Ala bungbi na ‘kodoro so aduti kâ gi lo oko’

“Te Pito o Te Henua.” Mo mä tënë so mbeni lâ awe? Na Rapa Nui, ngbele yanga ti kodoro so a tene na Zoa ti Pâques, tënë so aye ti tene ‘kodoro so aduti kâ gi lo oko.’ Teti nyen mbeni assemblée so a sala kâ aduti nde mingi?

LO YO na tanga ti akodoro kue, lo pika bê na lo yeke nde. A yeke tongaso si a yeke sala tënë ti Zoa ti Pâques, wala Rapa Nui tongana ti so azo ti zoa ni ayeke hiri na ni. A yeke biani mbeni zoa so aduti kâ gi lo oko na yâ Kota ngu-ingo ti Pacifique. Lo yo na Santiago, mbeni gbata ti Chili, kilomètre 3 790. Lo ga kete kodoro ti Chili na 9 septembre 1888.

Zoa so ayeke biani bungbi ti akota hoto ota so ayeke sungba mbeni pëpe, nga a kono mingi pëpe. Biani, tongana mingi ti azoa ti Pacifique, a yeke gi li ti angbongboro hoto ti gbe ti ngu. Zoa so aga ndo so ngorogbia aye ti bata ni si abuba pëpe. Biani, a hinga zoa so nzoni mingi ndali ti akota statue ti tênë ti lo so zo ahinga nda ni nzoni pëpe. A hiri astatue so moai.a

Nde na pendere ti ndo ni nga na ye so zo alingbi ti manda dä, Zoa ti Pâques ayeke na gbâ ti apendere kobe. A yeke wara kâ a-ananas, a-avocat, apapaye nga na mara ti afondo gumbaya. Nga a yeke wara gbâ ti amara ti asusu nde nde nga na ambeni ye nde ti tengo ni na yâ kota ngu-ingo ni.

Ndowa nga dê ayeke sala na Zoa ti Pâques kâ mingi pëpe. Ngu-nzapa ayeke pika lakue nga kongo ayeke sigigi mingi na lê ti nduzu. Ye so amû lege na azo so ayeke gue kâ ti hu nzoni pupu na ti bâ apendere ndo. Laso, wungo ti azo ni asi 3 800 tongaso. Azo ti zoa ni ayeke amolenge ti akozo zo so asi kâ, a bungbi na amunzu, azo ti Chili nga na ti ambeni mara nde. Azo ngbangbo mingi ayeke londo na Poto nga na Asie ti gue ti bâ zoa so. Ye so aga na nginza mingi na kodoro ni.

Lungo akozo lengo ti Royaume

Annuaire des Témoins de Jéhovah 1982 atene: “Teti mbeni ngoi, e yeke gi na wafango tënë oko na yâ Zoa ti Pâques ni kue. Mbeni missionnaire ti wali so ayeke na filiale ni [ti Chili] si ayeke mû lani maboko na lo na lege ti yingo na sungo ambeti na lo. Atâa so wafango tënë ni akiri na kodoro ti Chili awe, ambeni zo ti zoa ni angbâ lakue ti hunda abonema na Tour ti Ba Ndo. Mbeni ye so e ku ni pëpe ayeke so, na avril ti ngu 1980, mbeni zo so asala nzara ti Bible apika singa yongoro na e, lo ye ti hinga lawa si a yeke sala Mémorial. Na pekoni na yâ oko ngu ni so, mbeni koli na wali ti lo alondo na Valparaiso na Chili ague kâ, na ala yeke manda Bible na azo so asala nzara ni. Na avril ti ngu 1981, a sala mbeni bungbi ti Mémorial na zoa so, na azo 13 ague dä. A yeke kozo Mémorial so a sala kâ. So tâ ngia si e yeke na ni so ‘nzo tënë’ alï na ndo so ayo na tanga ti ando kue!”

