“Oko ti akota kua ti lekengo ye”

TONGANA a leke temple ti Jéhovah na Jérusalem na ngoi ti komandema ti Gbia Salomon so a sala fadeso ngu 3 000 awe, a leke mbeni pendere ye na gengere ti zia ngu dä na a zia ni na gigi na yanga ti temple ni. A ne tonne 30, nga a lingbi ti mû litre 40 000 tongaso ti ngu. A hiri kota ye ti batango na ngu so kota sembe ti gengere (1 aGbia 7:23-26). Albert Zuidhof, ngbele kota zo na Ndokua ti gingo nda ti ye ti Canada, atene na yâ mbeni buku (Biblical Archeologist): “Biani a yeke lani oko ti akota kua ti lekengo ye so a sala na yâ mara ti aHébreu.”

A leke lani kota sembe so tongana nyen? Bible atene: “Gbia asala [aye ti kusala ti gengere] na kpangbala sese ti Jourdain, na sese ti ndô.” (1 aGbia 7:45, 46). Zuidhof atene: “Kode ti lekengo ye ni ayeke gi tongana ti so azo ayeke sala lakue na kusala ti leke akota cloche ti gengere.” Lo fa nda ni lo tene so mingi ni, a yeke leke amoule use ti kota sembe ni, oko ti yâ ni na oko ti gigi ni. Azo ti lekengo ni atuku na popo ti amoule ni gengere so a sala si a ga ngu. Ndangba kua ni ayeke ti kungbi amoule use so.

Konongo nga na nengo ti kota sembe ti gengere ni ahunda biani mbeni kpengba kode ti lekengo ni. A lingbi yâ ti moule ni nga na tele ni aluti na gbe ti ngangu ti gengere so a sala si aga ngu, so ane ndulu na tonne 30. Nga, ti tene yâ ni a suru pëpe, a lingbi kua ti tukungo gengere ni aluti kete pëpe. Ye so ahunda peut-être gbâ ti afour so atingbi tele ti tene a tuku ngu ti gengere ni na yâ moule ni. So tâ ngangu kua!

Na yâ sambela ti lo na matanga ti zingo yanga ti temple ni, Gbia Salomon amû gonda ti kusala ti temple ni kue na Jéhovah Nzapa, na tenengo: “Mo sala tënë na yanga ti Mo, na Mo sala na tïtî Mo si tënë so aga tâ tënë.”​—1 aGbia 8:24.