akamarade ti lo kue ayeda. Magdalena asoro Wojciech, mbeni kpengba wafango tënë ti ngoi kue, na ala to nda ti leke kapa ni so.

Na lege ti kapa so ala leke, ye ni ayeke to nda ni na mbeni diskur ti penze ngbonga 20 so a gboto tënë ni na yâ brochure A-Témoin ti Jéhovah: Ala Yeke Azo Wa? Ala Mä na Bê na Nyen?* Na pekoni, ala yeke sala mbeni lisoro na azo so aga na lege ti hundango tënë na kiringo tënë. Na ti hunzi na ni, ala yeke fa kasete vidéo ni na yâ ti da ti batango ambeti ti ekole ni. Ala leke ti mû na wamandango mbeti oko oko mbeni enveloppe so a zia na yâ ni ambeni brochure, buku Les jeunes s’interrogent ​— Réponses pratiques,* ambeni tract nga na apériodique.

Na popo ti azo so aga na ngoi ti fango ye ni so, mo yeke wara akamarade ti lo ti klase 14, wafango ye na lo nga na ambeni wamandango mbeti 4 so angbâ ti duti na yâ ti da ti batango ambeti ti ekole ni. Kozoni, Wojciech afa na azo so aga mbeni wungo ti awasungo mbeti nga na awasungo suma-tene ti Pologne so asala kusala na iri ti Jéhovah na yâ abuku so ala sû ni. Lo fa nga ambeni ngbele buku ti catéchisme ti aCatholique so na yâ ni mo yeke wara iri ti Nzapa dä. Na salango tënë na ndo ti kusala so aTémoin ti Jéhovah ayeke sala ni laso, Wojciech afa abrochure so asala tënë na ndo ti afiliale ti aTémoin ti Jéhovah nga lo fa afoto ti aDa ti Assemblée.

Mbeni pendere lisoro aga na pekoni. Magdalena na Wojciech asala kusala na Bible ti kiri tënë na ahundango tënë ni. Lisoro ni so apika bê ti azo so aga na ala hinga biani na bê ti ala so aTémoin ti Jéhovah ayeke fa pëpe gi atënë so alondo na ala mveni. Ambeni tënë so a-élève ni ahunda na ala ayeke so wa? Na tongana nyen ala kiri tënë na ni?

Hundango tënë: Na yâ ti Bible a yeke wara atënë so zo alingbi ti gbu nda ni pëpe, na ye so asala si azo alingbi ti fa nda ni na alege nde nde. Tongaso, tongana nyen zo alingbi ti sala ye legeoko na ye so Bible afa?

Kiringo tënë ni: Ambeni atene so zo alingbi ti sala kusala na Bible ti fa na tënë so bê ti lo aye. Me, tongana mo ye ti hinga nda ti ambeni tënë so mbeni wasungo buku afa ni na yâ buku ti lo, a yeke duti nzoni mingi ti tene mo hunda gi lo mveni pëpe? Nde na azo ti sese so ayeke sû abuku na so akui awe, Mveni ti Bible, Jéhovah Nzapa, ayeke na fini (aRomain 1:20; 1 aCorinthien 8:5, 6). A yeke atënë so angoro tele ti mbeni versê ti Bible si ayeke mû lege na zo ti fa nda ti versê ni tâ na lege ni. Nga, mingi ni, Bible ayeke sala kusala na oko tënë na yâ ti ambeni versê nde nde. Ni la, hakango aversê ni na popo ti ala alingbi ti mû maboko na zo ti gbu nda ni. Na salango tongaso, e yeke zia Nzapa si afa lege na bibe ti e, na ye ni ayeke duti tongana ti so a yeke Nzapa mveni si ayeke fa nda ni na e. Ti sala tongaso alingbi ti mû maboko na e ti hinga ye so bê ti lo aye na ti sala ye alingbi na ni tongana ti so a fa ni na e na yâ Bible; ni la pëpe?

Hundango tënë: Kangbi wa ayeke na popo ti aChrétien nga na aTémoin ti Jéhovah?