Na pekoni, na 30 janvier 1991, filiale atokua mbeni koli na wali ti lo na zoa ni kâ. Ala yeke apionnier spécial na iri ti ala ayeke Dario na Winny Fernandez. Ita-koli Fernandez atene: “E sala ngbonga oku na lapara ti si na ndo so ayo na tanga ti ando kue, na so asi singo na angobo ti salango ye so a hinga nda ni nzoni pëpe.” Hio, ala na mbeni ita-koli ti zoa ni nga na mbeni ita-wali so ayeke na amolenge use, so asi kâ ade ti ninga pëpe, aleke ti sala bungbi nga ti fa tënë. Atâa akpale so asewa aga na ni, wâ so azo ayeke na ni ndali ti vorongo, nga dutingo ti azo ni so ague oko mingi na ti azo ti Polynésie, ala bâ deba nzoni ti Jéhovah na ndo ngangu so ala sala. Ita-koli na Ita-wali Fernandez ayeke apionnier spécial mbeni pëpe, me ala ngbâ na zoa ni ti bata molenge ti ala so ala dü lo kâ. Laso, a yeke wara na ndo so aita 32 so ayeke fa tënë ti Royaume na wâ. Na popo ti ala ayeke azo so a dü ala dungo na Rapa Nui, nga ala so ague asala kodoro kâ wala so ague kâ ngbanga ti so a hunda ti wara awafango tënë ti Royaume mingi na zoa ni.

Lekengo tele teti Kota Bungbi ti Circonscription

Ândö, ndali ti yongoro lege so akangbi zoa ni na Amerika ti Mbongo, fani ota na yâ ti ngu oko, kongregation ni ayeke wara akasete vidéo so programme ti Kota Bungbi ti Lango Oko, ti Circonscription na ti District ayeke na yâ ni. Me na hunzingo ti ngu 2000, Komite ti filiale ti Chili abâ tënë ti salango mbeni assemblée na zoa ni. Ade a sala mara ti assemblée tongaso kâ lâ oko pëpe. Na nda ni, a bâ so a yeke nzoni a sala mbeni Kota Bungbi ti Circonscription na nze ti novembre 2001. Ni la a yeke tisa kete wungo ti ambeni ita-koli na ita-wali ti mbage nde nde ti kodoro ti Chili ti gue na assemblée ni. Ndali ti kapa ti hurungo ti lapara ni, a yeke sala assemblée ni na dimanche nga na lundi.

Tele ti aita 33 so a tisa ala so anzere mingi ti gue ti sala kozo Kota Bungbi ti Circonscription na zoa ni kâ. Na peko ti yongoro voyage na ndo Kota ngu-ingo ti Pacifique, bê ti ala adë tongana aita ti zoa ni ayamba ala na aéroport! Aita ti zoa ni ayü na go ti agene ti ala apendere ye ti go so a sala na fleur. A yeke mbeni ye so a yeke mû lakue na agene. Na pekoni, a gue na ala na ndo ti lango ti ala. Nga na peko ti so ala gue abâ zoa ni kete, aita kue so ayeke na mbeni ye ti salango ni na assemblée awara tele na Da ti Royaume.

Mungo maboko so a ku ni fade pëpe

Na ngoi so ala yeke gue na assemblée ni, bê ti ambeni ita so aga gango adö ti mä na radio so mbeni prêtre asala tënë ti ala. Lo sala tënë ti ambeni zo so alondo na Amerika ti Mbongo si aga, na ala yeke gue ande na da ti azo ti sala tënë ti hunzingo ti sese so. Atâa so lo tene na azo ti paroisse ti lo ti mä azo so pëpe, tënë ti lo ni amû maboko ti fa so gbâ ti aTémoin ti Jéhovah aga na zoa ni. Ye so asala si azo ti zoa ni ayeke ku kungo ti bâ ala. Na alango so aga na pekoni, aita ni afa na ala na ndara nzo tënë so akpengba zo.

Tongo nda ti assemblée ni

Na dimanche na ndapelele, aita ti zoa ni ayeke luti na yanga ti Da ti Royaume ni ti yamba aita ti Amerika ti Mbongo na ndembe so ala yeke ga ndali ti kozo lango ti kota bungbi ni. “Iorana Koe! Iorana Koe!” “Gango nzoni!” Ambeni ita-wali ti zoa ni ayü bongo ti kodoro na ala leke kuali ti ala na apendere fleur tongana ti so azo ayeke sala kâ.

Na peko ti so a pika mozoko ti tongo nda ni, azo ngbangbo oko abungbi go ti ala ti he bia “Gbu ngangu, yengi pepee!” Ade a he bia so tongaso kozoni lâ oko pëpe na zoa ni. Aita ti zoa ni atoto na ngule tongana président ni atene nzoni gango na azo na yanga ti kodoro ti ala, Rapa Nui. Na ngoi ti hungo tele ti midi, afini Témoin ota afa mungo tele ti ala na Nzapa na lege ti batême ti ngu. Tongana programme ti kozo lango ni ahunzi, azo kue abâ so ala yeke ndulu na Jéhovah nga na aita ti ala kue mingi ahon ti kozo.​—1 Pierre 5:9.

