‘Nzapa aduti pëpe na yâ atemple so maboko ti zo asala’
KITE ayeke pëpe so Paul ahinga lani atemple ti Athéna so nzoni teti so a lingbi ti wara ni na yâ mingi ti agbata so lo yeke bâ ni na ngoi ti atambela ti lo ti missionnaire. Na lege ti mbeni kota bakari (The Encyclopædia Britannica), a hinga lani Athéna gi pëpe tongana nzapa-wali ti bira na ti ndara, me a hinga lo nga tongana nzapa-wali “ti akusala ti kode nde nde na ngoi ti siriri.”
Temple ti Athéna so iri ni awu mingi ahon atanga ni kue ayeke lani ti Parthénon so a leke ni na Athènes, gbata so azia iri ti nzapa-wali ni na ndo ni. A bâ Parthénon tongana mbeni oko ti akota temple na sese ti giriri, na a yeke wara na yâ temple ni mbeni image ti Athéna so a sala ni na lor nga na pembe ti doli na so ayo mètre 12. Tongana Paul ague na Athènes, temple so a sala ni na pendere vulu tênë ayo na nduzu mingi na ndo gbata ni kue, a sala ngu 500 awe.
Na bingo bê na ndo Parthénon, Paul afa tënë na mbeni bungbi ti azo ti Athènes na ndo ‘Nzapa so aduti pëpe na yâ atemple so maboko ti zo asala’. (Kusala 17:23, 24). Peut-être a yeke pendere ti atemple ti Athéna wala kota ti ayanda ti lo si adö bê ti ambeni zo so aga ti mä Paul, pëpe mbeni Nzapa so ala hinga lo pëpe na so lê ti zo abâ lo pëpe. Ye oko, tongana ti so Paul afa, a lingbi zo abi bê ti lo pëpe ti tene so Wasalango zo “ayeke tongana lor, wala argent, wala tênë so a dê tele ni na kode na lege ti [ndara] ti azo.”—Kusala 17:29.
Anzapa na anzapa-wali tongana Athéna, so a hunda lani ti duti na atemple nga na a-image si ala wara gloire, asigigi na agirisa biaku. Image ti Athéna agirisa na yâ Parthénon na siècle oku, na a lingbi ti bâ gi ambeni mbage ti tele ti atemple ni oko oko laso. Zo wa laso ayeke gi ndara na fango lege na mbage ti Athéna?
Kota kangbi ayeke na popo ni na Jéhovah “Nzapa ti lakue lakue” so zo oko ade abâ lo lâ oko pëpe (aRomain 16:26; 1 Jean 4:12). Amolenge ti Koré asû na mbeti: “Nzapa so ayeke Nzapa ti e teti lakue lakue! Fade Lo fa lege na e lakue.” (Psaume 48:15). Mbeni oko lege ti wara ngia na yâ fango lege ti Jéhovah Nzapa ayeke ti manda Tënë ti lo Bible na ti sala kusala alingbi na awango ti lo na yâ fini ti e.