Ngbanga ti nyen aTémoin ti Jéhovah angbâ lakue ti ga ti bâ mo?
NA NDO lê sese kue, a hinga nzoni mingi aTémoin ti Jéhovah teti so ala ngbâ lakue ti fa tënë da na da. Ambeni zo ahunda tele ti ala ngbanga ti nyen aTémoin angbâ lakue ti ga ti bâ ala, mbilimbili tongana kozoni ala sala nzara ti tënë ni mingi pëpe. Ambeti use so alondo na kodoro ti Russie alingbi ti mû maboko ti fa nda ti tënë so.
Masha, mbeni molenge-wali ti ngu 19 so ayeke na kodoro ti Khabarovsk, atene: “Ti tâ tënë ni, giriri mbi yeke sala kue ti kpe aTémoin ti Jéhovah.” Me na peko ti so lo diko ambeni mbeti so aTémoin asala ni, lo gbian bibe ti lo. Masha asû na mbeti: “Ambeti so anzere mingi na ayeke fa ye mingi na zo. Me mingi ahon so, a yeke mû lege na zo ti bâ sese so tâ na mbeni lege nde. Yeke yeke mbi to nda ti hinga ngbanga ti nyen azo ayeke na fini.”
Svetlana, so ayeke na gbata ti Ussuriysk ndulu na kilomètre 80 na banga ti Vladivostok, asû na mbeti: “A ninga pëpe, mbi to nda ti diko Tour ti Ba Ndo na Réveillez-vous! Ambeti so ayeke tâ kota ye na ngoi ti e so. Mbi ye a-article kue so ayeke na yâ ni. Ala yeke pendere mingi, ala yeke mû sango na zo na ayeke fa ye na zo. Singila! Singila mingi teti so i yeke na ndo ti sese so, na i yeke sala mara ti pendere kua tongaso, so ayeke kota ye mingi.”
A-Témoin ti Jéhovah na ndo lê sese kue ayeke mû na nene ni wango ti bazengele Paul so apusu zo ti gbu li: “Tongana zo ti fa tënë ayeke pëpe, [azo alingbi] mä iri ti Lo tongana nyen?” (aRomain 10:14). Ngbanga ti nyen mo mû pëpe mbeni kete ngoi ti mä aTémoin tongana ala ga ti bâ mo ti peko? Mo nga mo lingbi ti wara ngia na yâ tënë ti dengo bê so ayeke na yâ Tënë ti Nzapa, Bible.