Fango tënë na ndapelele

Ndali ti dutingo nde ti assemblée ni na zoa ni kâ, programme ti Kota Bungbi ti Circonscription ti use lango ni ato nda ni na peko ti midi. Tongaso, aita so aga gango amû ndapelele ni ti fa tënë. Nyen la ayeke ku ala?

Mbeni mbakoro-wali so ayeke na amolenge miombe atene na aTémoin so lo lingbi ti sala tënë na ala pëpe ngbanga ti so lo yeke Catholique. Tongana ala tene na lo awe so ala ye ti sala tënë na ndo akpale so azo kue ayeke wara, akpale tongana nyongo mbangi ahon ndo ni nga na kpale ti sewa, lo yeda ti mä ala.

Mbeni mbakoro-wali ayamba mbeni koli Témoin na wali ti lo nzoni pëpe. Lo tene na ala ti gue ti fa tënë na azo ti Amerika ti Mbongo so asala ye ti sioni mingi na amba ti ala. A-Témoin ni atene na lo so ayeke fa ‘nzo tënë ti royaume’ na azo kue, na ala ga na zoa so ti sala mbeni kota bungbi so ayeke mû maboko na azo kue ti kono ndoye ti ala teti Nzapa (Matthieu 24:14). Ala hunda lo wala lo ye ti duti na fini a ninga na yâ ando so ye kue ayeke duti nzoni, tongana ti so ayeke na zoa so, me so kobela na kui ayeke pëpe. Ala fa nga na lo so ahoto so ala yeke na ndo ni so asungba asala ngu mingi awe. Tongaso, lo gbu li ti lo na ndo alango ti fini ti azo so ayeke kete na lo hunda: “Ngbanga ti nyen e yeke duti na fini a ninga pëpe?” Bê ti lo adö ti mä tënë so Psaume 90:10 atene.

Tâ gi na ndembe ni so, aTémoin ni amä azo na tele ti da ti wali ni adë kongo. Atâa so ala mä yâ ti tënë ti azo ni pëpe, wali ni atene na ala so ala yeke zonga ndo, na ala yeke tene polele so ala ye pëpe ti tene aTémoin aga na da ti ala. Ye oko, wali so ayeke nua, wala kozo molenge-wali ti sewa ni. Teti so babâ ti lo akui awe, a yeke na lo ti fa ye so ayeke nzoni ndali ti sewa ni. Na gbele afami ti lo, lo mû mbage ti aita ni na yanga ti kodoro ti lo, nga lo yeda na nzobe ti mû ambeti so aita ni afa na lo. Na pekoni, gi na yâ oko yenga ni, tongana ala yeke hon na tele ti aTémoin na yâ ti kutukutu, lo tene na ita ti lo ti koli ti luti. Atâa so a yeke polele so ye ni anzere na bê ti ita ti lo pëpe, lo bala aita ni na lo tene na ala ti wara nzoni na yâ kusala ti ala.

Atâa so na tongo nda ni a bâ a tene ambeni zo ti zoa ni ayeke ke tënë so aTémoin so aga gango ayeke fa, aita ni aga ti bâ so, ti tâ tënë ni, azo ti Rapa Nui ayeke anzoni zo. Mingi ti ala ayeda na ngia ti mä nzo tënë ni. Biani, na popo ti aTémoin 20 so awara batême kâ, 6 ayeke ti zoa ni. Bâ tongana nyen mbeni oko ti ala ahinga tâ tënë: Lo ngbâ lani na yâ ti mbeni chambre nde na lo mä étude so a yeke sala na wali ti lo. Fadeso, lo na wali ti lo ayeke aTémoin so awara batême, na lo yeke serviteur ti mungo maboko na yâ kongregation ni.

Assemblée ni angbâ ti tambela

Na peko ti midi, programme ti use lango ni ato nda ni. Ambeni zo so asala nzara ti tënë ni akiri abungbi oko na aita ti zoa ni so wungo ti ala ayeke 32 nga na aita 33 so aga gango. Azo ndulu na ngbangbo oko amä programme ni nga na kota diskur “Lege so ndoye na mabe ahon sese so na ngangu.” Biani, azo so aga na assemblée ni abâ tâ na lê ti ala ndoye so ayeke na popo ti azo ti Jéhovah, na même na popo ti azo so ayeke na angobo ti salango ye nde nde.​—Jean 13:35.