Kiringo tënë ni: E yeke aChrétien! Me ahon ti tene gi na yanga so ala yeke aChrétien, aTémoin ti Jéhovah ayeke sala ngangu ti sala ye alingbi na tënë ti mabe ti ala nga na ye so Nzapa afa ngbanga ti nzoni ti ala (Esaïe 48:17, 18). Teti so gonda ti aye so ala yeke fa alondo na yâ Bible, ala hinga so ala yeke na yâ ti tâ tënë.​—Matthieu 7:13, 14, 21-23.

Hundango tënë: Ngbanga ti nyen i ye ti ga lakue ndulu na tele ti ambeni zo nde na salango kue ti sala lisoro na ala? A yeke pëpe mbeni lege ti gbu ambeni zo na ngangu ti mä na bê?

Kiringo tënë ni: Tongana mo yeke tambela na lege na mbeni zo aga ndulu na mo, na yekiango ndo lo hunda mo ti hinga tënë ti bê ti mo na ndo ti mbeni ye so asi, salango tongaso ayeke sioni? (Jérémie 5:1; Sophonie 2:2, 3). (Na pekoni, Wojciech na Magdalena asala mbeni démonstration ti fa tongana nyen ala hunda lani ambeni zo so ayeke tambela na lege ti hinga tënë ti bê ti ala wala Nzapa abi bê ti lo na ndo ti azo so ahu pono ngbanga ti ngu so asuku ade ti ninga pëpe na so amû ndo kue na Pologne.) Na peko ti so e mä tënë ti bê ti azo ni awe, e gue na yâ ti Bible. Tongana mbeni zo aye pëpe ti sala lisoro na e, e yeke bala lo na e hon ti e (Matthieu 10:11-14). So ayeke gbungo zo na ngangu ti sala lisoro na lo la? Wala a lingbi azo asala lisoro mbeni pëpe?

Hundango tënë: Ngbanga ti nyen i ye ti sala amatanga pëpe?

Kiringo tënë ni: E yeke sala gi oko matanga so Bible ahunda na e ti sala ni: Mémorial ti kui ti Jésus Christ (1 aCorinthien 11:23-26). Ti tënë ti salango amatanga, i lingbi ti gi ti hinga tënë na ndo nda ti amatanga oko oko na gingo yâ ti akota bakari wala ambeni lingu so a lingbi ti zia bê dä. Tongana i sala ye so, fade i yeke hinga ngbanga ti nyen e yeke sala amatanga pëpe.​—2 aCorinthien 6:14-18.

Ala hunda gbâ ti atënë nga ala wara akiringo tënë ni. Teti lisoro ni amû ngoi mingi, lege ayeke pëpe ti fa kasete vidéo ni, na tongaso a leke ti kiri ti fa ni na mbeni lango nde.

A-élève ni asala ye tongana nyen na pekoni? Zia Magdalena afa pekoni na e: “Bê ti mbi adö ti bâ so ambeni élève so ayeke sala ka angia ti buba na so ayeke he amba ti ala ahunda atënë so nda ni alï mingi. Atâa so ala tënë so ala mä na bê so Nzapa ayeke pëpe, na ngoi ti salango lisoro ni ala fa na gigi mabe na Nzapa!” Ala so aga awara na ngia abuku 35, abrochure 63 nga na apériodique 34 so e mû na ala.

So tâ pendere ye si aga na peko ti fango tënë na ekole! A mû gi pëpe maboko na akamarade ti klase ti Magdalena ti hinga aTémoin ti Jéhovah na ti gbu nda ti ye so ala yeke sala, me nga a mû wâ na mingi ti amaseka ni ti gbu li na ndo ti gigi ti ala. Ngbanga ti nyen mo sala ngangu pëpe ti mû maboko na akamarade ti mo ti klase ti hinga ye na ndo mabe ti mo?

[Kete tënë na gbe ni]

[Foto na lembeti 31]

Magdalena na Wojciech ayeke leke tele ti ala ngbanga ti lisoro ni