Lo ye ti lo lani nzobe
MILTON G. HENSCHEL, mbeni oko ti aita so aninga na yâ Wabatango Bungbi ti aTémoin ti Jéhovah, ahunzi kusala ti lo ge na ndo sese na samedi 22 mars 2003. Lo yeke lani na ngu 82.
Na ngoi so lo de maseka, Milton Henschel alinda na yâ kota ndokua ti aTémoin ti Jéhovah na lo ngbâ lani ti sala kusala dä ahon angu 60. Hio, a hinga lo teti so lo hinga ti bâ nda ti aye nzoni nga teti bingo bê ti lo na ndo kusala ti fango tënë ti Royaume. Na ngu 1939, lo ga wakuasu ti N. H. Knorr so ayeke lani surveillant ti ndo ti salango ambeti ti aTémoin ti Jéhovah na Brooklyn. Tongana lani Ita Knorr ato nda ti mû li ni na ndo kusala ti aTémoin na ndo sese kue na ngu 1942, lo mû Ita Henschel tongana zo ti mungo maboko na lo. Na ngu 1956, Ita Henschel asala mariage na Lucille Bennett na ala kangbi legeoko angia nga na akpale so asi na yâ fini ti ala.
Ita Henschel asala lani kusala maboko na maboko na Ita Knorr juska na kuâ ti Knorr na ngu 1977. Fani mingi, Ita Knorr na Ita Henschel ague na yâ ti akodoro ahon 150 ti bâ na ti kpengba amissionnaire nga na aita so asala kua na yâ ti abiröo ti filiale. Ngoi na ngoi, ti sala mara ti atambela tongaso a hunda biani ngangu, na a yeke ga nga même na aye ti ngangu. Na tapande, na ngu 1963, na ngoi so lo gue na mbeni kota bungbi na Libéria, a sala ngangu mingi na Ita Henschel teti so lo ke ti mû mbage na matanga ti vorongo kodoro.a Na mbito pëpe, gi ngoi kete na pekoni, Ita Henschel akiri na Libéria ti tingbi na gbia ti kodoro ni na ti gi ti wara kota liberté ti vorongo Nzapa teti aTémoin ti Jéhovah ti kodoro ni kâ.
Na lekengo angangu kpale, Ita Henschel awara iri ti zo ti mungo maboko, zo so aluti ngangu pëpe na ndo bango ndo ti lo, nga zo so asala ye na lege ni. Aita so asala kusala legeoko na lo agonda mbilimbili salango ye ti lo na lege ni, salango tele ti lo kete, nga teti so lo ye atënë ti ngia. Teti so lo yeke bata ye ngangu na li ti lo, lo yeke zia ngia lani na bê ti amissionnaire mingi na ndo sese kue teti so lo yeke ndulu ti dabe ti lo hio na a-iri ti ala, ti tene mbeni kete tënë na yanga ti kodoro so lo gue dä, nga ti tene mbeni ndulu tënë ti ngia.
Michée 6:8 adabe ti e so Jéhovah Nzapa aye si e “ndoye nzobe”. Azo ayeke dabe ti ala ande na Milton Henschel teti so lo zia tapande na lege so. Atâa kota kungba so lo yeke na ni, lo yeke lani lakue zo so azo alingbi ti ga ndulu na tele ti lo, na lo sala ye na nzobe. Lo ye lani mingi ti tene: “Tongana kite ayeke na bê ti mo, dabe ti mo so ye so a sala na nzobe ayeke mbilimbili ye.” Atâa so e yeke na vundu teti so e girisa ita ti e so e ndoye lo mingi, e yeke na ngia so lo ngbâ be-ta-zo juska na nda ni, na beku ti wara futa ti lo so ayeke “couronne ti fini ti lakue lakue.”—Apocalypse 2:10.
[Kete tënë na gbe ni]
a Bâ Annuaire des Témoins de Jéhovah 1977, alembeti 173-179.
[Foto na lembeti 31]
M. G. Henschel na N. H. Knorr
[Foto na lembeti 31]
Lo na wali ti lo Lucille