Na ngoi ti Kota Bungbi ti Circonscription ni, surveillant ti circonscription na ti district asala mbeni bungbi na apionnier. Apionnier permanent ota ti zoa ni nga na aita so aga gango, so ayeke apionnier permanent wala spécial, si aga na bungbi so. Ala kue awara ngangu na lege ti bungbi so.

Na ndade ni, ambeni ita ti zoa ni, so asala kua tongana azo so ayeke fa lege na azo so aga ti bâ zoa ni, amû aita ni so aga gango ague na ala ti bâ zoa ni. Ala gue abâ mbeni ndo ti atênë so a leke moai dä. Ala bâ nga ahoto so giriri a yeke sala mandako dä, nga pendere mbutu ti Anakena na yanga ti ngu, ndo so akozo zo so asi na ndo zoa ni adö sese dä.b

Ndangba ngoi ti bungbi na aita ti zoa ni ayeke na Bungbi ti Mandango Buku. Tongana bungbi ni ahunzi, aita ti zoa ni aleke mbeni pendere kobe ti kodoro na agene ti ala. Na pekoni, na abongo ti kodoro ti ala, ala sala dodo ti kodoro. Aita so aga gango, nga na aita ti Rapa Nui abâ so angangu so a sala ti leke na assemblée ni aduti senge senge pëpe.

Aita kue so alondo na Amerika ti Mbongo abâ so songo ti ala na aita ti ala ti zoa ni, so ala duti na popo ti ala teti pendere yenga oko, akpengba. A yeke lani ngangu na ala ti zia zoa ni. Ala yeke yekia lakue afini kamarade ti ala nga na maboko so ala wara na lege ti yingo. Na aéroport kâ, aita ti zoa ni ayü na go ti aita so aga gango ambeni kota ye ti go so a sala na ambeni ye so akpa zeke ti yanga ti ngu.

Na ndembe so aita ni ayeke hon, ala mû zendo so: “Iorana! Iau he hoki mai e Rapa Nui ee,” so ti tene: “Mbi gue awe! Mbi yeke kiri ti bâ mo, Rapa Nui.” Tâ tënë, ala yeke ku na bê kue ti kiri ti bâ afini kamarade ti ala nga na asewa ti yingo, na ndo nzoni Zoa ti Pâques so ayeke nde, so apika bê na so ayo na tanga ti akodoro kue!

[Akete tënë na gbe ni]

[Tënë na lembeti 24]

Fango tënë na Zoa ti Pâques

Ngu use tongaso kozoni si a sala kota assemblée so, mbeni surveillant ti circonscription na wali ti lo ague na zoa so na ala wara gbâ ti anzoni ye dä. Na tapande, bê ti ala adö tongana ita-wali so ague na ala na ndo ti lango ti ala adabe ti ala so ala manda lani Bible na lo na Mbongo ti Chili, a sala ngu 16 awe, tongana lo de lani maseka. Na pekoni, lengo so alë na Rapa Nui.

Ala wara nga mbeni ye ti ngia so: Mveni ti mbeni ndo ti kango ye ayeda ti wara Les Saintes Écritures ​— Traduction du monde nouveau nga na buku Hingango Ye So Ague na Fini ti Lakue Lakue (so aTémoin ti Jéhovah asala ni). Tongana ala kiri ti bâ lo, lo tene na ala so lo lingbi ti diko Bible so pëpe. Ala zia lani na tïtî lo mbeni Bible na Français, me na Espagnole pëpe! A leke tënë ni hio. Na lege ti Bible na yanga ti kodoro ti lo mveni, nga na maboko so aTémoin ti zoa ni amû na lo, lo bâ so, ti tâ tënë ni, a yeke ngangu pëpe ti gbu nda ti Bible.

[Carte na lembeti 22]

(Ti bâ ni mbilimbili, bâ buku ni.)

ZOA TI PÂQUES

CHILI

[Afoto na lembeti 23]

Use ti azo so awara batême na assemblée ti circonscription

[Afoto na lembeti 25]

Tele ti hoto ti Rano Raraku nga na foto ti guayaba, lê ti keke ti ngonda so apusu na ndo zoa ni